مەملەكەت باسشىسى سينگاپۋردىڭ قۇرمەتتى اعا ءمينيسترى, پارلامەنت مۇشەسى گو چوك تونگپەن كەزدەستى. بۇل تۋرالى اقوردانىڭ ءباسپاسوز قىزمەتىنە سىلتەمە جاساعان ەگەمەن-اقپارات حابارلادى.
كەزدەسۋدە ەكونوميكانىڭ ءتۇرلى سالالارىنداعى ەكىجاقتى ىنتىماقتاستىق ماسەلەلەرى جان-جاقتى تالقىلاندى.
ەلباسى سينگاپۋردىڭ يننوۆاتسيا, تەحنولوگيا جانە قارجى سالالارىنداعى تاجىريبەسى اسا باعالى ەكەنىن اتاپ ءوتتى.
– تاۋەلسىزدىكتىڭ 25 جىلىندا ءبىز سينگاپۋرمەن تىعىز قارىم-قاتىناس جۇرگىزىپ كەلەمىز جانە سىزدەردىڭ ەلدەرىڭىزدى ءاردايىم وزىندىك باعدار رەتىندە باعالايمىز. سينگاپۋر قالا-مەملەكەت ەكەنىنە قاراماستان, الەمنىڭ كوپتەگەن ەلدەرى ءۇشىن دامۋدىڭ ءتيىمدى ۇلگىسى بولا ءبىلدى. ءبىزدىڭ مەملەكەت قۇرۋداعى جولدارىمىز كوپ جاعدايدا ۇقساس. وسىعان بايلانىستى ءتۇرلى باعدارلامالار مەن ستراتەگيالار ازىرلەۋ جانە ىسكە اسىرۋ بارىسىندا ءسىزدىڭ ەلدىڭ تاجىريبەسىن مۇقيات زەردەلەپ وتىرامىز, – دەدى قازاقستان پرەزيدەنتى.
گو چوك تونگ قازاقستانعا شاقىرعانى جانە كورسەتكەن قوناقجايلىلىعى ءۇشىن نۇرسۇلتان نازارباەۆقا العىس ءبىلدىردى.
– مەن ءسىزدىڭ ەلدە العاش رەت بولىپ وتىرمىن جانە ونىڭ دامۋ قارقىنىنا ءتانتىمىن. ەلدەرىمىزدىڭ اراسىندا تىعىز سەرىكتەستىك بايلانىس ورناعانىنا قۋانىشتىمىن. قازىر قازاقستان مەن سينگاپۋر اراسىنداعى ىنتىماقتاستىقتىڭ بارلىق باستى باعىتتارى ايقىندالعان, – دەدى گو چوك تونگ.
سوڭىندا ەلباسى مەن گو چوك تونگ ەلدەرىمىز اراسىنداعى ەكىجاقتى قارىم-قاتىناستىڭ ودان ءارى نىعايا بەرەتىنىنە سەنىم ءبىلدىردى.
ەگەمەن-اقپارات