كەشە اقوردادا قازاقستان رەسپۋبليكاسىنىڭ مەملەكەتتىك حاتشىسى قانات ساۋداباەۆتىڭ توراعالىعىمەن شەتەلدەردە كادرلار دايارلاۋ جونىندەگى رەسپۋبليكالىق كوميسسيانىڭ ءماجىلىسى بولىپ ءوتتى.
ەلباسى وتاندىق ءبىلىم ساپاسىن ارتتىرۋعا ەرەكشە كوڭىل ءبولىپ كەلەدى. «نازارباەۆ ۋنيۆەرسيتەتىن» اشۋ ەلىمىزدەگى ءبىلىم دەڭگەيىن كوتەرۋگە ەرەكشە ىقپال ەتۋى ءتيىس. اتالعان جوعارى وقۋ ورنىنىڭ ومىرگە كەلۋىمەن «بولاشاق» باعدارلاماسى بويىنشا شەتەلدەردە باكالاۆرلاردى دايارلاۋ اياقتالدى. وسى رەتتە تيىسىنشە ماگيسترلەر مەن PhD دوكتورلارىن ماقساتتى دايارلاۋعا ەرەكشە دەن قويىلىپ وتىرعاندىعىن ايتا كەتۋ كەرەك.
بۇل جونىندە مەملەكەتتىك حاتشى بىلاي دەدى: «بۇگىنگى كۇنى پرەزيدەنتتىك «بولاشاق» ءبىلىم بەرۋ باعدارلاماسى تۇلەكتەرىن جۇمىسقا ورنالاستىرۋ جانە ولاردىڭ الەۋەتىن ءتيىمدى پايدالانۋ قوعامنىڭ ءجىتى نازارىندا. شەتەلدەردەن قايتىپ ورالعان ستيپەندياتتاردىڭ ەلگە قوساتىن ۇلەسى شىققان شىعىنداردىڭ ورنىن تولتىرىپ, ۇمىتتەرىمىزدى اقتاۋى ءتيىس».
ەلىمىزدە ەكونوميكانىڭ الەۋەتى ارتىپ, يندۋستريالىق-يننوۆاتسيالىق باعدارلاماعا سايكەس كوپتەگەن جوبالار قولعا الىنۋدا. ولاي بولسا, بىلىمگە دەگەن تالاپ تا كۇشەيە بەرەتىن بولادى. شەتەلدەردە كادرلار دايارلاۋدا قوماقتى قارجى جۇمسالىپ كەلە جاتقاندىعىن ەسكەرسەك, ونىڭ قايتارىمى بولۋى شارت. مەملەكەتتىك حاتشى سوزىنەن وسىنى ۇقتىق.
ماجىلىسكە قاتىسىپ وتىرعان كوميسسيا مۇشەلەرىنە قاراتا ق.ساۋداباەۆ ءاربىر ۇمىتكەرگە ەرەكشە دەن قويىلۋى قاجەتتىگىن ەسكەرتتى.
– سوندىقتان ءبىز ءاربىر ءۇمىتكەردىڭ شەتەلدەردىڭ جەتەكشى جوعارى وقۋ ورىندارىندا وقۋىنىڭ الەۋەتتى مۇمكىندىگىن اسا تياناقتىلىقپەن زەردەلەۋىمىز كەرەك, – دەدى قانات بەكمىرزا ۇلى. ىرىكتەۋ ءادىل ءارى قاتاڭ تۇردە ءوتۋى ءتيىس. بىزگە ساپا كەرەك. پرەزيدەنتتىك «بولاشاق» باعدارلاماسى ماڭىزدى مىندەتتەردى ورىنداعاندىعىن ايتا كەتكەن ءجون. اتالعان باعدارلاماعا سايكەس ەلىمىز ءۇشىن حالىقارالىق دەڭگەيدەگى كوپتەگەن مامانداردىڭ العاشقى بۋىنى دايارلاندى. قازىرگى تاڭدا دا ىرىكتەۋ ءجۇرگىزىلىپ كەلەدى. ۇستىمىزدەگى جىلدىڭ 4 شىلدەسى مەن 5 تامىزى ارالىعىندا جۇرگىزىلگەن كونكۋرستىق ىرىكتەۋدىڭ قورىتىندىسى بويىنشا «بولاشاق» حالىقارالىق ستيپەندياسىن تاعايىنداۋ ءۇشىن رەسپۋبليكالىق كوميسسيا قاراۋىنا 577 ۇمىتكەردىڭ ءوتىنىشى ەنگىزىلىپتى. ونىڭ ىشىندە كوپتەگەن ۇمىتكەر قارجى, قۇقىق, ەكونوميكا, مۇناي-گاز ءىسى سالاسىنا قاتىستى ماماندىقتاردى تاڭداۋعا قۇلىقتى ەكەندىگىن بايقاتقان. سونىمەن قاتار, اقپاراتتىق تەحنولوگيالار مەن جۇيەلەر; بايلانىس جەلىلەرى جانە كوممۋنيكاتسيا جۇيەلەرى; كوپ كانالدى تەلەكوممۋنيكاتسيالىق جۇيەلەر; راديو بايلانىس; راديو حابارلامالار جانە تەلەۆيزيا ماماندىقتارى جاستاردىڭ قالاۋى ەكەندىگىن كورسەتىپ وتىر. جانە دە «تەلەكوممۋنيكاتسيا», «تەحنولوگيالار مەنەدجمەنتى», «تۋريزم سالاسىنداعى مەنەدجمەنت», «قوناق ءۇي مەنەدجمەنتى», «ەنەرگەتيكا» سياقتى ماماندىقتار سۇرانىسقا يە. قالاي بولعان كۇندە شەتەلدەردە كادرلار دايارلاۋ جونىندەگى رەسپۋبليكالىق كوميسسيا ەلىمىزگە اسا قاجەتتى ماماندىقتار بويىنشا لايىقتى ۇمىتكەرلەردى تاڭداۋى ءتيىس.
وسى تۇرعىدان كەلگەندە كەشە اتالعان كوميسسيا وتىرىستىڭ قورىتىندىسى بويىنشا حاتتامالىق شەشىم قابىلدادى.
اسقار تۇراپباي ۇلى.