بالكىم, كەزدەيسوق سايكەستىك شىعار, 22 ناۋرىز كۇنى, كۇن مەن ءتۇن تەڭەسكەن كۇنى بەلورۋسسيا ەۋرووداق ەلدەرىنىڭ ءوزدەرىنە قارسى ديپلوماتيالىق شارالارىنا جاۋاپ رەتىندە ولاردىڭ رۇقساتىنسىز ەلگە كەلمەيتىن ءبىراز رەسمي ادامدارىنىڭ ءتىزىمىن جاريالادى. ءسويتىپ, تىيىم سالۋ شارالارى تەڭەستى.
بۇل ءوزى ءبىرازدان بەرى ءجۇرىپ جاتقان «ديپلوماتيالىق سوعىس». ءبىر كەزدە مينسك ءوز ساياساتىن سىناعان باتىس ەلدەرىنىڭ ەلشىلەرىن ءتۇرلى جەلەۋلەردى العا توسىپ, قۋىپ شىققانى دا بار بولاتىن.
بەلورۋسسيا تاراپىنان باتىستىڭ ولشەمىنە ساي كەلمەيتىن ارەكەتتەر بولا قالسا, اسىرەسە قىراعى قاراپ وتىراتىن ونىڭ باتىستاعى كورشى ەلدەردىڭ, ەڭ الدىمەن پولشانىڭ ساياساتشىلارى كورە قالادى. باتىستىڭ ولشەمىنە سىيمايتىن باستى نارسە – الەكساندر لۋكاشەنكونىڭ ۇزاق جىلدار بويى بيلىكتە وتىرعانى جانە ونىڭ وپپوزيتسياعا قارسى كۇرەسى. مۇنى وپپوزيتسيا دا پايدالانادى. بيلىك تاراپىنان قىسىم كورسە نەمەسە سولاي كورسەتكىسى كەلسە, بايبالام سالادى, ونى باتىس جاقسى ەستيدى.
«ديپلوماتيالىق سوعىستىڭ» سوڭعى كۇشەيگەن كەزى – وتكەن جىلعى جەلتوقساندا بولعان پرەزيدەنت سايلاۋى. سايلاۋ ناۋقانى كەزىندە دە, ول وتكەن تۇستا دا بيلىك وپپوزيتسيادان زاڭعا تومپاق كەلەتىن ارەكەتتەرگە بارماۋدى تالاپ ەتتى. كەرىسىنشە, وپپوزيتسيا بيلىك ءوز ارەكەتتەرىن شەكتەدى, زاڭسىز ارەكەتكە باردى دەپ بيلىكتى ايىپتادى. ونىڭ اياعى سايلاۋ بولعان كۇنى, ءالى داۋىس بەرۋ سانالماي جاتقان كەزدە وپپوزيتسيا وكىلدەرى قارسىلىق ارەكەتتەرىن وتكىزدى. مۇنداي ارەكەتتەردىڭ زاڭسىز ەكەنىن كۇنى بۇرىن ەسكەرتكەن بيلىك وپپوزيتسيا وكىلدەرىن, ءبىرشاما ساياسي پارتيالاردىڭ باسشىلارىن قاماۋعا الدى. بۇل بەلورۋسسيا مەن باتىستىڭ اراقاتىناستارىن مىقتاپ شيەلەنىستىردى.
سوندا اسىرەسە ەۋروپارلامەنت, ونىڭ توراعاسى ەجي بۋزەك, سونداي-اق دەپۋتات ياتسەك پروتاسەۆيچ ەرەكشە بەلسەندىلىك تانىتقان. پارلامەنت توراعاسى بەلورۋسسياعا قاتتى-قاتتى سىندار ايتىپ, 19 جەلتوقسانداعى مينسكىدەگى سانكتسيالانباعان ميتينگىگە قاتىسقانداردىڭ بارلىعىن بوساتىپ, ولارعا تاعىلعان ايىپتى الىپ تاستاۋدى تالاپ ەتتى. كەيىنىرەك 2011 جىلعى 12 قاڭتارداعى ەۋروپارلامەنتتىڭ بەلورۋسسيا جونىندەگى كوميتەتىندە (وسىنداي دا كوميتەت بار!) رەسمي مينسكىگە قاتىستى ەۋروپارلامەنتتىڭ ساياساتىن ءوزگەرتۋ جونىندە ۇسىنىس تا جاساعان.
وسىدان كەيىن قاڭتاردىڭ اياعىندا بەلورۋسسيانىڭ پرەزيدەنتى الەكساندر لۋكاشەنكودان باستالاتىن ەۋروپا ەلدەرىنە ءجانە اقش-قا بارۋعا تىيىم سالىنعان رەسمي ادامداردىڭ «قارا ءتىزىمى» جاسالدى. وعان كىرگەندەر سانى – 160. سونداي-اق ولاردىڭ قارجىلىق اكتيۆتەرى دە جابىلدى.
مينسك تاراپىنان ارنايى شاقىرۋ بولمايىنشا بەلورۋسسياعا كەلۋگە تىيىم سالىنعانداردىڭ «قارا ءتىزىمىن» بەلارۋستار باتىستىڭ سول ارەكەتتەرىنە جاۋاپ دەپ ەسەپتەيدى. بۇل تىزىمدە دە 150-دەن استام ادام بار. ءسىم ءباسپاسوز حاتشىسى اندرەي ساۆينىح ءمالىمدەگەندەي, «بەلورۋسسيا رەسپۋبليكاسى ەو مەن اقش-تىڭ كەز-كەلگەن ارەكەتتەرىنە جاۋاپ رەتىندە ءوزىنىڭ شەكتەۋ ارەكەتتەرگە قۇقىن ساقتايدى». «قارا تىزىمگە» ەنگەندەر تەڭەستى. بۇدان ەسەپ تۇگەلدەندى مە؟ بۇلاردىڭ ءبىرىن-ءبىرى مۇقاتۋدان تاپقان پايداسى بار دەپ ەشكىم ايتا قويماس.
ماماديار جاقىپ.