كەشە استانادا «قازمۇنايگاز» بارلاۋ ءوندىرۋ» اق جۋرناليستەرگە ارناپ اشىق ەسىك كۇنىن وتكىزدى. «ءبو OPEN» شاراسى بارىسىندا كومپانيانىڭ توپ-مەنەدجەرلەرى باق وكىلدەرىن وتكەن جىلعى كورسەتكىشتەرىمەن جانە بولاشاق جوسپارلارىمەن تانىستىردى.
شارا بارىسىندا «قمگ» بارلاۋ ءوندىرۋ» اق باس ديرەكتورى اسقار بالجانوۆ كومپانيادا اتقارىلىپ جاتقان جۇمىستار جايىندا كەڭىنەن اڭگىمەلەدى. «قازمۇنايگاز» بارلاۋ ءوندىرۋ» اق قازاقستاندا مۇناي وندىرەتىن كومپانيالار ىشىندەگى كوشباسشىلاردىڭ ءبىرى ءارى قارا التىن ءوندىرۋ كورسەتكىشى بويىنشا 2-ورىندا. وتكەن جىلدىڭ سوڭىندا باسەكەلەستىكتى كۇشەيتۋ ماقساتىندا كومپانيا 2010-2020 جىلدارعا ارنالعان دامۋ ستراتەگياسىن بەكىتتى. وعان سايكەس, كومپانيا الدىندا تۇرعان مىندەتتەر وندىرىستىك قىزمەتتىڭ تيىمدىلىگىن ارتتىرۋ, گەولوگيالىق بارلاۋ, كاسپيدەگى تەڭىز مۇنايىن ءوندىرۋ جوباسىنا قاتىسۋ, سونداي-اق قازاقستان جانە ودان تىس اۋماقتاردا جاڭا كەن ورىندارىن يگەرۋ ەسەبىنەن وندىرىستىك بازانى كەڭەيتۋ بولىپ وتىر, دەيدى ول. سونداي-اق كومپانيانىڭ بيزنەستى دامىتۋ بويىنشا باسقارۋشى ديرەكتورى داستان ابدۋلعافاروۆ «قمگ» ءبو» اق-تىڭ قازاقستاندا جانە شەت ەلدەردەگى دامۋ ستراتەگياسى جونىندە ايتسا, كومپانيانىڭ باس ەكولوگى بازار ەسقوجا جۇرگىزىلىپ جاتقان بارلاۋ جۇمىستارى جانە پەرسپەكتيۆالى باعىتتار تۋرالى اڭگىمەلەدى. ال جۋرناليستەر تاراپىنان ەكسپورتتىق كەدەن سالىعى, سونداي-اق كومپانيانىڭ شەت ەلدەردەگى كەن ورىندارى تۋرالى سۇراقتار قويىلدى. اشىق ەسىك كۇنىندە جاريالانعان اقپاراتتار تۋرالى گازەتتىڭ الداعى نومىرلەرىندە كەڭىرەك جازاتىن بولامىز.
ۆەنەرا تۇگەلباي.