ەلىمىز پارلامەنتى ءماجىلىسى ءتوراعاسىنىڭ ورىنباسارى ۆلاديمير بوبروۆ قازاقستانعا ارنايى ساپارمەن كەلگەن كوشى-قون جونىندەگى حالىقارالىق ۇيىم (كحۇ) باس ديرەكتورىنىڭ ورىنباسارى لاۋرا تومپسون حانىممەن جۇزدەستى, دەپ حابارلادى وسى پالاتانىڭ ءباسپاسوز قىزمەتى.
ۆ.بوبروۆ قازاقستان كوشى-قون ماسەلەسىنە ايرىقشا ءمان بەرەتىنىن جەتكىزدى. ەلىمىز كوشى-قونعا قاتىستى كەلىسىمدەر بويىنشا ءوز مىندەتتەرىن ورىنداپ كەلە جاتقانىن ايتتى. «قازاقستاندا ەتنوستىق قازاقتاردىڭ اتاجۇرتىنا ورالۋىنا باسىمدىق بەرىلگەن. سوعان وراي 2009-2011 جىلداردى قامتىعان «نۇرلى كوش» باعدارلاماسى ومىرگە كەلدى جانە ءوز ناتيجەسىن بەرۋدە. ورالمانداردىڭ جاڭا ورىندارعا قونىستانۋىنا, جۇمىسپەن قامتىلۋىنا ءمان بەرىلۋدە», – دەدى ءماجىلىسى توراعاسىنىڭ ورىنباسارى.
ايتا كەتۋ كەرەك, قازاقستان – ءار ءتۇرلى تاريحي الماعايىپ زامانداردا شەتەلگە اۋىپ كەتكەن باۋىرلارىن ءوز اتامەكەنىنە شاقىرعان جانە كوشى-قون ساياساتىن دۇرىس جۇرگىزىپ وتىرعان ساناۋلى ەلدەردىڭ ءبىرى. 1993 جىلدان بەرى قانداستارىمىزدىڭ اتاجۇرتىنا ءبىرجولا كوشىپ كەلۋى كۆوتا بويىنشا جۇزەگە اسىرىلۋدا. مەملەكەت باسشىسىنىڭ تاپسىرماسىنا ءسايكەس, 2009 جىلدان باستاپ جىلىنا 20 مىڭداي وتباسىنىڭ قونىس اۋدارۋىنا كۆوتا ءبولىنىپ كەلەدى. 1991 جىلدان 2009 جىلعا دەيىن ەلىمىز 789,3 مىڭ ەتنوستىق قازاقتاردى قابىلدادى.
بۇگىنگى تاڭدا قازاقستان پارلامەنتى ماجىلىسىندە «كوشى-قون تۋرالى» جاڭا زاڭ جوباسى تالقىلانىپ جاتىر.
ءوز كەزەگىندە لاۋرا تومپسون حانىم كوشى-قون ماسەلەسىن رەتتەپ بولدىم دەيتىن بىردە-ءبىر مەملەكەت جوق ەكەنىن, بارلىق جاعدايدى جاساعان كۇننىڭ وزىندە ماسەلەلەر تۋىنداپ وتىراتىنىن ايتتى. سوندىقتان كوشى-قونعا قاتىستى كۇن ءتارتىبىندەگى ءماسەلەلەردى ءتيىمدى جولمەن شەشۋ قاجەت. بۇرىن كوپتەگەن ەلدەر كوشى-قونعا قاۋىپسىزدىك ماسەلەسى تۇرعىسىنان قاراعان. بۇگىنگى تاڭدا ونىڭ الەۋمەتتىك جانە ەكونوميكالىق جاعى دا ەسكەرىلىپ وتىر.
كەزدەسۋدە تاراپتار كوشى-قون ماسەلەسىن جان-جاقتى قاراستىرۋ, زاڭ جولدارىمەن رەتتەۋ تۋرالى پىكىر الماستى. وسى ورايدا الداعى ۋاقىتتا قازاقستاننىڭ كوشى-قون جونىندەگى حالىقارالىق ۇيىممەن اراداعى ىنتىماقتاستىق بايلانىستى دامىتۋدىڭ ماڭىزدىلىعى ءسوز بولدى.
وسى كەزدەسۋگە اتالعان ۇيىم تارابىنان كحۇ-نىڭ قازاقستان, قىرعىزستان, تاجىكستان جانە وزبەكستانداعى ميسسياسىنىڭ جەتەكشىسى, كحۇ-نىڭ ورتالىق ازياداعى ۇيلەستىرۋشىسى زلاتكو زيگيچ, كحۇ-نىڭ قازاقستانداعى ميسسياسى جەتەكشىسىنىڭ ورىنباسارى پاۆەل شالۋس, كحۇ-نىڭ ۇلتتىق باعدارلاماسىنىڭ ۇيلەستىرۋشىسى سۆەتلانا بەكمامبەتوۆا, ال قازاقستان تاراپىنان ءماجىلىستىڭ الەۋمەتتىك-مادەني دامۋ كوميتەتىنىڭ ءتورايىمى دينار نوكەتاەۆا, زاڭناما جانە سوت-قۇقىقتىق رەفورما كوميتەتىنىڭ حاتشىسى سۆەتلانا بىچكوۆا, ەكولوگيا ماسەلەلەرى جانە تابيعات پايدالانۋ كوميتەتىنىڭ مۇشەسى ايتكۇل ساماقوۆا, الەۋمەتتىك-مادەني دامۋ كوميتەتىنىڭ مۇشەسى جاراسباي سۇلەيمەنوۆ قاتىستى.