ەلىمىز الەمگە اتى بەلگىلى «بايقوڭىر» عارىش ايلاعى ارقىلى تورتكۇل دۇنيەگە تانىمال دەسەك تە, وسى ۋاقىتقا دەيىن عارىش سالاسىنىڭ سان قىرىن مەڭگەرگەن وتاندىق ماماندارىمىز ساناۋلى-اق بولىپ كەلگەنى وزىمىزگە بەلگىلى. وسى ءبىر ولقىلىقتىڭ ورنىن تولتىرۋدى ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى قولعا العان ەكەن.
ءسويتىپ, 2009 جىلى ۋنيۆەرسيتەتتە «عارىش تەحنيكاسى جانە تەحنولوگياسى» كافەدراسى مەن فيزيكا-تەحنيكالىق فاكۋلتەتى قۇرىلىپ, 2009 جىلى فاكۋلتەتتىڭ 10 (2010 جىلى دا سونشا ادام) تۇلەگى دنەپروپەتروۆسك ۇلتتىق ۋنيۆەرسيتەتىنە ءبىر جىلعا وقۋعا جىبەرىلگەن كورىنەدى.
سول يگىلىكتى ءىس جەمىسىن بەرىپ, اتالعان وقۋ ورنىندا ۋكراينانىڭ ولەس گونچار اتىنداعى دنەپروپەتروۆسك ۇلتتىق ۋنيۆەرسيتەتىمەن بىرىگىپ دايىندالعان ەۇۋ-ءدىڭ 3 ماگيسترانتى مەن 2 باكالاۆر تۇلەگىنە ديپلوم تابىستالدى.
شاراعا ۋكراينانىڭ دنەپروپەتروۆسك ۇلتتىق ۋنيۆەرسيتەتىنىڭ ءبىر توپ عالىم-وقىتۋشىلارى قاتىسىپ, عارىش ماماندىعىنىڭ قىر-سىرىن تەرەڭىرەك اڭگىمەلەپ بەردى.
2009 جىلدىڭ ناۋرىز ايىندا ولەس گونچار اتىنداعى دنەپروپەتروۆسك ۇلتتىق ۋنيۆەرسيتەتىمەن عارىش سالاسىندا بىرىگىپ مامان دايارلاۋ تۋرالى كەلىسىمگە قول قويىلعاننان كەيىن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى ءوز قارجىسىمەن ۋكراينانىڭ اتالمىش وقۋ ورنىنا ستۋدەنتتەرىن وقۋعا جىبەرە باستادى. بۇگىندە اتالمىش ارىپتەستىك بايلانىس ءوز جەمىسىن بەرۋدە. ءبىتىرۋشى تۇلەكتەر اراسىنان عارىش سالاسىن تەرەڭ مەڭگەرگەن جاس ماماندار ىرىكتەلىپ الىنىپ, جۇمىسقا قابىلداناتىن بولسا, وسى جىلدىڭ قىركۇيەك ايىندا 18 ستۋدەنت عارىش سالاسى بويىنشا دنەپروپەتروۆسك ۇلتتىق ۋنيۆەرسيتەتىنە جولداما الىپ, ءبىلىمىن شىڭدايتىن بولادى.
ل.ن.گۋميلەۆ اتىنداعى ەۇۋ-دا «قازعارىش» باسشىسى ت.مۇساباەۆتىڭ قاتىسۋىمەن عارىش سالاسىنا قاجەتتى «تەمپۋس» باعدارلاماسىمەن بەكىتىلگەن عارىشتىق اپپاراتتاردى جوبالاۋشى زەرتحانا جاساقتالىپ, مامان دايارلاۋعا قاتىستى بارلىق جاعداي جاسالۋدا.
بەرىك سادىر.