ەلباسىنىڭ جولداۋىندا اتاپ كورسەتىلگەن ازىق-ت ۇلىك قاۋىپسىزدىگىن قامتاماسىز ەتۋ تاپسىرماسى وڭىردە ۇتىمدى قولعا الىنعان. ونى قاپشاعاي قالاسىنىڭ شىعىسىنداعى بەل-بەلەستى تەگىستەپ, جىلىجاي سالۋعا كىرىسكەن تەحنيكالاردىڭ قيمىلىنان كورۋگە بولادى.
جاڭا تەحنولوگياعا ساي جالپى اۋماعى 5,1 گەكتار جەرگە ءىرى نىسان تۇرعىزۋدى جوسپارلاعاندار ونىڭ كولەمىن 20 گەكتارعا دەيىن ارتتىرۋدى ماقسات ەتۋدە. جوبا ماقساتى – جىل بويى تۇتىنۋشىلاردى ەكولوگيالىق جاعىنان تازا كوكونىس ونىمدەرىمەن قامتۋ, قىزاناق شىرىنى مەن قياردىڭ جانە ءتۇرلى سالاتتاردىڭ اۋدانداستىرىلعان نيدەرلاندىلىق «De Ruiter Seeds» گەندىك تازا تابيعي ءتۇرىن ءوسىرۋ, جىلىجايدا ەڭبەك ەتەتىن كاسىبي ماماندار قاتارىن تولىقتىرۋ.
قاپشاعايداعى وسى جۇمىستارمەن تانىسۋ ءۇشىن اۋىل شارۋاشىلىعى ءمينيسترى اسىلجان مامىتبەكوۆ وتكەن بەيسەنبىدە وسى ءىستى باستاعان جشس باسشىسى الماس ءداۋىتوۆتەن ءوندىرىستىڭ دامۋىنا قاتىستى ماسەلەلەردى ورتاعا سالدى. سەرىكتەستىك جىلدىڭ ءتورت مەزگىلىندە كۇن ساۋلەسى مولىنان تۇسەتىن وڭتايلى وسى مەكەندى تاڭداعانى ءارى ۇلكەن مەگاپوليس قالاعا ءونىمدى تاسىمالداۋعا قولايلى ەكەندىگىن ءسوز ەتتى.
جىلىجايدا قالا بازارلارىنا جونەلتەتىن كوكونىس كولەمى – جىلىنا 1400 توننا تومات, 2700 توننا قيار جانە 100 توننا سالات ونىمدەرى تۇتىنۋشىلاردىڭ جوعارى تالعامىنان شىعاتىنىنا كۇمان جوق. سەرىكتەستىكتىڭ الماتى بازارلارىنداعى ۇلەسىن توعىز پايىزعا جەتكىزۋ دە الداعى باستى مىندەت رەتىندە قارالۋدا. اتالعان جوباعا 2 ملرد. 411 ملن. 489 مىڭ تەڭگە ينۆەستيتسيا تارتۋ كوزدەلگەن. ونىڭ ىشىندە سەرىكتەستىكتىڭ ءوز قارجىسى 361 ملن. 723 مىڭ تەڭگەنى قۇراسا, 2 ملرد. 289 ملن. 400 مىڭ تەڭگە قازاگروقارجى ارقىلى قارجىلاندىرىلادى.
جىلىجايدىڭ جەكە مەتەوستانساسى جابدىقتالىپ, ەلەكتروندى-كليماتتى باقىلاۋ اۆتوماتتاندىرىلعان جۇيە بويىنشا جۇمىس ىستەمەكشى. جىلىجايدىڭ ىشكى اۋماعىن جىلىتۋ مەن سالقىنداتۋ دا وسى تاسىلمەن جۇزەگە اسپاق. ءونىمدى ءوسىرۋ بارىسىندا تىڭايتقىش پەن مينەرالدار دا اۆتوماتتى تۇردە ەنگىزىلىپ, تامشىلاتا سۋارۋ ادىسىمەن جالعاسادى. ءونىمدى ساقتاۋعا جوعارى قىسىممەن تۇمان تۋىنداتۋ جۇيەسى قولدانىلادى دەپ جوسپارلانعان. ىرگەلى ىستەردىڭ بارلىعىنا قاجەتتى قۇرال-جابدىقتاردى نيدەرلاندىنىڭ «DALSEM» كومپانياسى جەتكىزگەن.
مينيستر شەڭگەلدى الابىنداعى ەگىستىك القاپتارىن ارالاپ, تامشىلاتا سۋارۋ ءتاسىلىنىڭ ناقتى ناتيجەلەرىمەن تانىستى. سودان سوڭ «نۇر اگرو» جانە «جەتىسۋ اگرو» سەرىكتەستەرىندە بولىپ, ءوندىرىستىڭ بۇگىنگى باعىتىن باعالادى.
وبلىستا اۋىل شارۋاشىلىعى الەۋەتىنىڭ جوعارى ەكەندىگى بەلگىلى. ونىڭ ۇستىنە ايماقتىڭ اۋىل شارۋاشىلىعى ونىمدەرىنە دەگەن سۇرانىسى جىل سايىن ارتا تۇسۋدە. شەڭگەلدىدەگى كوكونىس ساقتايتىن قويمانىڭ تيىمدىلىگىن پايدالانۋ نەگىزىندە الداعى كەزدە شىرىن وندىرەتىن زاۋىت سالىناتىنىن دا ايتقان ءجون.
حالىقتى تازا ازىق-ت ۇلىكپەن قامتۋ – بۇگىنگى كۇننىڭ وزەكتى ءماسەلەسى. اسىرەسە, ەگىستىك القاپتارىنىڭ تيىمدىلىگىنە قول جەتكىزۋ قولعا الىنعانى قۋانتادى. ءويتكەنى, ەلىمىزدە پايدالانىلماي جاتقان ەگىستىك جەرلەردىڭ, اسىرەسە سۋارمالى القاپتاردىڭ جەتكىلىكتى ەكەنى جاسىرىن ەمەس. شارۋالار العان جەرلەرىن وڭدەپ, ەل يگىلىگىنە ۇسىنسا, قۇبا-قۇپ. وعان وسى جولعى جۇمىس بارىسىندا كوز جەتتى.
كۇمىسجان بايجان.
الماتى وبلىسى .