كەشە قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ ەۋروپا كەڭەسى پارلامەنتتىك اسسامبلەياسىنىڭ پرەزيدەنتى ماۆليۋت چاۆۋشوعلۋمەن تەلەفون ارقىلى سويلەستى, دەپ حابارلادى قر ءسىم-ءىنىڭ ءباسپاسوز قىزمەتى.
اڭگىمەلەسۋشى تاراپتار قازاقستان مەن ەۋروپا كەڭەسىنىڭ پارلامەنتتىك اسسامبلەياسى اراسىنداعى ىنتىماقتاستىق ماسەلەلەرىن جانە ونىڭ نىعايۋى مەن كەڭەيۋىن تالقىعا سالدى.
3 ءساۋىر كۇنى قازاقستان رەسپۋبليكاسىنىڭ كەزەكتەن تىس پرەزيدەنتتىك سايلاۋى ەلدىڭ دەموكراتياعا قاراي جاساعان ماڭىزدى قادامى دەپ تانيمىز, دەدى ءوز سوزىندە م.چاۆۋشوعلۋ. وسىعان بايلانىستى ەۋروپا كەڭەسىنىڭ پارلامەنتتىك اسسامبلەياسى سايلاۋدى بايقاۋعا ءوز تاراپىنان ارنايى دەلەگاتسيا جولداۋعا شەشىم قابىلداپ وتىر.
ءوز كەزەگىندە ق.ساۋداباەۆ اڭگىمەلەسۋشى تاراپقا قابىلداعان شەشىمى ءۇشىن العىسىن جەتكىزە وتىرىپ, الداعى سايلاۋعا حالىقارالىق قوعامداستىق وتە ۇلكەن كوڭىل ءبولىپ وتىرعانىن اتاپ ءوتتى. ەقىۇ ادام قۇقىقتارى جونىندەگى بيۋروسى, تمد اتقارۋشى كوميتەتى, ۇجىمدىق قاۋىپسىزدىك شارتى ۇيىمى پارلامەنتتىك اسسامبلەياسى, يكۇ, شىۇ جانە باسقا دا حالىقارالىق ۇيىمدار ءوز بايقاۋشىلارىن جولداپ وتىرعانى وسىنىڭ ايقىن دالەلى بولىپ تابىلادى. سونىمەن قاتار, سىرتقى ساياسات ۆەدومستۆو باسشىسى قازاقستاندا ولاردىڭ جۇمىس جاساۋىنا جانە سايلاۋدى حالىقارالىق تالاپتارعا ساي وتكىزۋگە تولىق جاعداي جاسالعانىن ەرەكشە اتاپ ايتتى.
ءماجىلىس بيۋروسىنىڭ كەزەكتى وتىرىسى
كەشە پارلامەنت ءماجىلىسىنىڭ توراعاسى ورال مۇحامەدجانوۆتىڭ جەتەكشىلىگىمەن پالاتا بيۋروسىنىڭ كەزەكتى وتىرىسى ءوتتى. وندا ءماجىلىستىڭ جالپى وتىرىسىنا شىعارىلاتىن ماسەلەلەر سارالاندى.
پالاتانىڭ حالىقارالىق ىستەر, قورعانىس جانە قاۋىپسىزدىك كوميتەتى دەپۋتاتتاردىڭ تالقىسىنا ءبىر توپ زاڭ جوبالارىن ۇسىندى. اتاپ ايتقاندا, «پاتەنت قۇقىعى تۋرالى شارتتى راتيفيكاتسيالاۋ تۋرالى», «شانحاي ىنتىماقتاستىق ۇيىمىنا ءمۇشە مەملەكەتتەردىڭ تەرروريزمگە قارسى قۇرالىمدارى ءۇشىن كادرلار دايارلاۋ تۋرالى كەلىسىمدى راتيفيكاتسيالاۋ تۋرالى», سونداي-اق «قازاقستان رەسپۋبليكاسى مەن يتاليا رەسپۋبليكاسى اراسىنداعى ستراتەگيالىق ءارىپتەستىك تۋرالى شارتتى راتيفيكاتسيالاۋ تۋرالى» زاڭ جوبالارى بار.
بيۋرو وتىرىسىندا 27-29 ناۋرىز ارالىعىندا پاۆلودار وبلىسىندا يندۋستريالىق ساياساتتىڭ وزەكتى ماسەلەلەرى بويىنشا ءماجىلىستىڭ ەكونوميكالىق رەفورما جانە وڭىرلىك دامۋ كوميتەتىنىڭ كوشپەلى وتىرىسىن وتكىزۋ تۋرالى قاۋلى قابىلداندى.
سونىمەن قاتار, بيۋرو وتىرىسىندا ۇكىمەتتەن كەلىپ تۇسكەن جاڭا زاڭ جوبالارىنا قورىتىندى ازىرلەۋ ماسەلەلەرى قارالدى.
«ەگەمەن-اقپارات».