قاينيجامال اجەي كورشى ەلدىڭ قازاقستانداعى ەلشىلىگى وكىلدەرىنىڭ اكەسىنىڭ «قىزىل جۇلدىز» وردەنىن تاپسىرۋعا ارنايى كەلە جاتقانىن ەستىپ, جۇرەگى جارىلارداي قۋانعان. بۇگىندە ءتاشىم ءشارىپوۆتىڭ 6 ۇل-قىزىنان 30 نەمەرە, 33 شوبەرە, 12 شوپشەك ءوربىپ وتىرسا دا, كەيۋانانىڭ ەرەكشە تولعاناتىن سەبەبى بار. بىلتىر وڭىردە جارىق كورگەن «جەڭىس سولداتتارى» اتتى ەكى تومدىق كىتاپتى پاراقتاپ وتىرىپ, اكەسىنىڭ اتى-ءجونىن كەزدەستىرمەگەنىنە قاتتى نالىعان. سوۆەت اۋدانى /قازىر اققايىڭ/ دوبروۆولسكوە ەلدى مەكەنىنىڭ تۋماسى سوعىستىڭ العاشقى كۇندەرىنەن مايدانعا اتتانىپ, 361-ءشى اتقىشتار ديۆيزياسىنىڭ 394-ءشى اتقىشتار پولكىنىڭ قۇرامىندا جاۋعا قارسى اتوي سالعان. نەمىس باسقىنشىلارىنان ۋكراينا, مولدوۆا, رۋمىنيا, پولشا ەلدەرىن ازات ەتۋگە قاتىسىپ, نەبىر قاندى جورىقتاردى باستان كەشكەن.
وسىنىڭ ءوزى وت پەن وقتىڭ اراسىندا كۇن-ءتۇن قاتىپ جۇرگەن مايدانگەردىڭ ەرلىك جولدارىن ايعاقتاپ تۇرعان جوق پا؟ ال كىتاپتى قۇراستىرۋشىلاردىڭ ماسەلەنىڭ ءمانىسىن سوعىس ارداگەرىنىڭ ەسەپتە تۇرماعانىمەن تۇسىندىرگەنىنە كۇلەرسىڭ بە, جىلارسىڭ با؟ اناسىنىڭ تىلەگىن ەكى ەتپەگەن ۇلكەن ۇلى ينتەرنەت ارقىلى ىزدەستىرگەندە قاي جەردە, قانداي مايداندا شايقاسقانىنا دەيىن تاۋىپ الادى. جيناقتالعان دەرەكتەر اۋداندىق قورعانىس ءىسى ءجونىندەگى باسقارماعا بەرىلەدى. بىردە رەسەي فەدەراتسياسىنىڭ ەلشىلىگىنەن تەلەفون سوعىلىپ, كەزىندە بەلگىسىز ماراپاتقا ۇسىنىلعانىن, الايدا بەلگىسىز سەبەپتەرمەن تاپسىرىلماي قالعانىن حابارلايدى. بۇل جاعىمدى جاڭالىق مۇنداعىلاردى توبەلەرىنەن جاي تۇسكەندەي اسەرگە بولەيدى.
«يگىلىكتىڭ ەرتە-كەشى جوق» دەگەن تاۋبەشىل حالىقپىز عوي. سويتسە, فاشيستەردى ۇياسىندا تالقانداعاننان كەيىن جاس جاۋىنگەر وزگەلەرمەن بىرگە قيىر شىعىسقا اتتانعان. بۇل تۋرالى تۋعان-تۋىستارى بىلمەگەن, كەيىن مارقۇم دا ءتىس جارا قويماعان. جاپوندارمەن جان الىسىپ, جان بەرىسكەن ۇرىستا قازاقتىڭ قىران جىگىتى ارىستانشا ارپالىسقان. جاڭبىرشا وق سەبەلەپ تۇرعان پۋلەمەتتىڭ ءۇنىن ءوشىرىپ, قارۋلاستارىن قويان-قولتىق ايقاسقا باستاپ شىققان. وسى كوزسىز ەرلىك جاۋىنگەرلىك جوعارى اتاققا ۇسىنىلعان.
رەسەي فەدەراتسياسىنىڭ قازاقستانداعى ەلشىلىگىنىڭ ءباسپاسوز حاتشىسى يۋليا لازوۆسكايا ەكىنشى دۇنيەجۇزىلىك سوعىستا ەرەن ەرلىكتىڭ ۇلگىسىن كورسەتكەن ءتاشىم ءشارىپوۆتىڭ «قىزىل جۇلدىز» وردەنىنىڭ كۋالىگىن 71 جىلدان كەيىن تۋعان-تۋىستارىنا سالتاناتتى جاعدايدا تابىس ەتتى. ەرلىك وشپەيدى, ەر ۇمىتىلمايدى دەگەن وسى.
– اكەمىز سول جولى اۋىر جاراقات الىپ, گوسپيتالدا جارتى جىلداي ەمدەلگەن. ءبىر كوزى مەن قولىنان ايىرىلعان ونى ەلگە مەيىربيكەلەر جەتكىزىپ سالعان. بار-جوعى 48 جاسىندا ومىردەن وزدى. مەن ول كەزدە ەكى ايلىق شاقالاق ەكەنمىن, – دەپ قاينيجامال اپاي اسقار تاۋ پاناسى جايلى تەبىرەنە ەسكە الدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
سۋرەتتى تۇسىرگەن
امانگەلدى بەكمۇراتوۆ