استانادا ينۆەستيتسيالار جانە دامۋ مينيسترلىگىنىڭ مۇرىندىق بولۋىمەن كەن ءوندىرۋ سالاسىنداعى جۇمىستاردى قامتاماسىز ەتۋ ماسەلەلەرى بويىنشا كونفەرەنتسيا ءوتتى. كونفەرەنتسياعا بىرقاتار مينيسترلىكتەردىڭ باسشىلىق وكىلدەرى, «Kazenergy» قاۋىمداستىعىنىڭ, تاۋ-كەن جانە مەتاللۋرگيالىق كاسىپورىندار قاۋىمداستىعىنىڭ باسشىلارى, EITI, ياعني كەن ءوندىرۋ سالاسى قىزمەتىنىڭ اشىقتىعى باستاماسىنىڭ وكىلدەرى قاتىستى.
كەن ءوندىرۋ سالاسى قىزمەتىنىڭ اشىقتىعى باستاماسى – تابيعي بايلىقتاردى باسقارۋدىڭ اشىق جۇرگىزىلۋىن, ەسەپتىلىگىن قامتاماسىز ەتەتىن, سونىڭ جاھاندىق ستاندارتىن قالىپتاستىرعان ۇيىم. ونىڭ قۇرامىنداعى 51 ەلدىڭ ىشىندە 31-ءى ءتيىستى ستاندارتقا تولىق جاۋاپ بەرەتىن ەل سانالادى. بۇل تىزىمدە نورۆەگيا, البانيا, پەرۋ, يندونەزيا, قىرعىزستان سىندى ەلدەرمەن قاتار قازاقستان دا بار ەكەنىن ايتا كەتۋ كەرەك.
EITI حالىقارالىق باسقارماسىنىڭ توراعاسى فرەدريك راينفەلدتىڭ ايتۋىنشا, قازاقستان سياقتى جەر قويناۋى باي ەل كەن ورىندارىن يگەرۋدە باسقالارعا ۇلگى بولا الادى.
– بۇگىنگى جيىندا ءبىز كەن ورىندارىن ناقتى قانداي كومپانيالار يگەرىپ جاتقانى, ولاردىڭ تابىسى, ەسەپتىلىگى تۋرالى ماسەلەلەردى ءسوز ەتتىك. بۇل اقپاراتتاردىڭ بارلىعى ازاماتتار ءۇشىن اشىق بولۋعا ءتيىس. ازاماتتار يگەرۋشى كومپانيالاردىڭ ءتيىستى ەرەجەگە ساي, ادامداردىڭ يگىلىگى ءۇشىن جۇمىس ىستەيتىنىنەن حاباردار بولۋى كەرەك, – دەدى فرەدريك راينفەلد.
ەلىمىزدە EITI قىزمەتىن ينۆەستيتسيالار جانە دامۋ ءمينيسترى جەڭىس قاسىمبەك باسشىلىق جاسايتىن مۇددەلى تاراپتار ۇلتتىق كەڭەسى ۇيلەستىرەتىنىن ايتا كەتۋ كەرەك. ونىڭ قۇرامىندا پارلامەنت ءماجىلىسىنىڭ دەپۋتاتتارى, مەملەكەتتىك ورگانداردىڭ باسشىلىق وكىلدەرى, مۇناي-گاز كومپانيالارىنىڭ, تاۋ-كەن ءوندىرۋ سەكتورىنداعى كومپانيالاردىڭ باسشىلارى, سونداي-اق, ازاماتتىق قوعام وكىلدەرى بار. شەشىم وسى ءار سالا ماماندارىنىڭ ءوزارا كەلىسىمىنىڭ ناتيجەسىندە عانا قابىلدانادى. حالىقارالىق ستاندارتقا ساي, EITI جۇمىسىندا بيۋدجەت كىرىستەرى, نەگىزگى ەكسپورت پەن كەن ءوندىرۋ كولەمى, گەولوگيالىق بارلاۋ دەرەكتەرى, ءىرى كەن ورىندارىنىڭ كارتاسى, الەۋمەتتىك ينۆەستيتسيالار جانە باسقالارى كورسەتىلۋگە ءتيىس.
وسى جيىندا ايتىلعانداي, بيىلعى جىلى ەلىمىزدە EITI ينتەگراتسياسى بويىنشا «مەينستريمينگ» دەپ اتالاتىن قاناتقاقتى زەرتتەۋ جۇمىستارى قولعا الىنباق. بۇل جوبانىڭ ماقساتى ۇكىمەت بەرگەن ەسەپتەر مەن EITI ەسەپتەرىندەگى ەسەپتەر مەن قازىر قولجەتىمدى اشىق مالىمەتتەردى قايتالاماۋعا نەگىزدەلگەن.
ارنۇر اسقار,
«ەگەمەن قازاقستان»