28-قازان - حالىقارالىق انيماتسيا كۇنى. بۇل مەرەكەنى انيماتسيالىق كينونىڭ حالىقارالىق اسسوتسياتسياسى فرانتسۋزدىق ارىپتەستەرىنىڭ ۇسىنىسىمەن 2002 جىلى بەكىتكەن. ءدال سول جىلى العاشقى انيماتسيالىق تەحنولوگيانىڭ شىعۋىنا 110 جىل بولعان ەدى. 1892 جىلى 28 قازان كۇنى پاريجدە سۋرەتشى ەميل رەينو العاش رەت قوزعالىپ تۇراتىن سۋرەتتەردى كورسەتەتىن «پراكسينوسكوپ» اپپاراتىن تانىستىرعان. بۇل قازىرگى مۋلتفيلمدەردىڭ شىعۋىنا جول اشقان ەدى.
قازاقستاندا العاشقى انيماتسيا 1967 جىلى شىققان «قارلىعاشتىڭ قۇيرىعى نەگە ايىر» اتتى تۋىندى بولدى. رەجيسسەر امەن قايداروۆ بۇل مۋلتيپليكاتسيالىق فيلم ءۇشىن لەنينگراد قالاسىندا وتكەن بۇكىلوداقتىق كينوفەستيۆالدا (1968), نيۋ-يوركتەگى حالىقارالىق مۋلتيپليكاتسيالىق فيلمدەر فەستيۆالىندە (1975) جۇلدە العان.