كەشە مەملەكەت باسشىسى نۇرسۇلتان نازارباەۆ الماتىداعى رەزيدەنتسياسىندا رەسەي فەدەراتسياسىنىڭ سىرتقى ىستەر ءمينيسترى سەرگەي لاۆروۆتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
كەزدەسۋدە ەكىجاقتى قارىم-قاتىناستاردى دامىتۋعا, سونداي-اق الدا استانادا وتەتىن شىۇ-عا مۇشە مەملەكەتتەر باسشىلارى مەرەيتويلىق سامميتىنە قاتىستى ماسەلەلەردىڭ كەڭ اۋقىمى تالقىلاندى.
– قازاقستان پرەزيدەنتى نۇرسۇلتان ءابىش ۇلى نازارباەۆپەن كەزدەسۋدە ءبىز شىۇ-عا مۇشە مەملەكەتتەر جانە بايقاۋشى مەملەكەتتەر پرەزيدەنتتەرى قاتىساتىن, استانادا 15 ماۋسىم كۇنى وتەتىن سامميتكە دايىندىقتىڭ قالاي ءجۇرىپ جاتقانى جونىندە ايتىپ بەردىك. ءبىز سىرتقى ىستەر مينيسترلەرى كەڭەسىنىڭ ماجىلىسىندە مەملەكەت باسشىلارىنىڭ قاراۋىنا شىعارىلاتىن بارلىق نەگىزگى قۇجاتتار جوباسىن ماقۇلداۋعا قول جەتكىزەمىز عوي دەگەن ۇمىتتە ەكەنىمىزدى ءبىلدىرىپ وتىرمىز. قازاقستان پرەزيدەنتى بۇگىن وسىنداي كوڭىل-كۇيدى قولداپ, شىۇ-نىڭ ونجىلدىق مەرەيتويى قاۋىپسىزدىك, ەكونوميكالىق دامۋ سالالارىن, گۋمانيتارلىق بايلانىستار سالاسىن قوسا العاندا, شانحاي ىنتىماقتاستىق ۇيىمى قىزمەتىنىڭ بارلىق سالالارداعى ىنتىماقتاستىعىن تەرەڭدەتۋ بويىنشا جاڭا, الىس بولاشاقتى مەڭزەگەن جوسپارلارعا تولى بولاتىنىنا سەنىم ءبىلدىردى. ءبىز استانادا 15 ماۋسىمدا وتەتىن جوعارى دەڭگەيدەگى كەزدەسۋگە جاقسى دايىندالۋ ءۇشىن ەرتەڭ وسى تولايىم كۇن ءتارتىبىن جۇزەگە اسىرۋعا ۇمتىلاتىن بولامىز, – دەدى جۋرناليستەرگە ارنالعان بريفينگتە س.لاۆروۆ.