استانا ەلوردا مارتەبەسىن العالى مۇنداعى ءاربىر قىزمەت سالاسى كوپشىلىكتىڭ عانا ەمەس, رەسپۋبليكا باسشىلارىنىڭ دا قاتاڭ قاداعالاۋىندا. اسىرەسە, ستراتەگيالىق نىساندار بولىپ تابىلاتىن ۆوكزالدار مەن اۋەجايلارداعى قوزعالىس قاۋىپسىزدىگى اسا قىراعىلىقتى قاجەت ەتەدى. وسىعان وراي ۇكىمەت پارمەنىمەن بۇرىن جەكە مەنشىككە ارزان باعاعا ءوتىپ كەتكەن ۆوكزالدار كەرى قايتارىلۋدا. وعان 100 پايىزدىق مولشەردەگى اكتسياسى ۇكىمەتتىڭ قولىنداعى «قازاقستان تەمىر جولى» ۇك» اق-قا يەلىك ەتۋ جۇكتەلدى. وسىلايشا توزىعى جەتىپ, شالعايداعىلارى مۇلدە ازا باستاعان ستانسالاردى مەملەكەتكە قايتارۋعا باسشىلىق ەتۋ قۇزىرى «ۆوكزال-قىزمەت» اق-قا بەرىلگەن.
ەل تاۋەلسىزدىگىنىڭ 20 جىلدىق مەرەكەسىنە وراي, رەسپۋبليكامىزداعى ۆوكزالدار مەن ەلوردا باس قاقپاسىنىڭ دايىندىعى جونىندە «ۆوكزال-قىزمەت» اق پرەزيدەنتى قۋاندىق مۇستافينگە جولىعىپ, سۇحباتتاسقان ەدىك.
– قۋاندىق ساپار ۇلى, وسىدان ءبىرشاما ۋاقىت بۇرىن ۆوكزالداردىڭ تەمىر جولدىڭ قۇزىرىنان ءپروفيلدى ەمەس سالا دەپ الىنىپ تاستالعانى بەلگىلى. ەندى نەگە قايتا بالانستارىڭىزعا الىپ جاتىرسىزدار؟
– شىنىندا دا بۇرىن تەمىر جول ۆوكزالدارى «تەمىرجولم ۇلىك» اكتسيونەرلىك قوعامىنىڭ جانە جەرگىلىكتى اتقارۋ ورگاندارىنىڭ بالانستارىندا بولعان. ءوزىڭىز اتاپ وتكەندەي, تەمىر جول ۆوكزالدارى پروفيلدىك ەمەس مەكەمەلەردىڭ بالانستارىندا بولىپ, عيماراتتاردىڭ جالپى جاعدايلارىنا كەرى اسەرىن تيگىزدى. وسىعان بايلانىستى جانە تەمىر جول ۆوكزالدارىن ءتيىستى تۇرگە كەلتىرۋ ماقساتىندا ۇكىمەت تەمىر جول ۆوكزالدارىن «قازاقستان تەمىر جولى» ۇك» اق-تىڭ بالانسىنا قايتارۋ تۋرالى شەشىم قابىلدادى.
– جاسىراتىنى جوق, كەزىندە وتە ارزان باعاعا ءوتىپ كەتكەن ۆوكزالداردىڭ قانشاسى قايتادان جوندەۋدەن وتكىزىلىپ, قانشاسى جاڭادان سالىنادى؟ وعان قارجىنى كىم ءبولىپ وتىر؟
– تەمىر جول ۆوكزالدارىن «تەمىرجولم ۇلىك» اق پەن جەرگىلىكتى اتقارۋ ورگاندارىنىڭ بالانستارىنا تاپسىراردا, بارلىق عيماراتتار جوندەۋدەن وتكىزىلگەن بولاتىن, بىراق ۆوكزالدار ولاردا بولعان كەزەڭدەردە, تالداۋ كورسەتكەندەي, اعىمداعى جوندەۋدەن وتكىزىلمەگەن. ال تەمىر جول ۆوكزالدارى عيماراتتارىنىڭ ساتىلۋ ماسەلەسىنە كەلسەك, «تەمىرجولم ۇلىك» اق-تىڭ 20 تەمىر جول ۆوكزالىن بوگدە تۇلعالاردىڭ مەنشىكتى پايدالانۋىنا ساتقاندىعىن اتاپ ايتقان ءجون.
قازىرگى ۋاقىتتا كىشى ستانسالاردا تەمىر جول ۆوكزالىنىڭ 100 عيماراتىنىڭ قۇرىلىسى بويىنشا جۇمىستار جۇرگىزىلىپ جاتىر, جوبانى قارجىلاندىرۋدى «قازاقستان تەمىر جولى» ۇك» اق ءوز موينىنا الىپ وتىر. اعىمداعى جىلدىڭ 4 ماۋسىمىندا جايناق ستانساسى تەمىر جول ۆوكزالىنىڭ ءبىرىنشى عيماراتىنىڭ اشىلۋ سالتاناتى وتكىزىلدى.
