ءبىر قۇستىڭ باعاسى 400 000 دوللار
كۋۆەيتتە وتكەن كەزەكتى قۇس ساۋداسى اۋكتسيونىندا ءبىر قۇس وراسان زور اقشاعا 400 000 دوللارعا ساتىلدى.
بۇل جولعى لوتتا قولعا ۇيرەتىلگەن روللەر كەپتەرى وتە-موتە تانىمال بولىپ, قولدان قولعا تيمەدى. ونىڭ وسىنشالىقتى ماڭىزدى بولىپ جاتقانى ءوز ءتۇرى بويىنشا اسپاندا قالىقتاپ ۇشىپ جۇرگەندە الۋان قيمىل كورسەتە الاتىن قابىلەتى بار جالعىز قۇس ەكەندىگىندە شىعار. سوندىقتان دا ولاردى كەيدە «اكروبات» دەپ تە اتاپ جاتادى. الدىمەن روللەر كەپتەرىنىڭ ءبىرى 76 000 دوللارعا ساتىلدى. ال سوڭىنان بەلگيالىق وسىنداي قۇس 400 000 دوللارعا ءوتىپ كەتتى.
قارنىنا قىرىق پىشاق قالاي سىيعان؟
ءۇندىستاننىڭ پەندجاب شتاتىنداعى گۋرداسپۋر قالاسىندا حيرۋرگتەر ءبىر كىسىگە وتا جاساپ جاتقاندا, ونىڭ قارنىنان ارتىق-كەمى جوق قىرىق پىشاق شىققان.
ەسىمى اتالماي وتىرعان 42 جاستاعى ازامات اۋەلى ءىشى اۋىراتىنىنا شاعىنىپ, اۋرۋحاناعا جاتقان. اۋرۋحانا باسقارۋشىسى, دوكتور دجيتيندەر مالحوترا ناۋقاستى دەرەۋ ۋدت-عا جىبەرەدى. سوندا دارىگەرلەر ونىڭ ىشىندە قاتتى ءبىر زاتتىڭ جاتقانىن بايقايدى. وسى كەزدە پاتسيەنت سوڭعى ەكى ايدا ءوزىن ءوزى ۇستاي الماي, «ءدامى ۇناعان» تەمىر زاتتاردىڭ ءبارىن جەي بەرگەنىن ايتادى. ناتيجەسى الگىندەي بولىپ شىقتى. سىرقات وپەراتسيادان كەيىن ءوزىن جاقسى سەزىنگەنىن ايتقان.
پينگۆينگە گەنەرال اتاعى بەرىلدى
نورۆەگيا كورولدىگى گۆاردياسىنىڭ شوتلاندياداعى ەدينبۋرگ حايۋاناتتار باعىندا ءومىر سۇرەتىن نيلس ۋلاف دەگەن لاقاپ اتى بار پينگۆينگە گەنەرال اتاعى بەرىلدى.
وسىعان ارنالعان سالتاناتتى شارا زووپاركتىڭ تەرريتورياسىندا وتكەن. وعان 50 گۆاردياشى قاتىسقان. داستۇرگە ساي بۇل قۇس اسكەريلەر ساپىنىڭ الدىنان ءجۇرىپ وتكەن. ونىسى ءىس جۇزىندە بايقاۋ بولىپ شىققان. سول كەزدە وعان اسكەري قۇرمەت كورسەتىلگەن. نورۆەگيا كورول پينگۆينىن ەدينبۋرگ پاركىنە بەرۋ ءۇردىسىن 1913 جىلى باستاپتى. 1972 جىلدان باستاپ ولارعا اسكەري اتاق بەرۋ قولعا الىنعان. ول گۆاردياشىلاردىڭ ەدينبۋرگ ساياباعىنا ءار كەلگەنىندە جاسالىپ تۇرعان.
ەۋروپاداعى ەڭ كارى اعاش – گرەكيادا
عالىمدار گرەكيانىڭ سولتۇستىگىنەن ءوسىپ تۇرعانىنا مىڭ جىلدان اسىپ كەتكەن بوسنيا قاراعايىن تاۋىپتى.
وقىمىستىلاردىڭ بولجامى بويىنشا, ول ەۋروپاداعى ەڭ كارى اعاش بولىپ شىقتى. 941 جىلى كىشكەنتاي ۇرىق تۇرىنەن شىبىق بولىپ كوكتەگەن داراق بۇگىندە 1075 جاسقا كەلىپ تۇر. ستوكگولم ۋنيۆەرسيتەتى, ماينتس ۋنيۆەرسيتەتى, اريزونا ۋنيۆەرسيتەتى زەرتتەۋشىلەرىنەن قۇرالعان كوماندا اعاشقا گرەك قۇدايىنىڭ قۇرمەتىنە «ادونيس» دەگەن ات قويدى. ەندى ولار پيند تاۋلارى باۋرايىندا ءوسىپ تۇرعان باسقا دا مىڭ جىلدىق تاريحى بار اعاشتار ايماقتىڭ ون عاسىرلىق كليماتىنان ماعلۇمات بەرەتىنىنە ۇمىتتەنىپ وتىر.
پۋتين سىيلاعان BMW-لار ساتۋعا شىعارىلدى
رەسەي پرەزيدەنتى ۆلاديمير ءپۋتيننىڭ ريو-دە-جانەيرودا التىن مەدال العان وليمپياداشىلارعا سىيلاعان BMW ح6 اۆتوموبيلدەرىنىڭ ءبىرى كەشە ساۋداعا شىعارىلعانى بەلگىلى بولىپ قالدى.
بۇل تۋرالى اقپار كولىك ساتۋمەن اينالىساتىن سايتتاردىڭ بىرىنەن ورىن العان. «ر-سپورت» باسىلىمىنىڭ انىقتاعانىنداي, ساتۋعا شىعارىلعان كولىك سينحروندى جۇزۋدەن ويىندار چەمپيونى اتانعانداردىڭ بىرىنىكى كورىنەدى. اتالعان كولىكتەردە ونى العان ادامداردىڭ اتى-جوندەرى عانا جازىلعان. ولار ون كۇنگە دەيىن وسىلاي جۇرە الادى.
شوتلاند پوليتسەيلەرى حيدجاب كيە بەرەدى
شوتلانديادا پوليتسيادا قىزمەت ەتەتىن مۇسىلمان ايەلدەرگە جۇمىس كەزىندە وزدەرىنىڭ ءداستۇرلى كيىمى – حيدجاب كيىپ جۇرۋگە رەسمي تۇردە رۇقسات ەتىلدى.
مۇنداي شەشىمنىڭ مۇسىلمان ايەلدەردىڭ كاسىبي بەدەلىن ارتتىرۋعا جانە قاتارعا جاڭا كادرلار تارتۋعا باعىتتالعانى ايتىلىپ جاتىر. شوتلانديادا بۇدان بۇرىن دا ءتارتىپ ساقشىلارىنا حيدجاب كيۋگە تىيىم سالىنباعان. الايدا ونداي قۇرمەتكە جەتۋ ءۇشىن مىندەتتى تۇردە اعا وفيتسەرلەر قۇرامىنان بولۋىڭ كەرەك-ءتىن. بيلىك تاراپىنان بولىپ جاتقان مۇنداي قادامدى ەلدىڭ مۇسىلمان پوليتسەيلەرى قاتتى قولدادى.
اقپارات اگەنتتىكتەرىنىڭ ماتەريالدارى بويىنشا دايىندالدى