«نۇر وتان» پارتياسى وبلىستىق فيليالى جانىنداعى پارتيالىق باقىلاۋ كوميسسياسى مەن جەمقورلىققا قارسى ءىس-قيمىل جونىندەگى قوعامدىق كەڭەستىڭ بىرلەسكەن وتىرىسىندا «نۇرلى جول» مەملەكەتتىك باعدارلاماسىنىڭ ورىندالۋ بارىسى, قۇرىلىستىڭ, جولداردىڭ جاعدايى تالقىلاندى.
باعدارلامانىڭ اياسىندا 14 ميلليارد تەڭگە باعىتتالسا, 11 ميلليارد تەڭگە قاراجات جولداردى قالپىنا كەلتىرۋگە جۇمسالعان. «قازاۆتوجول» ۇك» اق وبلىستىق بولىمشەسىنىڭ ديرەكتورى اسقار جانكين جينالعانداردى «بۋراباي–كوكشەتاۋ–پەتروپاۆل» جولىنىڭ جانە رەسەيگە اپاراتىن جولداردىڭ جاعدايىمەن تانىستىردى. ونىڭ ايتۋىنشا, «استانا–پەتروپاۆل» باعىتىنداعى تاسجولدىڭ 87 شاقىرىمىن, «پەتروپاۆل – جەزقازعان» باعىتىنداعى تاسجولدىڭ 11 شاقىرىمىن جوندەۋ جۇمىستارى بيىل تولىق اياقتالادى.
پارتيالىق باقىلاۋ كوميسسياسىنىڭ توراعاسى ءالىم شۇكەنوۆ مەردىگەرلەردىڭ ماتەريالداردى وڭدى-سولدى ۇنەمدەيتىنىن, بيتۋمدى از قولداناتىنىن سىنعا الدى. شالشىق سۋ مەن سازدىڭ ۇستىنە اسفالت توسەيتىنىن ءوز كوزىممەن كوردىم. دەمەك, جاۋاپتى كومپانيالار تاراپىنان ىسكە باقىلاۋ جوق دەگەن ءسوز. وسىنداي ورالىمسىزدىقتار سالدارىنان ءبىر ۋچاسكەنى جىلدا جاماپ-جاسقاپ جاتقاندارى. ودان دا كۇردەلى جوندەۋ جۇرگىزىلسە, قاراجات ءتيىمدى جۇمسالار ەدى, دەدى ول. وزگەلەر دە وسى پىكىرگە قوسىلىپ, ساپاسىز جولدار مەردىگەرلەر ەسەبىنەن جوندەلۋى تيىستىلىگىن قاداپ ايتتى. ا.جانكين مەردىگەرلەر جول ساپاسىنا بەس جىلعا دەيىن جاۋاپ بەرەتىنىن, كەلىسىمشارتتا ولار بانكتىك كەپىلدەمە بەرەتىندىكتەن, جاۋاپكەرشىلىكتەن جالتارا المايتىنىن, مىندەتتەمەنى ورىنداماعان جاعدايدا باسقا كومپانيالار اتقاراتىنىن جەتكىزدى.
قۇرىلىس باسقارماسى باسشىسىنىڭ ورىنباسارى ۆلاديسلاۆ لۋكين «نۇرلى جول» باعدارلاماسى شەڭبەرىندە ع.مۇسىرەپوۆ اۋدانىندا – 400, تايىنشا قالاسىندا 300 ورىندىق مەكتەپ, پەتروپاۆل قالاسىندا 320 ورىندىق بالاباقشا تۇرعىزىلعانىن, بۇل ماقساتتاعى قارجى ءتيىمدى جۇمسالعانىن كولدەنەڭ تارتتى.
الايدا, قوعامدىق كەڭەس مۇشەلەرىن وبلىس ورتالىعىنداعى كەي ۋچاسكەلەردەگى سۋ قۇبىرلارىن تارتۋ جايى قاناعاتتاندىرمادى. ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ مىندەتىن اتقارۋشى تاسمۇرات قادقاداموۆتىڭ كوميسسيا الدىنداعى ەسەبى ءبىر ايدان كەيىن قايتا تىڭدالاتىن بولدى.
جيىندا مەملەكەتتىك باعدارلامالاردى مۇلتىكسىز ورىنداۋ, جەمقورلىققا جول بەرمەۋ, الدىن الۋ اسا ماڭىزدى فاكتور ەكەنى اتاپ كورسەتىلىپ, شارالار بەلگىلەندى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى