دارىگەرلەرگە تاعى 40 پاتەر. ۇستازدار مەن دارىگەرلەر, بيۋدجەتتىك مەكەمە قىزمەتكەرلەرىنىڭ جالاقىسى 30 پايىزعا ءوسىپ, قارجى داعدارىسى قىسىپ بارا جاتقان كەزدە ۇلكەن دەمەۋ بولدى.
وسىدان ءبىراز ۋاقىت بۇرىن دارىگەرلەر مەرەكەسى قارساڭىندا ولارعا سەگىز پاتەردىڭ كىلتى سالتاناتتى جاعدايدا تاپسىرىلعان. جاقىندا قالا اكىمى يسلام ابىشەۆ ءوزى باسقاراتىن «نۇر وتان» حدپ قالالىق فيليالىنىڭ ساياسي وتىرىسىندا دارىگەرلەردىڭ ارقايسىسىمەن جەكە اڭگىمەلەسىپ, ولاردى پاتەر ماسەلەسىنىڭ قينايتىنىنا كوز جەتكىزدى. قالا اكىمى ءوز مۇمكىندىكتەرىن ساراپتاي كەلە سەگىز پاتەرگە قوسىمشا تاعى 40 پاتەردى بولەتىنىن تىلگە تيەك ەتتى. وسكەمەندەگى اۋرۋحانالار مەن ەمحانا باسشىلارى وزدەرىنە قانشا پاتەردىڭ تيەتىنىن ءبىلدى.
ونداسىن ەلۋباي,وسكەمەن.
«اقبۇلاقتىڭ» ازاتقا شاراپاتى. تاۋەلسىزدىگىمىزدىڭ 20 جىلدىعى قارساڭىندا ەلدى مەكەندەردى كوركەيتۋ جونىندەگى ەلباسى تاپسىرماسى تياناقتىلىعىمەن قۋانتىپ وتىر. اسىرەسە, «اقبۇلاق» باعدارلاماسى شەڭبەرىندە تۇرعىنداردى ساپالى اۋىز سۋمەن قامتاماسىز ەتۋدە شاراپاتتى ىستەر اتقارىلۋدا. كۇنى كەشە زەرەندى اۋدانىنداعى ازات اۋىلىندا قۋاتتى قۇبىردى ىسكە قوسۋ سالتاناتى وتكىزىلىپ, وعان وبلىس اكىمى س.دياچەنكو قاتىستى. التى جۇزگە تارتا تۇرعىنى بار ازات اۋىلى «اقبۇلاق» باعدارلاماسى اياسىندا 15 ميلليون تەڭگە قارجى ءبولىپ, قۇرىلىستى ءوز كۇشىمەن جۇرگىزگەن «تەمىر جول سۋ» جاۋاپكەرشىلىگى شەكتەۋلى سەرىكتەستىگىنە كول-كوسىر العىس جاۋدىرۋدا. اۋدان اكىمى ەربول ساعديەۆ اۋىلدىق جەرلەردە بيىل وسىنداي سەگىز جوبا جۇزەگە اسىرىلاتىندىعىن حابارلادى.
باقبەرگەن امالبەك, اقمولا وبلىسى.
پاتريوتتىق باستاما. اقتوبەلىك جاستاردىڭ, قوعامدىق ۇيىم باسشىلارىنىڭ تاراپىنان كوتەرىلگەن ەل تاۋەلسىزدىگىنىڭ 20 جىلدىعىنا ارنالعان «قازاقستاننىڭ بولاشاعى ءۇشىن» پاتريوتتىق ازاماتتىق كەڭ كولەمدى مارافون-باستاماسى اياسىندا جاستارعا پاتريوتتىق تاربيە بەرۋگە, مەملەكەتتىك رامىزدەردىڭ مارتەبەسىن كوتەرۋ, ولاردى جاس ۇرپاقتىڭ قاستەرلەۋى جانە قۇرمەتتەۋى تۇرعىسىندا ءتۇرلى شارالار وتكىزىلەدى. سونداي-اق, مارافون-باستاما بارىسىندا تاريحي قۇندىلىقتاردى قاستەرلەۋ جۇمىستارى دا جۇرگىزىلەتىن بولادى. وسىعان بايلانىستى وتكەن سالتاناتتى جيىندا ەل تاۋەلسىزدىگىنىڭ 20 جىلدىعىنا بايلانىستى 20 ورتا مەكتەپكە سونشاما راديو كۇشەيتكىش ورناتىلىپ, وقۋشىلاردىڭ ساباق الدىندا ەلىمىزدىڭ ءانۇرانىن تىڭداۋعا مۇمكىندىك تۋعىزىلاتىنى ايتىلدى. مارافون-باستاما اياسىندا وسىنداي تالىمدىك-تاربيەلىك ءمانى زور يگى شارالار كوپتەپ وتكىزىلمەك.
ساتىبالدى ءساۋىرباي. اقتوبە وبلىسى.
بىرلەسكەن مەموراندۋمعا قول قويىلدى. ەگەمەن ەل اتانعاننان بەرگى جەردە ءتۇبى ءبىر تۇرىك اعايىندارمەن جان-جاقتى بايلانىس نىعايا ءتۇسىپ كەلەدى. سونىڭ ءبىر جارقىن مىسالىنداي ولار بۇعان دەيىن جاپوندارمەن بىرگە ەرتىس وزەنى ۇستىنە سالىنعان جاڭا كوپىر قۇرىلىسىنا قىزۋ اتسالىسقان ەدى. ەندى تۇرىكتەردىڭ «Paridi Croup» كومپانياسى وسىندا جاڭادان سالىناتىن اۋەجاي جانە تۇرعىن ۇيلەر مەن ساۋدا ورتالىقتارى سەكىلدى الەۋمەتتىك ماڭىزدى نىسانداردى قاتارعا قوسۋعا مىندەتتەنىپ وتىر. سول ەلەۋلى شاراعا وراي بىرلەسكەن مەموراندۋمعا قالا اكىمى ايبەك كارىموۆ پەن اتالعان كومپانيانىڭ ۆيتسە-پرەزيدەنتى يىلماز مەتين قول قويدى.