– نەگىزىنەن, قالا قوناقتارى الدىمەن ۆوكزالداعى سەرۆيستىك قىزمەت تۇرىنە قاراپ, سول قالانىڭ مادەنيەتىنە باعا بەرەدى. وسى تۇرعىدا «ۆوكزال-قىزمەت» اق قانداي جۇمىستار اتقارىپ جاتىر؟
– تەمىر جول ۆوكزالى قاي قالانىڭ بولماسىن باستى قاقپاسى بولىپ ەسەپتەلەدى. سوندىقتان اكتسيونەرلىك قوعام بۇل باعىتتا وڭ ناتيجەلەر كورسەتۋگە ۇمتىلادى. مىسالى, كلاستان تىس جانە 1, 2, 3 كلاستىق ۆوكزالداردا سەرۆيس ءۇشىن اقپاراتتىق تابلو, كيوسكىلەر بار, انىقتاما بيۋرولارى, بيلەت كاسسالارى, تاماقتانۋ پۋنكتتەرى, ساۋدا ورىندارى بار, ۆاليۋتا ايىرباستاۋ پۋنكتتەرى جۇمىس ىستەيدى. سونىمەن قاتار كاسىپورىن قىزمەت كورسەتەتىن پەرسونالدىڭ مادەنيەتىنە جانە تارتىپتىك ەتيكاسىنا ەرەكشە كوڭىل بولەدى, ويتكەنى ءبىز ءۇشىن جولاۋشىنىڭ ۆوكزالدا كورسەتىلگەن سەرۆيسكە قاناعاتتانۋى وتە ماڭىزدى بولىپ تابىلادى. وسى باعىتتاعى جۇمىس قوعامنىڭ ەرەكشە باقىلاۋىندا.
– رەسپۋبليكامىزدىڭ كوپتەگەن ۆوكزالدارىندا مىڭگىرلەگەن ديكتورلار قازاقشانى بۇزىپ سويلەپ, جولاۋشىنىڭ اشۋ-ىزاسىن كەلتىرەدى. وسىنى تەحنيكالىق جاعىنان مۇقياتتاپ, ديكتورلارعا بايقاۋ جاريالاۋعا بولماي ما؟
– ۆوكزالداردا بارلىق ديكتورلار ءوز بەتتەرىمەن جۇمىس ىستەۋگە كىرىسپەي تۇرىپ ماشىقتانادى. ودان كەيىن اڭگىمەلەسۋدەن وتەدى جانە بۇل جاعدايدا مەملەكەتتىك ءتىلدى ءبىلۋ دەڭگەيىنە جانە ديكتوردىڭ ديكتسياسىنا ەرەكشە نازار اۋدارىلادى. قاتاڭ ىرىكتەۋدەن وتكىزىلەدى. سونداي-اق, ديكتورلارمەن بۇل باعىتتا تۇراقتى تۇردە جۇمىس جۇرگىزىلەدى جانە مەملەكەتتىك ءتىلدى ۇيرەنۋىنە ەرەكشە كوڭىل بولىنەدى.
– قالا قوناقتارىنىڭ ىشىندە ناماز وقيتىندارى دا بولادى. ۆوكزالداردا نامازحانالار بار ما؟
– ءيا, ءىرى تەمىر جول ۆوكزالدارىنىڭ بارىندە دە «نامازحانا» بولمەلەرى بار.
– استاناداعى جاڭا ۆوكزالدىڭ قۇرىلىسى قاشان باستالماق؟
– ازىرشە استاناداعى تەمىر جول ۆوكزالىنىڭ جاڭا عيماراتىنىڭ ەسكيزى ازىرلەنۋدە, ءتيىستى جۇمىستار ورىندالىسىمەن, قۇرىلىس مەرزىمى بەلگىلەنەدى.
– ەلىمىز تاۋەلسىزدىگىنىڭ 20 جىلدىعىن قانداي تابىستارمەن قارسى العالى وتىرسىزدار؟
قازاقستان تاۋەلسىزدىگىنىڭ 20 جىلدىعى قارساڭىندا پايدالانۋعا Coll ورتالىعىن ەنگىزۋ جوسپارلانىپ وتىر, ال بۇل جاعداي ءوز تاراپىنان قازاقستان ازاماتتارىنىڭ تەمىر جول ۆوكزالدارىنىڭ انىقتاما بيۋرولارىمەن قوڭىراۋ شالۋ ارقىلى تەزىرەك حابارلاسۋلارىنا ءمۇمكىندىك بەرەدى جانە وسى ورتالىقتىڭ قۇرال-جابدىقتارى ارقىلى جولاۋشىلار SMS-تىڭ, ەلەكتروندى پوشتانىڭ كومەگىمەن اقپاراتتار الا الادى.
– اڭگىمەڭىزگە راحمەت.
اڭگىمەلەسكەن ءابدىراحمان قىدىربەك.