ەل تاۋەلسىزدىگىنىڭ شيرەك عاسىرلىق مەرەيتويىنا وراي ءوتىپ جاتقان وبلىستاردىڭ ەلورداداعى كۇندەرىن اقمولا وبلىسى قورىتىندىلاماق. ارقا تورىندەگى ايماق قاراشا ايىنىڭ سوڭعى كۇندەرى استانادا ءتۇرلى مادەني, رۋحاني جانە سپورتتىق شارالار, اۋىلشارۋاشىلىق تاۋارلارىنىڭ جارمەڭكەسىن وتكىزەدى.
«قۋاتتى ءوڭىر – قۋاتتى قازاقستان» اكتسياسىنىڭ اياسىندا باس قالاعا ات باسىن بۇرعان وبلىس دەلەگاتسياسى ەلوردا تۇرعىندارىنا ايماقتىڭ سوڭعى 25 جىل ىشىندە ءار سالادا قول جەتكىزگەن جەتىستىكتەرىن پاش ەتۋگە نيەتتى. ول تۋرالى وبلىس اكىمىنىڭ ورىنباسارلارى كەشە ورتالىق كوممۋنيكاتسيالار قىزمەتىندە وتكەن بريفينگتە دە بايانداپ بەرگەن ەدى.
اقمولا وبلىسىنداعى وڭىرلىك جالپى ءونىم كولەمى سوڭعى 10 جىلدا 11 ەسەگە ءوسىپ, 1,2 تريلليون تەڭگەگە جەتىپتى. ونەركاسىپ ونىمدەرىنىڭ ۇلەسى دە 10 ەسەگە ۇلعايىپ, 335 ميلليارد تەڭگەنى قۇراعان. وبلىس اكىمىنىڭ ءبىرىنشى ورىنباسارى قادىرحان وتاروۆتىڭ ايتۋىنشا, وبلىستا سوناۋ كەڭەستىك كەزەڭدە اشىلعان ءىرى-ءىرى جيىرما ءوندىرىس ورنىنىڭ توقسانىنشى جىلدارداعى قيىن ۋاقىتتا دا, ودان كەيىنگى بولعان داعدارىستار كەزىندە دە جابىلىپ قالۋىنا جول بەرىلمەگەن. سونىڭ ارقاسىندا بۇگىندە اقمولانىڭ ەكونوميكالىق الەۋەتى ءار سالانى قامتيدى دەۋگە بولادى.
– يندۋستريالىق-يننوۆاتسيالىق باعدارلامانى جۇزەگە اسىرۋ اياسىندا 174 ميلليارد تەڭگەگە 70 جوبا ىسكە قوسىلدى. زاماناۋي تەحنيكامەن جاراقتالعان, ءوندىرىس بارىسى دا, ءونىم ساپاسى دا الەمدىك ستاندارتتارعا ساي كەلەتىن زاۋىت-فابريكالار اشىلدى. سيرەك كەزدەسەتىن مەتالل كونتسەنتراتتارى, قۇيما بۇيىمدار, پوليپروپيلەننەن جاسالعان زاتتار, سويا مايى سىندى بۇرىن وندىرىلمەگەن جاڭا ءدۇنيەلەر شىعارىلا باستادى. سونىڭ ارقاسىندا وڭدەۋشى ونەركاسىپتىڭ ۇلەسى 3 ەسەگە ۇلعايدى, – دەدى ق.وتاروۆ.
ونىڭ ايتۋىنشا, «قازاقالتىن», «التىنتاۋ كوكشەتاۋ» سىندى التىن ءوندىرۋشى كاسىپورىندار ەكسپورتقا شىعارىلاتىن ونىمدەردىڭ كولەمىن جىل سايىن ارتتىرىپ, وبلىستىڭ عانا ەمەس, رەسپۋبليكانىڭ مەتاللۋرگيا ونەركاسىبىنىڭ دامۋىنا سەرپىن بەرۋدە. اتالعان كاسىپورىندار 2015 جىلى 20 توننا التىن ءوندىرىپ, 2009 جىلعى كورسەتكىشتى 10 ەسەگە ارتىعىمەن ورىنداپتى. وسىلايشا, اقمولا وبلىسىنداعى التىن ءوندىرۋشى كومپانيالاردىڭ ۇلەسى رەسپۋبليكا بويىنشا وندىرىلگەن ءونىمنىڭ 35 پايىزىن قۇراعان.
ءباسپاسوز ءماسليحاتىندا وبلىس اكىمدىگىنىڭ باسشىلىق وكىلدەرى ءوڭىردىڭ جەتكەن جەتىستىكتەرىن بايانداپ قانا قويماي, جۋرناليستەردىڭ ساۋالدارىنا جاۋاپ بەردى. سوڭعى بىرەر ايدىڭ ىشىندە تسەلينوگراد اۋدانى قوسشى اۋىلىنداعى كوپ قاباتتى تۇرعىن ۇيلەردىڭ سۋسىز قالعانى تۋرالى رەسپۋبليكالىق باق-تار حابارلاعان بولاتىن. وبلىس اكىمىنىڭ ورىنباسارى نۇرلان نۇركەنوۆتىڭ ايتۋىنشا, قازىر تۇرعىن ۇيلەرگە سۋ جەتكىزىلگەن. بۇل ماسەلە 2017 جىلدىڭ باسىندا تۇبەگەيلى شەشىمىن تاپپاق.
– قازىر 18 ۇڭعى قازىلاتىن جەردە جۇمىس باستالىپ كەتتى. وسى ۇڭعىلاردىڭ ارقاسىندا الداعى جىلدىڭ ءبىرىنشى توقسانىندا قوسشى اۋىلىنىڭ حالقىن جىلدىڭ بارلىق مەزگىلىندە سۋمەن قامتۋ ءماسەلەسى شەشىلەدى, – دەدى ول.
وسى بريفينگتە ايتىلعانداي, 29-30 قاراشا كۇندەرى «حان شاتىر» ساۋدا, ويىن-ساۋىق ورتالىعىنىڭ الدىنداعى ساۋدا الاڭىندا اقمولا وبلىسىنان اكەلىنگەن ازىق-ت ۇلىك تاۋارلارىنىڭ جارمەڭكەسى وتەدى. ايماقتان وسى شارا ءۇشىن 784 ميلليون تەڭگەنىڭ 2 مىڭ توننادان استام تاۋار جەتكىزىلىپتى. سونداي-اق, جارمەڭكەدە «باۋىرساق مەيرامى», «ايران شوۋ» سىندى ويىن-ساۋىق شارالارى, سپورتتىق جارىستار وتپەك. بۇدان بولەك, اپتانىڭ سوڭعى كۇندەرى اقمولالىق ونەرپازداردىڭ, قالامگەرلەردىڭ قاتىسۋىمەن كورمەلەر, شىعارماشىلىق كەشتەر وتەدى.
ارنۇر اسقار,
«ەگەمەن قازاقستان»