پرەزيدەنت نۇرسۇلتان نازارباەۆ 2009 جىلدىڭ قىركۇيەك ايىندا وتاندىق عىلىمنىڭ وزەكتى ماسەلەلەرىنە ارناعان ءماجىلىس ءوتكىزىپ, عىلىمي ساياساتتى ايقىنداپ بەرگەن ەدى. سودان بەرگى ۋاقىت ءىشىندە بۇل سالادا ۇلكەن وزگەرىستەر بولدى. «عىلىم تۋرالى» زاڭ قابىلدانىپ, قولدانىسقا ەنگىزىلدى. وسى جەردە مەملەكەت باسشىسىنىڭ: «ەلدىڭ پەرزەنتتەرى رەتىندە ءبىلىم مەن عىلىم ىسىندە بىرىگىپ قيمىلداساق, شىعار شىڭىمىز ءارقاشان بيىك بولاتىنىنا ەشكىم دە ءشۇبا كەلتىرمەيدى» دەگەن ءسوزى ويعا ورالىپ وتىر. شىنىندا, عىلىمعا ەرەكشە ءمان بەرگەن ەلدەردىڭ ءوسىپ-وركەندەۋىنىڭ ەرەكشە بولاتىنىنا كوز جەتتى.
تاۋەلسىز ەلىمىزدىڭ عىلىمىنا وزىندىك ۇلەس قوسىپ وتىرعان ىرگەلى مەكەمەلەردىڭ ءبىرى – ۇلتتىق ينجەنەرلىك اكادەميا دەسەم, ارتىق ايتقاندىق ەمەس. بۇل عىلىم ورداسىنىڭ نەگىزىن قازاق ءبىلىم-عىلىمىنىڭ ايتۋلى وكىلى ومىربەك جولداسبەكوۆ قالاسا, قازىر ونىڭ بۇكىل باعىت-باعدارىن تەمىرقازىقتاي العا وزدىرىپ وتىرعان ءشاكىرتى, ءبىلىم جانە عىلىم ءمينيسترى, اكادەميك باقىتجان جۇماعۇلوۆ ەكەنىن ايتا كەتسەم دەيمىن. اتالمىش عىلىمي مەكەمە وسى كۇندەرى قازاق ەلىنىڭ ەكونوميكاسىنىڭ يندۋستريالىق-يننوۆاتسيالىق باعدارلاماسىن جۇزەگە اسىرۋعا كۇش جۇمىلدىرىپ وتىر. ءبىر عانا باتىس قازاقستان وبلىستىق فيليالى مۇناي جانە حيميا تەحنولوگياسى بويىنشا تىڭ ىزدەنىستەر جاساۋدا. اسىرەسە, وتانىمىزدىڭ يننوۆاتسيالىق جانە تەلەكوممۋنيكاتسيالىق جۇيەلەرى بويىنشا زەرتتەۋ جۇمىستارى جۇيەلى ءجۇرگىزىلۋ ۇستىندە. وعان جاستاردى تارتۋدى باستى ماقساتقا اينالدىرىپ وتىرمىز. سەبەبى, ەل عىلىمىنىڭ بولاشاعى سول جاستار ەكەنى بەلگىلى. بۇل ىستە باتىس قازاقستان وبلىسىنداعى يننوۆاتسيالىق جانە تەلەكوممۋنيكاتسيالىق ءجۇيەلەر ۋنيۆەرسيتەتىنىڭ زەردەلەۋ جۇمىستارى اتاپ وتۋگە تۇرارلىق. مەملەكەتىمىزدىڭ نەگىزگى باعىتى بولىپ سانالاتىن يندۋستريالىق-يننوۆاتسيالىق دامۋدى جۇزەگە اسىرۋدا عىلىمي-تەحنيكالىق باعدار العا شىقتى. جالپى, اقىل-ويدى تارتىپكە كەلتىرەتىن عىلىم, ونىڭ ىشىندە ءار ادامنىڭ ويلاۋىنا ەرەكشە ىقپال ەتەتىن ماتەماتيكانىڭ دا ءجونى بولەك. جوعارىدا ايتقان ءبىلىم ورداسى وسى جۇمىستارعا ەرەكشە نازار اۋدارۋدا. سەبەبى, باتىس وڭىرىندە ماتەماتيكا عىلىمى ەرەكشە ورىن الادى. ونىڭ كوشباسىندا وتكەن عاسىرداعى قازاقتىڭ ماتەماتيكا ءبىلىمىن ءبىر بەلەسكە كوتەرگەن اكادەميك اسان تايمانوۆ, بۇگىنگى پروفەسسور نۇرلان تەمىرعاليەۆ تۇر. بۇلاردىڭ ءىزىن باسقان جاستار دا ونداپ سانالادى.
