ەلباسى ن.نازارباەۆتىڭ ەڭبەك رىنوگىنىڭ تيىمدىلىگىن ارتتىرۋ, تۇرمىسى تومەن جانە جۇمىسسىز, ءوزىن-ءوزى جۇمىسپەن قامتىعان حالىقتى مەملەكەتتىك باعدارلامالارعا تارتۋ جونىندە تاپسىرمالار بەرگەنى بەلگىلى. سوندىقتان دا حالىقتى جۇمىسپەن قامتۋدى ىسكە اسىرۋ بارىسى «نۇر وتان» حدپ-نىڭ ايرىقشا قاداعالاۋىندا. «جۇمىسپەن قامتۋ – 2020» باعدارلاماسىنىڭ ىسكە اسىرىلۋ تەتىكتەرى دە پارتيا بەلسەندىلەرىنىڭ قاتىسۋىمەن پىسىقتالعان. پارتيا جانىندا جوبانىڭ ورىندالۋىنا مونيتورينگ ءجۇرگىزۋ جونىندەگى ساراپشىلار توبى دا جەر-جەردە بەلسەندى جۇمىس ىستەپ جاتىر.
سارسەنبى كۇنى پارتيا ءتوراعاسىنىڭ ءبىرىنشى ورىنباسارى نۇرلان نىعماتۋلين شىعىس قازاقستان وبلىسىنا جاساعان جۇمىس ساپارى بارىسىندا «جۇمىسپەن قامتۋ – 2020» باعدارلاماسىنا قاتىسىپ وتىرعان بىرقاتار مەكەمەلەردى ارالاپ كوردى. نۇرلان زايروللا ۇلى ەڭ الدىمەن كاسىپكەرلىكتى قولداۋ ءجونىندەگى سەرۆيس ورتالىعىندا بولدى. وبلىس اكىمى بەردىبەك ساپارباەۆ بۇل ورتالىقتىڭ ەڭ الدىمەن شىعىس وڭىرىندە ىسكە قوسىلعانىن تىلگە تيەك ەتتى. سەرۆيس ورتالىعىنىڭ مىندەتى – مەملەكەتتىك 4-ءشى باعدارلامانىڭ جۇزەگە اسۋىن قامتاماسىز ەتۋ. «جول كارتاسى-2020» باعدارلاماسى بويىنشا بۇل ورتالىقتا اۋىلدان كەلگەن جانە قالاداعى كاسىپورىنداردىڭ وكىلدەرى تەرەڭدەتىپ ءبىلىم الادى. ولارعا ءبىلىمى مەن بىلىگى كەلىسكەن مامان كادرلار ءدارىس بەرەدى.
– ماماي باتىر اۋىلىندا «حان و.ە.» شارۋا قوجالىعى جاڭا جىلىجاي كەشەنىن ىسكە قوسۋدا. امانشىلىق بولسا, وسى اۋىلدىڭ 66 ادامى جۇمىسپەن قامتاماسىز ەتىلمەك. كوكونىس ءوسىرۋدىڭ قىر-سىرى جەتكىلىكتى كورىنەدى. قىس مەزگىلىندە كوكونىس ءوسىرۋدىڭ تەحنولوگياسىمەن ءبىز جەتە تانىستىرىلىپ جاتىرمىز, – دەيدى وسى اۋىلدىڭ تۇرعىنى قارلىعا قابىلانقىزى.
جوبا شەڭبەرىندە كاسىپكەرلىككە قولداۋ كورسەتۋ ورتالىعى شاعىن جانە ورتا بيزنەسكە دەمەۋ قولىن سوزۋدا. وبلىستىڭ 640 كاسىپكەرىنە نەسيە بەرىلەتىن بولدى. ول ءۇشىن 1 ميلليارد 356,3 ميلليون تەڭگە قارجى قاراستىرىلعان. سەرۆيستىك ورتالىقتا ايماقتىق كوميسسيا بيزنەس-جوبالاردى ىرىكتەپ, تيپتىك جوسپاردى بەكىتەدى ەكەن. سەرۆيس ورتالىعى اتالمىش باعدارلاماعا قاتىسۋشىلاردىڭ تەرەڭ ءبىلىم الۋىن كوزدەيدى. ءوڭىر باسشىسى كەلگەن قوناقتارعا وسىلار جايلى كەڭىرەك ماعلۇمات بەردى.
