شىعىس قازاقستان وبلىسى, كۇرشىم اۋداندىق مۋزىكا مەكتەبىنىڭ 30 وقۋشىسى مەن 10 مۇعالىمى باس قالانىڭ تۋعان كۇنىنە لايىقتى تارتۋ جاسادى. استانا تويىنا دەپ ارنايى دايىندالعان ونەر ۇجىمىنىڭ بۇل ساپارىنا بەلگىلى مەتسەنات, پارلامەنت ءماجىلىسىنىڭ دەپۋتاتى نۇرتاي سابيليانوۆ دەمەۋشىلىك جاساسا, شالعايداعى اۋىلدان ارنايى كەلگەن ونەرپاز جەتكىنشەكتەر مەن ۇستازدار كونتسەرتىن استانالىقتار اسقان ريزاشىلىقپەن قابىلدادى.
مىڭ بۇرالعان بي مەن كۇمبىرلەگەن كۇي, اۋەزدى اسەم اندەردى تامىلجىتا ورىنداعان جاستاردىڭ تالانتتارىنا تامسانا قول سوققان جۇرتشىلىق ولارعا دەگەن ءىلتيپاتتارىن ءبىلدىرىپ جاتتى. مۇنىمەن قوسا بالعىندار قولدارى بوساعان ۋاقىتتاردا استانانىڭ كورىكتى جەرلەرىن ارالاپ, ەرەكشە كوڭىلدە بولدى. ونەرپازداردىڭ ونەرلەرىن باعامداي كەلە, استانا قالالىق مادەنيەت باسقارماسىنىڭ باستىعى ب.ماجاعۇلوۆ اتالعان ۇجىم جەتەكشىسى, كۇرشىم اۋداندىق مۋزىكا مەكتەبىنىڭ ديرەكتورى مۇباراك شاكىروۆتى العىس حاتپەن ماراپاتتاپ, بىرقاتار ۇستازدارعا ارنايى ديپلومدار تابىس ەتتى. سونداي-اق, تاماشا ونەر كورسەتكەن مەكتەپتىڭ «سىمبات» بيشىلەر توبىنا قازان ايىندا استانادا وتەتىن «بالبوبەك» جاس دارىندار كونكۋرسىنا قاتىسۋ جولداماسىن تاپسىردى.
استانا ساپارىن ءساتتى اياقتاعان ونەرپاز بالالار مەن ۇستازدار 7 شىلدە كۇنى ۇلكەن قۋانىشپەن تۋعان ولكەسىنە اتتانىپ كەتتى.