16 تامىز كۇنى «استانا-ارەنا» ستاديونىندا قازاقستان مەن سيريا قۇرامالارىنىڭ جولداستىق كەزدەسۋى وتەدى.
بۇعان دەيىن ءۇش رەت كەزدەسكەن كوماندالاردىڭ ويىنىنا ۇلتتىق قۇرامانىڭ باس باپكەرى ميروسلاۆ بەرانەك جان-جاقتى دايىندالۋدا. ويتكەنى, وسى ءۇش ويىننىڭ بارىندە ءبىزدىڭ قۇراما قارسىلاستارىنان ەسە جىبەرگەن ەدى. ەكى ەل قۇرامالارىنىڭ العاشقى ويىنى 1995 جىلى 21 ماۋسىمدا داماسكىدە ازيا كۋبوگىنىڭ ىرىكتەۋ كەزەڭىندە وتكەن. وسى ويىندا الاڭ يەلەرى قازاقستاندى 2:0 ەسەبىمەن ۇتسا, الماتىدا وتكەن قارىمتا كەزدەسۋدە دە قوناقتار ءبىزدىڭ قۇرامانى 1:0 ەسەبىمەن جەڭىپ كەتتى. سوڭعى ءۇشىنشى ماتچتا دا الاڭ يەلەرىنىڭ اسىعى الشىسىنان ءتۇستى. يوردانيادا وتكەن جولداستىق كەزدەسۋدە سيريا قازاقستاندى 4:0 ەسەبىمەن جەڭگەن بولاتىن.
ەندى ءبىزدىڭ قۇراماعا ەسەمىزدى قايتاراتىن كەزى كەلدى دەپ ويلايمىز. كەشەگى ازەربايجانمەن بولعان ويىندا جەڭىسكە جەتكەن ميروسلاۆ بەرانەكتىڭ كومانداسى ءوز الاڭىندا سيريانى دا جەڭەتىنىنە سەنگىمىز كەلەدى. ءبىر ايتاتىن نارسە, وسى ويىنعا «ەگەمەن قازاقستان» گازەتىنىڭ سوڭعى ءنومىرىندە گوللانديانىڭ «ۆولەندام» كلۋبىندا ونەر كورسەتەتىن قانداسىمىز مۇرات ءونال شاقىرىلسا ەكەن دەگەن تىلەگىمىز بار. ءبىزدىڭ وسى تىلەگىمىزدى قازاقستان فۋتبول فەدەراتسياسىنىڭ جۇمىسىنا جاقىن جۇرەتىن گازەت وقىرماندارى فەدەراتسيا باسشىلىعىنا جەتكىزسە دەگەن نيەتىمىز دەپ بىلىڭىزدەر.