بۇدان كەيىن نۇرلان نىعماتۋلين باستاعان توپ وسكەمەندەگى №1 كاسىبي ليتسەيگە اتباسىن بۇردى. بۇل جەردە قۇرىلىسشىلار مەن ەلەكتر جوندەۋشىلەر, كونديتەر تاعامدارىن جاسايتىن ماماندار ازىرلەنەدى. شىرايلى شىعىستا تۇتاستاي العاندا 92 ماماندىق بويىنشا ءبىلىم بەرىلىپ جاتىر. ن.نىعماتۋلين وقۋ ورنىنىڭ ماتەريالدىق-تەحنيكالىق بازاسىمەن تانىسىپ, شەبەرحانالار مەن لابوراتوريالارداعى ءبىلىم الىپ جاتقان جاستارمەن اڭگىمەلەستى. ليتسەي ديرەكتورى قۇماربەك ساندىباەۆ بۇل جەردە 4 ۋاقىت تاماق تەگىن بەرىلەتىنىن, بولاشاق جۇمىسشىلار ءۇشىن كىتاپحانا, سپورت زالدارى قىزمەت كورسەتەتىنىن ايتتى. بيىل 228 تۇلەك اياقتاپ, ونىڭ 170-ءى جۇمىسپەن قامتاماسىز ەتىلسە, ال قالعاندارى جوعارى وقۋ ورىندارى مەن كوللەدجدەردە بىلىمدەرىن جالعاستىرىپ جاتىر ەكەن.
– پارتيا توراعاسى ن.نازارباەۆ جۇمىسشى جاستاردىڭ ءبىلىمى مەن بىلىگىن قاتار جالعاستىرۋعا ۇنەمى كوڭىل بولەدى. سىزدەر تەگىن تاماقتانىپ, تەگىن ءبىلىم الاسىزدار. قازىر بىزگە كەرەگى ۇستاز بەن ءدارىگەر, ەلەكترمەن دانەكەرلەۋشىلەر ەكەنىن نازاردا ۇستاعان ءجون. سوندىقتان ءبىز سىزدەردەن ءۇمىت كۇتەمىز, – دەدى پارتيا توراعاسىنىڭ ءبىرىنشى ورىنباسارى كەزدەسۋ كەزىندە.
ماماي باتىر اۋىلىندا «حان و.ە.» شارۋا قوجالىعى ءوندىرىس كولەمىن كەڭەيتۋ ءۇشىن ۇكىمەتتەن جەڭىلدەتىلگەن نەسيە بويىنشا 198 ميلليون تەڭگە الىپتى. كوميسسيا ماقۇلداعان بيزنەس-جوسپارعا ساي جىلىجاي مەن توڭازىتقىش قويمالارى سالىنادى. بۇل جەردە وبلىس اكىمى مەن پارتيا توراعاسىنىڭ ءبىرىنشى ورىنباسارى جىلىجاي كەشەنى جوباسىنىڭ تۇساۋكەسەرىن جاسادى. اقتاۋدان كەلگەن كاسىپكەرلەر دە اشىق الاڭدا جىلىجاي سالۋدى باستاپ كەتىپتى. قوجالىق توراعاسى ولەگ حان كاسىپكەرلەرگە جاساپ وتىرعان قامقورلىعى ءۇشىن ەلباسى نۇرسۇلتان نازارباەۆقا ۇلكەن العىسىن ءبىلدىردى.
– مەن وزبەكستاندا ۇزاق جىلدار تۇرىپ, ول جاقتا دا كوكونىس ءوسىرۋدى قولعا العان ەدىم. بىراق ءدال قازاقستانداعىداي, ونىڭ ليدەرى ن.نازارباەۆتاي اۋىل ادامدارىنا ەرەكشە قامقورلىق جاسايتىن جاعدايدى كورگەن ەمەسپىن. ماماي باتىر اۋىلىندا جۇمىس ىستەۋگە بارلىق جاعداي بار. الداعى ۋاقىتتا جولدار سالىنىپ, ەلەكتر, جىلۋ, سۋ جۇيەلەرى تارتىلماق, – دەدى كاسىپكەر.
– «جۇمىسپەن قامتۋ-2020» الەۋمەتتىك ماڭىزى بار جوبا ەلباسى ن.نازارباەۆتىڭ تىكەلەي تاپسىرماسى بويىنشا جۇزەگە اسۋدا. وسى ماقساتقا تەك بيىلدىڭ وزىندە عانا رەسپۋبليكالىق بيۋدجەتتەن 40 ميلليارد تەڭگە ءبولىنگەن. بولاشاعى ايقىن باعدارلامانىڭ جۇزەگە اسۋى مىڭداعان جەرلەسىمىزدىڭ جاڭا ماماندىق الۋىنا, جاڭا جۇمىس ورىندارىنا ورنالاسۋىنا جول اشىپ وتىر, – دەدى نۇرلان نىعماتۋلين اقپارات قۇرالدارى وكىلدەرىنە بەرگەن سۇحباتىندا.
وڭداسىن ەلۋباي.
شىعىس قازاقستان وبلىسى.