كەشە «الماتى ارەنا» سپورت كەشەنىنىڭ الاڭىندا 28-ءشى بۇكىلالەمدىك قىسقى ۋنيۆەرسيادانىڭ وت جاعۋ ەستافەتالىق تەستى ءوتتى. شارا اياسىندا ۇيىمداستىرۋشىلار الاۋ جاعۋدىڭ تەحنيكالىق دايارلىعىن تەكسەرىپ, ۋنيۆەرسيادانىڭ الاۋ قۇتىسىن جاقتى. سونداي-اق, ەلىمىزدىڭ 15 وڭىرىنەن رەسمي تاسىمالداۋشى «ەير استانا» كومپانياسى ارقىلى الماتىعا جەتكىزىلەتىن 15 الاۋدى تاسىمالداۋعا ارنالعان ارنايى شىنى ساۋىتتى تەستىلەۋدەن وتكىزدى.
ەستافەتالىق تەستتە ۋنيۆەرسيادا الاۋىن قابىلدايتىن بۇكىل وبلىس ورتالىقتارىنىڭ وكىلدەرى باس قوستى. 30-دان اسا ايماقتىق مەنەدجەر الاۋ ساقتاۋشىلارىنىڭ جۇمىسىنا باقىلاۋ جۇرگىزدى.
الاۋ ساقتاۋشىلار – بۇل كۇشەيتىلگەن دايارلىق باعدارلاماسىنان وتكەن 12 ادامنان تۇراتىن توپ. وقىتۋ باعدارلاماسىندا توپتىڭ قيمىل-قوزعالىسىن بارىنشا كورىكتى ءارى ۇيلەسىمدى ەتۋگە كومەكتەسەتىن قويۋشى-رەجيسسەرمەن جۇمىس جاساۋ قاراستىرىلعان. تاعى 15 ادام الماتىدا تۋرا وسىنداي دايارلىقتان ءوتىپ, وبلىستاردا جاعىلاتىن الاۋمەن الماتىعا ورالۋ ءۇشىن ەستافەتا وتكىزىلەتىن كۇنى ايماقتارعا بەت الاتىن بولادى.
ۋنيۆەرسيادا ەستافەتاسىنا دايارلىق تىڭعىلىقتى بولۋى ءۇشىن باستى وقيعانىڭ باعدارلاماسى باستان-اياق قويىلىپ شىقتى. تەك الاۋدى جاعۋ كەزىندە العىسوز ارنايتىن وبلىس اكىمدەرىنىڭ ورنىنا ويدان شىعارىلعان كەيىپكەرلەر قاتىستى. ولار ستسەناري بويىنشا جاعىلعان الاۋدى ۇستاپ ءبىر شاقىرىمعا سوزىلعان جولدى ءجۇرىپ ءوتتى.
ەستافەتالىق تەستتىڭ تاعى ءبىر ماڭىزدى بولىگى ەلىمىز ايماقتارىندا الاۋ كوتەرۋشىلەردى ىرىكتەيتىن بايقاۋدىڭ ارالىق قورىتىندىسىن شىعارۋعا ارنالعان. جوعارى وقۋ ورنىنىڭ ارقايسىسىنا ءوز ىرىكتەۋىن ءوزى وتكىزۋ مۇمكىندىگى بەرىلگەن, ولار رەسپۋبليكالىق كوميسسياعا ون ۇمىتكەردىڭ ءتىزىمىن ۇسىنۋى ءتيىس. سونداي-اق, ۋنيۆەرسيادا-2017 سايتىندا قالاعان ادامنىڭ انكەتانى تولتىرۋ ارقىلى ءوزىن ۇمىتكەر رەتىندە ۇسىنىپ ىرىكتەۋدەن وتۋگە مۇمكىندىگى بار.
ەستافەتالىق تەست – ۋنيۆەرسيادانىڭ باعدارلاماسىنداعى اسا ماڭىزدى ءارى ەڭ العاشقى رەسمي شارانىڭ باستى دايارلىق جۇمىسى. ال ۋنيۆەرسيادا ويىندارىنىڭ ەستافەتاسى 2017 جىلدىڭ 25 قاڭتارىندا باستالادى. ۋنيۆەرسيادا الاۋى «نازارباەۆ ۋنيۆەرسيتەتتە» جاعىلىپ, ارتىنشا وزگە 15 وڭىردە تۇتانادى. سوڭىنان بارلىق 16 الاۋ بىرىكتىرىلىپ, ۋنيۆەرسيادا الاۋى جاعىلادى.
مەلىس سەيداحمەتوۆ
الماتى