داۋلەت سەيسەن ۇلى,سەمەي.
رەسەيدەگى قانداستاردى ءبىر سەرپىىلتتى. رەسەيدىڭ استراحان وبلىسىندا 150 مىڭنان اسا قانداسىمىز تۇرادى. ولار اركەز قازاق ەلىنىڭ تابىسىنا قۋانىپ جۇرەدى. قازاقتىڭ ونەرىنە سۋسايتىنىن دا جاسىرمايدى. قازاقستاننان ونەر ۇجىمدارى ءجيى بارعانىن قالايدى. وتكەن اپتادا گۇلنار سادۋاقاسوۆا باسقاراتىن د. نۇرپەيىسوۆا اتىنداعى حالىقتىق مۋزىكا كوللەدجىنىڭ ونەرپازدارى استراحاندىق قانداستاردى ءوز ونەرلەرىمەن ەرەكشە سەرپىلتىپ, اتاجۇرتقا ساعىنىشىن وياتقان «قازاقستان–قاسيەتتى وتانىم» اتتى كونتسەرتتىك شارا وتكىزدى. استراحانداعى قانداستار الدىندا مۋزىكا كوللەدجىندەگى ستۋدەنتتەردەن قۇرالعان ۇلت-اسپاپتار وركەسترى, «دوستىق» ۆوكالدى ءانسامبلى, حور ۇجىمى ونەر كورسەتتى. سونداي-اق, ا.اپەنوۆا, ە.سۇلەەۆ, س.الىبەكوۆ, گ.جۇماتاەۆا, ج.جاميەۆ, ق.شاكيەۆ, ب.بيسەنباەۆا, ە.مەرەكەنوۆ سەكىلدى ءانشى-دومبىراشىلار ونەرىمەن رەسەيلىك قانداستارىمىزدىڭ ىستىق ىقىلاسىنا بولەندى.
جولداسبەك شوپەعۇل, اتىراۋ وبلىسى.
ساياباق اشىلدى. ورال قالاسى اۋماعىنا كىرەتىن دەركول كەنتىندە ۇزاق جىلدار بويى جابايى باق كۇيىندە قالىپ كەلگەن التى گەكتار القاپ مادەني-دەمالىس ساياباعىنا اينالدى. مۇندا اركىمنىڭ جاس ەرەكشەلىگىنە ساي قيسىنىن تاپقان ورىندار جەتكىلىكتى. بالالارعا ارنالعان ويىن الاڭدارى, ساحنا, كوشە شامدارى مەن اتكەنشەكتەر الىستان كوز تارتادى. جاياۋ جۇرگىنشىلەرگە ارنالعان سوقپاقتارعا ورنەكتاستار توسەلگەن. جابايىلانىپ كەتكەن اعاشتار مەن تال-تەرەكتەر كۇتىم جاسالعاننان كەيىن تىپتەن جاسانىپ, جاسارىپ, جاپىراقتارى سامال جەلمەن سىبدىر قاعىپ تۇر. ساياباق قۇرىلىسى مەن اباتتاندىرۋ جۇمىستارىن «باتىسسترويفاكت» جشس جۇرگىزگەن. بۇل ءۇشىن ورال قالاسى بيۋدجەتىنەن تابانى كۇرەكتەي 52 ميلليون تەڭگە قاراجات بولىنگەن.
تەمىر قۇسايىن, ورال.
اقىنعا كورسەتىلگەن قۇرمەت. قازاقستان جازۋشىلار وداعىنىڭ مۇشەسى, بىرنەشە كىتاپتىڭ اۆتورى, ءمۇشايرالار مەن ايتىستاردىڭ جەڭىمپازى زەينوللا اكىمجانوۆتىڭ ەسىمى جۇرتشىلىققا ارقالى اقىن رەتىندە ءارى ءتىل جاناشىرى رەتىندە جاقسى تانىس. ول 35 جىلدان استام جۋرناليستيكا سالاسىندا جەمىستى ەڭبەك ەتىپ كەلەدى. اقىننىڭ 60 جىلدىق مەرەيتويى ءوزى جۇمىس ىستەيتىن «سولتۇستىك قازاقستان» گازەتىنىڭ رەداكتسياسىندا – جىرسۇيەر قاۋىمنىڭ قاتىسۋىمەن كەڭىنەن اتالىپ ءوتتى. «قىزىلجار» مەدياحولدينگىنىڭ ديرەكتورى كارىباي مۇسىرمان وبلىس اكىمىنىڭ قۇتتىقتاۋ حاتىن وقىپ بەرىپ, يىعىنا شاپان جاپتى. ۇجىم اتىنان سىي-سياپات كورسەتتى. زەكەڭنىڭ تۋعان جەرى –جامبىل اۋدانىنان دا ارنايى وكىلدەر كەلىپ, تارتۋ-تارالعىلار جاسادى. قىزىلجار ءوڭىرىنىڭ قادىرلى ازاماتتارى قۇدايبەرگەن قاليەۆ, جامبىل تەسەمەنوۆ, قايرات قادىرالين, تۋعان-تۋىستارى قۋانىشقا ورتاقتاستى.
ءومىر ەسقالي, سولتۇستىك قازاقستان وبلىسى.