قار بيىل وتە كوپ تۇسكەندىكتەن, تاسقىننىڭ ەكپىنى تىم قاتتى. جورامالداعىدان دا اسىپ ءتۇستى. سىيىمدىلىعى 693 ميلليون تەكشە مەتردى قۇرايتىن سەرگەەۆ سۋ قويماسىنا ەكى ەسەگە ارتىق سۋ جينالدى. اقمولا وبلىسىنان كەلگەن مول سۋ اسا جايسىزدىق تۋدىرۋدا. قاجەتتى بارلىق شارالاردى قولدانۋدىڭ ارقاسىندا شال اقىن مەن ەسىل اۋداندارىندا جاعداي تۇراقتانداندى.
«ءۇش كۇننىڭ ىشىندە ەسىل وزەنىنىڭ ارناسىنداعى سۋ 1 مەتر 70 سانتيمەترگە كوتەرىلدى. كوتەرىلگەن سۋ دەڭگەيىنىڭ بيىكتىگى سونشالىق, بىلعارى زاۋىتى ىقشام اۋدانىنداعى جاڭا بوگەتتەن 10 سانتيمەتر اسىپ كەتتى. ەسكى بوگەتتىڭ ۇزىندىعى – 1 شاقىرىم 700 مەتر. ونى كوتەرۋمەن اينالىسىپ جاتىرمىز. وزەن ارناسىندا ورنالاسقان تۇرعىن ۇيلەردى تاسقىن سۋدان قورعاۋ ءۇشىن بوگەتتىڭ ۇزىندىعىن 4 شاقىرىمعا دەيىن ۇزارتاتىن بولامىز», – دەدى ايماق باسشىسى. قازىرگى باستى مىندەت كەنت تۇرعىندارىن قاۋىپسىز جەرگە كوشىرۋ ەكەندىگىن اتاپ ايتتى.
م ۇلىكتەردى دە, تۇرعىنداردى دا قاۋىپسىز ورىنعا تاسىمالدايتىن قايىق تا, تەحنيكا دا, ادام كۇشى دە جەتكىلىكتى. الايدا, كەيبىر تۇرعىنداردىڭ كوشكىسى كەلمەيتىن جەكەلەگەن وقيعالار كەزدەسىپ قالادى
«مەن ۋچاسكەلىك ينسپەكتورلارمەن بىرلەسە وتىرىپ, ءتۇنى بويى كەزەكشىلىك اتقارىپ شىقتىم», – دەيدى ناتاليا چوربا.
مامانداردىڭ ايتۋىنشا, سۋ تاسقىنىنىڭ شارىقتاۋ شەگى ءالى اياقتالماعان. ەكىنشى تولقىن كەلەدى دەپ كۇتىلۋدە.
شۇعىل شەشىمدەر قابىلداۋ ءۇشىن پەتروپاۆل اۋماعىندا توتەنشە جاعداي رەجىمى جاريالاندى. ءسويتىپ, بارلىق كۇش-جىگەر ادامدارعا كومەكتەسۋگە, جەكەلەگەن ماسەلەلەردى دەرەۋ شەشۋگە, قارجىلىق جاعىنان قامتاماسىز ەتۋگە باعىتتالعان.
ءومىر ەسقالي, «ەگەمەن قازاقستان» سولتۇستىك قازاقستان وبلىسى