ونى يزرايلدىك فيرمالار مەن ماماندار پەتروپاۆل قالاسىندا اشۋدى كوزدەپ وتىر
وبلىس اكىمى سەرىك ءبىلالوۆ باستاعان سولتۇستىكقازاقستاندىق دەلەگاتسيانىڭ يزرايلگە بارىپ, بىرقاتار ماسەلەلەر توڭىرەگىندە ارىپتەستىك قارىم-قاتىناس ورناتىپ قايتقانىن جازعان ەدىك. («ىسكەرلىك بايلانىستاردى ورىستەتەمىز دەسەك», 18 ماۋسىم) جۋىردا ءوزارا ۋاعدالاستىققا وراي وسى ەلدىڭ دارىگەرلەرى قىزىلجار وڭىرىندە بىرنەشە كۇندىك جۇمىس ساپارىمەن بولدى. ايماق باسشىسى ولارمەن كەزدەسىپ, مۇنداي ەكىجاقتى بايلانىستاردىڭ تيىمدىلىگىن اتاپ ءوتتى. وبلىستا زاماناۋي مەديتسينالىق قۇرال-جابدىقتار ورناتىلعان كارديولوگيالىق ورتالىق اشىلعالى ءجۇرەككە وپەراتسيا جاساۋ قولعا الىندى, دەدى ول. MVI مەديتسينا ورتالىعىنىڭ باس ديرەكتورى ناتاليا حەدۆات ءوز كەزەگىندە قازاقستاننان دە كوپ ءنارسە ءۇيرەنۋگە بولاتىنىن, قىزىلجار ءوڭىرىندە بىرلەسكەن مەديتسينالىق ورتالىق اشۋ نيەتتەرىن, وزدەرىمەن بىرگە كارديوحيرۋرگيا سالاسىنىڭ بىلگىر مامانى امير كرەمەردى الا كەلگەنىن, جۇرەك-قان تامىرلارى اۋرۋىنا ۇشىراعان ناۋقاستارعا وتا جاساماق ويلارىن جەتكىزدى.
يزرايلدەن كەلگەن كارديوحيرۋرگتار پەتروپاۆل قالاسىنداعى كارديوحيرۋرگيالىق ورتالىقتا بولىپ, جاعدايمەن جان-جاقتى تانىستى. مەكەمەنىڭ تالاپقا ساي جابدىقتالعانىنا كوز جەتكىزگەننەن كەيىن وتا جاساۋعا كىرىستى. اتاعىنان ات ۇركەتىن امير كرەمەر كۇردەلى جۇرەك اۋرۋلارىنا وتا جاساۋدىڭ ناعىز مايتالمان شەبەرى ەكەن. جەرگىلىكتى دارىگەرلەردىڭ كومەگىنە جۇگىنە وتىرىپ 12 ادامعا وتا جاسادى. ناۋقاستاردى قابىلداپ, ءتۇرلى كەڭەستەر بەردى. ءبىز ءبولىم مەڭگەرۋشىسى يگور شۋماكوۆپەن حابارلاسىپ, جۇرەك-قان تامىرلارى اۋرۋىنا ۇشىراعان 20-عا جۋىق ادامنىڭ ەم-دوم قابىلداپ جاتقانىن, وپەراتسيا ۇستەلىنە جاتقىزىلعانداردىڭ ءبارى وزدەرىن جاقسى سەزىنەتىنىن بىلدىك. 54 جاستاعى وۆشينوۆ ۆيكتوردىڭ جۇرەك اۋرۋىمەن سىرقاتتانعانىنا ءبىراز بولعان ەكەن. شيپالى ەمنەن كەيىنگى كوڭىل-كۇيى جاقسى كورىنەدى. اورتاكورونارلىق وپەراتسيا جاساۋ ۇلكەن بىلىكتىلىك پەن تاجىريبەنى قاجەت ەتەدى. ونى كارديولوگيالىق ورتالىقتىڭ باس دارىگەرى ازامات ماعزۇموۆ تا راستادى. وپەراتسيالاردىڭ كۇردەلىگىنە قاراماستان, قىزىلجارلىق كارديوحيرۋرگتار سىننان سۇرىنبەي وتكەن.
2011-2015 جىلدارعا ارنالعان «سالاماتتى قازاقستان» مەملەكەتتىك باعدارلاماسىنىڭ ورىندالۋى بارىسىندا وبلىستا اۋرۋدىڭ الدىن الۋ, العاشقى مەديتسينالىق-سانيتارلىق ءجاردەم جايى جاقسارا تۇسكەن. اۋىل تۇرعىندارىنا مەديتسينالىق كومەكتىڭ قولجەتىمدىلىگى قاراستىرىلعان. انا جانە بالا ءولىمىن تومەندەتۋگە, اسا قاۋىپتى اۋرۋلاردى بولدىرماۋعا باسا نازار اۋدارىلعان. جىل وتكەن سايىن دەنساۋلىق ساقتاۋ جۇيەسىنىڭ ماتەريالدىق-تەحنيكالىق بازاسى نىعايىپ كەلەدى. تەك بيىلدىڭ وزىندە بالالار دەنەشىنىقتىرۋ ديسپانسەرى, پەرزەنتحانا ءۇيى, امبۋلاتوريالىق حيرۋرگيا ورتالىعى قۇرىلدى. تايىنشا جانە جامبىل اۋداندارىندا تۋبەركۋلەزگە قارسى كۇرەس ديسپانسەرلەرى اشىلدى. مۇنداي نىسان قۇرىلىسى ع.مۇسىرەپوۆ اۋدانىندا دا اياقتالۋعا جاقىن. «ۇرپاق قورى» باعدارلاماسى يگەرىلگەلى 1152 سابيگە 279 ميلليون تەڭگە تولەندى.
ءومىر ەسقالي,
سولتۇستىك قازاقستان وبلىسى.