قاراپ وتىرساڭىز, قازىرگى تاڭدا الەمدەگى شيكىزات كوزدەرىنىڭ ازايۋى, تابيعي تەپە-تەڭدىكتىڭ بۇزىلۋ سالدارىنان تابيعي اپاتتاردىڭ كوپتەپ ورىن الۋى ءبىزدى دە ويلاندىرىپ وتىر. بايلىقتىڭ ادامعا زالالسىز جاڭا ءتۇرىن تابۋ, اپاتتىڭ الدىن الىپ, جۇرتتى ۇرەيدەن قۇتقارۋ ۇلكەن ماسەلە دەسەك, ءبىزدىڭ اكادەميا وسى تەحنيكالىق باعىتتاعى عىلىمنىڭ, ونىڭ ىشىندە نانوتەحنولوگيا, بيوتەحنولوگيانى جەدەل دامىتۋ بويىنشا تەرەڭ مازمۇندى زەرتتەۋلەر باستادى. مۇنداي عىلىمي جۇمىستارعا ۇيىتقى بولىپ وتىرعان اكادەميانىڭ ۆيتسە-پرەزيدەنتى, اكادەميك ن.ءنادىروۆ, ا.ق ۇلىباەۆ, ا.تولەشوۆ جانە وزگە دە ازاماتتار.
سول سەكىلدى ۇلتتىق ينجەنەرلىك اكادەميانىڭ باتىس قازاقستان وبلىستىق بولىمشەسى يننوۆاتسيالىق جانە تەلەكوممۋنيكاتسيالىق جۇيەلەر ۋنيۆەرسيتەتىنىڭ ۇيىتقى بولۋىمەن, كورشى رەسەي ەلىنىڭ پەنزا وڭىرلىك يننوۆاتورلار وداعىنىڭ, سامارا اەروكوسموستىق ينستيتۋتىنىڭ قاتىسۋىمەن «ەۋرازيا وزەن ارنالارى», «عىلىم – ءبىلىم – پراكتيكا» مەندەلەەۆ جوباسىنا قاتىسۋشىلاردىڭ ءوزارا ءىس-ارەكەتىنىڭ ءبىرىنشى حالىقارالىق كونگرەسى وتكىزىلدى. مۇندا نەگىزىنەن يندۋستريالىق-يننوۆاتسيالىق ءماسەلەلەر تالقىعا ءتۇسىپ, عىلىمي جوبالار ۇسىنىلدى. مۇنىمەن قاتار, بولىمشە بيىلعى ءساۋىر ايىندا ماسكەۋدە وتكەن جەل ەنەرگەتيكالىق قوندىرعىلارى بويىنشا ءونەرتاپقىشتار مەن يننوۆاتسيالىق تەحنولوگيالار جاساۋشىلاردىڭ القالى جيىنىندا «ارحيمەد-2011» التىن مەدالىنا يە بولدى.
ءبىز تاياۋدا عىلىم-بىلىمگە دەن قويعان جاستارعا ارناپ, تەلەكونفەرەنتسيا وتكىزدىك. وندا ءححى عاسىردىڭ اقپاراتتاندىرۋ عاسىرى ەكەنى ايتىلدى. سول اقپاراتتاندىرۋ مەن تەلەكوممۋنيكاتسيا, بايلانىس سالالارىنا مامان دايىنداۋ ىسىندە جاراتىلىستانۋ عىلىمدارىنىڭ الاتىن ورنىن ءسوز ەتتىك. بۇل ءىس ەلباسى العا قويعان مىندەتتەردى جۇزەگە اسىرۋ ءۇشىن جاسالدى. ياعني, ەلىمىزدەگى يندۋستريالىق-يننوۆاتسيالىق دامۋ باعدارلاماسىن جۇزەگە اسىرۋشىلاردىڭ كوشباسىندا عىلىمي-تەحنيكالىق باعدارى بار ماماندار جۇرەتىنى بەلگىلى. سول ماماندىقتارعا ەل ىشىندەگى تالانتتى جاستاردى تارتۋ تەلەكونفەرەنتسياعا ارقاۋ بولدى. ءبىر سوزبەن ايتقاندا, عىلىم مەن ءبىلىمدى تەرەڭ مەڭگەرگەن ادامنىڭ اقىل-ويى جيناقى كەلەتىنىن ءومىر دامۋى كورسەتىپ وتىر.
اقسەرىك ءايتىموۆ, قر ۇلتتىق ينجەنەرلىك اكادەمياسى باتىس قازاقستان بولىمشەسىنىڭ توراعاسى, وبلىستىق ءماسليحاتتىڭ دەپۋتاتى.