كەشە حالىقارالىق كورمە بيۋروسىنىڭ (حكب) شتاب-پاتەرىندە ەكسپو جوباسىنىڭ قازاقستانداعى ۇلتتىق ۇيلەستىرۋشىسى, قازاقستان رەسپۋبليكاسى ءسىم-ءىنىڭ جاۋاپتى حاتشىسى ءراپىل جوشىباەۆ قازاقستان ۇكىمەتى اتىنان حكب-نىڭ باس حاتشىسى ۆيسەنتە لوسسەرتالەسقا 2017 جىلى استانادا ەكسپو-نىڭ مامانداندىرىلعان كورمەسىن وتكىزۋگە ءوتىنىم تاپسىردى. قازاقستان رەسپۋبليكاسىنىڭ فرانتسياداعى ەلشىسى نۇرلان دانەنوۆتىڭ قاتىسۋىمەن وتكەن بۇل ءراسىم 2008 جىلى ساراگوسا قالاسىندا (يسپانيا) ەكسپو-نىڭ حالىقارالىق مامانداندىرىلعان كورمەسىنە قاتىسقان كەزىندە تاياۋ بولاشاقتا استانادا كورمە ۇيىمداستىرۋ تۋرالى قازاقستان پرەزيدەنتى نۇرسۇلتان نازارباەۆتىڭ باستاماسىن ىسكە اسىرۋعا رەسمي تۇرعىدا جول اشىپ بەرىپ وتىر.
ر.جوشىباەۆ قازاقستان ەلورداسىندا ەكسپو-نى لايىقتى دەڭگەيدە وتكىزۋ تۋرالى رەسپۋبليكامىزدىڭ شىنايى نيەتىن راستادى, وسى باعىتتا دايىندىق جۇمىستارىن ۇيىمداستىرۋ بويىنشا قازاقستان ۇكىمەتى قابىلداعان شارالار تۋرالى حابارلادى: «ەكسپو-2017» سايلاۋالدى ناۋقانى جونىندەگى ۇيىمداستىرۋ كوميتەتى قۇرىلعان, قازاقستاندىق ءوتىنىمدى ۇيىمداستىرۋ جانە ىلگەرىلەتۋ جونىندەگى ۇلتتىق ۇيلەستىرۋشىنىڭ قىزمەت ورنى بەكىتىلگەن, ءتيىستى مينيسترلىكتەردە, ۆەدومستۆولاردا جانە ەلوردا اكىمدىگىندە وسى ماسەلە بويىنشا شتابتار قۇرىلعان, كورمەگە قاتىسۋشى ەلدەردىڭ كورمە پاۆيلوندارىن ورنالاستىرۋ ءۇشىن جەر ۋچاسكەلەرى بولىنگەن.
ۆ.لوسسەرتالەس قازاقستان تاراپىنىڭ قابىلداعان شارالارىنا قاناعاتتانعاندىعىن بىلدىرە وتىرىپ, استانانىڭ بىرقاتار باسىمدىقتارىنا نازار اۋداردى. ونىڭ پىكىرىنشە, ورتالىق ازيا اۋماعىنا تۇڭعىش رەت كورمە قوزعالىسىنىڭ تارالۋى ماڭىزدى بولىپ كورىنەدى. سونداي-اق, ول ەلدىڭ وراسان زور ەكونوميكالىق جانە عىلىمي الەۋەتى بار ەكەنىن, ونىڭ دامۋ يگىلىگى ءۇشىن پايدالانىلىپ جاتقان كۇش-قۋاتى مەن قارقىنىن اتاپ كورسەتتى. باس حاتشىنىڭ ءسوزى بويىنشا, قازاقستان ءوزىنىڭ حالىقارالىق بەدەلىن نىعايتا وتىرىپ, وڭىرلىك ءىرى فورۋمداردىڭ كوپشىلىك مويىنداعان ورتالىعىنا اينالۋدا. كورمەنىڭ ۇسىنىلىپ وتىرعان تاقىرىبى – «بولاشاق ەنەرگياسى» وراسان زور تابيعي ەنەرگيا قورلارى بار جانە جاھاندىق قاۋىپسىزدىك پەن تۇراقتىلىق جولىندا بولاشاق ۇرپاق ءۇشىن بالامالى ەنەرگەتيكانى دامىتىپ وتىرعان مەملەكەتتىڭ وسى ءبىر جالپى دۇنيەجۇزىلىك پروبلەمانى الدىڭعى كەزەكتەگى جوسپارعا ىلگەرىلەتۋىنە بايلانىستى نىشاندىق جانە وزەكتى مانگە يە.