باسىلىمنىڭ العاشقى سانىندا قازاق جەرىن توتاليتارلىق تار زاماندا بولشەكتەپ قۇرتپاقشى بولعان كسرو باسشىسى ن.س.حرۋششەۆتىڭ سۇرقيا ساياساتىنان ەلىمىزدىڭ سولتۇستىك بولىگىن سول كەزەڭدە قازاق كسر مينيسترلەر كەڭەسىنىڭ توراعاسى بولعان جۇمابەك تاشەنوۆتىڭ قالاي قورعاپ قالعانى جايلى ناقتى دەرەكتەر كەلتىرىلگەن.
«ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسىنداعى «تۋعان جەر» باعدارلاماسى جالپى ۇلتتىق ءپاتريوتيزمنىڭ ناعىز وزەگىنە اينالادى, ءبىز جات يدەولوگيالارعا ءوزىمىزدىڭ ۇلتتىق قۇندىلىقتارىمىز ارقىلى عانا توتەپ بەرە الامىز», دەگەن سوزدەرىنە وراي, حالقىمىزدىڭ رۋحاني مۇراسىن جاڭعىرتۋعا اتسالىسۋ قاي-قايسىمىزدىڭ دا مىندەتىمىز. ءبىز وتانىمىزعا ادال قىزمەت ەتۋ جولىندا 1954-56 جىلدارى قازاقستاننىڭ سولتۇستىك-تەرىسكەي 6 وبلىسىن رەسەيگە قوسىلىپ كەتپەۋى ءۇشىن جوعارى لاۋازىمدى قىزمەتىن تارك ەتىپ قورعاپ قالعان جۇمابەك تاشەنوۆتەي ەل مەن جەر ءۇشىن كۇرەسكەن قايراتكەرلەردى ۇزبەي ناسيحاتتاۋعا ءتيىسپىز», – دەدى اكادەميك مەڭدىباي مىرزاحمەتوۆ جيىن بارىسىندا.
«جۋرنالدى اشۋداعى باستى ماقساتىم – جاستاردى پاتريوتتىققا تاربيەلەۋ, مەملەكەت تىرەگى – ۇلت رۋحىن كوتەرۋ. جۇمابەك تاشەنوۆتىڭ وتان الدىنداعى پارىزىن ادال ورىنداعانىن جانە سونداي ۇلت قاھارماندارىنىڭ ءومىر جولدارىن, ەل مەن جەرگە سىڭىرگەن ەرەن ەڭبەكتەرى مەن وراسان ەرلىكتەرىن جۇرتشىلىققا پاش ەتۋ», – دەدى جۋرنالدى شىعارۋشى ءارى رەداكتورى ەرتىس نۇرقاسىم. ال جۋرنالدىڭ جاۋاپتى حاتشىسى ايىم ارعىنتەگى «جۋرنالىمىزدىڭ ءبىرىنشى سانى مىڭ دانامەن باسىلدى. حالىق تاراپىنان ۇلكەن قىزىعۋشىلىق تۋىنداپ وتىر. الداعى ساندارىن مىڭنان اسىراتىنىمىز انىق. «جۇمابەك جولى» جۋرنالىنىڭ جازىلۋ يندەكسى – 74967. وسى شاراعا بەلسەنە قاتىسقان عالىم اعالارىمىز بەن اپايلارىمىزعا, ۇيىمداستىرعان كىتاپحانا قىزمەتكەرلەرىنە كوپ راحمەت», – دەپ ءوز ريزاشىلىعىن جەتكىزدى.
«جۇمابەك جولى» جۋرنالى تەك جۇمابەك احمەت ۇلىنىڭ ءومىر جولىمەن عانا شەكتەلمەي, وتانىمىزدى قورعاۋدا ەرلىكتەرىمەن, ونەگەلى ىستەرىمەن كوپشىلىككە ۇلگى بولعان وزگە دە الىپ تۇلعالار جايلى ەستەلىكتەردى جاستار جادىندا جاڭعىرتىپ وتىرۋدى كوزدەيتىنىن ايتقان جۋرنال باسشىلىعى مەملەكەت باسشىسىنىڭ ەلىمىزدىڭ رۋحاني جاڭعىرۋىنا باعىتتالعان باستاماسى بويىنشا قوعام جانە مادەنيەت قايراتكەرلەرىنىڭ تاعىلىمدى ومىرلەرى تۋرالى دا كوپتەپ قالام تەربەيتىندەرىن جەتكىزدى.
قابدەش ءجۇمادىلوۆ اقساقال باستاعان جازۋشى-جۋرناليستەر قاۋىمى, تاريحشى سەرىكقازى حاسەنوۆ, الماتى قالالىق «توسپا سۋ» كوممۋنالدىق سۋ شارۋاشىلىعىنىڭ باسشىسى نۇريددين جاربولوۆ, كينورەجيسسەر قاليلا وماروۆ سىندى زيالىلار قاتىسىپ, پىكىر بىلدىرگەن جيىندا تەك جەر ماسەلەسىندە عانا ەمەس, ۇلتتىڭ ءتىلى, رۋحى سانالاتىن باسىلىمدار ءۇشىن دە تەڭدەسسىز ەرلىكتەر جاساعان, زيالى قاۋىمعا بارىنشا قامقور بولعان, قاراپايىم ەڭبەك ادامدارىنا ءاردايىم جاناشىرلىق تانىتقان تاشەنوۆ تۇلعاسىنىڭ قىر-سىرى كەڭىنەن ءسوز بولدى.
ميرا بايبەك,
«ەگەمەن قازاقستان»
الماتى