استانادا ۇلتتىق وليمپيادا كوميتەتىنىڭ پرەزيدەنتى تيمۋر ق ۇلىباەۆ پەن مادەنيەت جانە سپورت ءمينيسترى ارىستانبەك مۇحامەدي ۇلى وليمپيالىق ويىنداردىڭ چەمپيوندارىمەن جانە جۇلدەگەرلەرىمەن كەزدەستى.
كەزدەسۋگە سپورتشىلارمەن بىرگە جاتتىقتىرۋشىلار, وليمپياداعا ەلىمىزدىڭ دەلەگاتسياسىنىڭ قۇرامىندا بارعان سپورت ماماندارى قاتىستى.
جيىندا ۇوك پرەزيدەنتى مەن مادەنيەت جانە سپورت ءمينيسترى وتانداستارىمىزدى جەڭىستەرىمەن قۇتتىقتاپ, وليمپياداعا قاتىستى ءوز ويلارىن ورتاعا سالدى. وندا الدىمەن ۇلتتىق وليمپيادا كوميتەتىنىڭ باسشىسى ءسوز الىپ, سپورتشىلارعا ريزاشىلىعىن ءبىلدىردى.
–سىزدەردى وليمپيادانىڭ ءساتتى اياقتالعانىمەن قۇتتىقتايمىن. وليمپيادا ءبىزدىڭ سپورتشىلار ءۇشىن ەل نامىسىن ابىرويمەن قورعاپ, وتانسۇيگىشتىگىمىزدى كورسەتەتىن جارىس الاڭى بولدى. سپورتشىلارىمىزدىڭ جەڭىسى ەلىمىزدە سپورتتى دامىتۋدا ءتيىستى جۇمىستاردىڭ جاسالىپ جاتقانىن كورسەتتى. قازاقستان وليمپيادادا ەشقاشان 17 جۇلدە الىپ كورگەن ەمەس. سىزدەر جارىس الاڭىندا نامىسقا تىرىسىپ, وسى مەدالداردى جەڭىپ اكەلدىڭىزدەر, – دەدى ول.
ودان ءارى تيمۋر اسقار ۇلى وتانداستارىمىزدىڭ وليمپياداداعى جارىستارىن ەسكە الىپ, ءوزى كورگەن وقيعالاردى ايتىپ بەردى.
–مەن وليمپيادا باستالار الدىندا ريو-دە-جانەيروعا كەلگەنىمدە مىناداي ءبىر قىزىق نارسەنى كوردىم, – دەدى ول. – ءبىز جارىس وتەتىن جەرلەرمەن تانىسىپ جۇرگەندە باسقا ءبىر ەلدەردىڭ سپورتشىلارىنىڭ قازاقستاننىڭ تۋى استىندا جاتتىعىپ جاتقانىن كوردىك. مۇنى ءبىزدىڭ ەلگە جاقسى ىرىم بولدى دەپ بالادىق. سول كەزدە ىشىمىزدەن ايتقانىمىز كەيىن ىسكە اسىپ, ەلىمىزدىڭ كوك بايراعى ءبىر ەمەس, بىرنەشە رەت برازيليا اسپانىندا قالىقتاپ, ءانۇرانىمىز وينالدى.
كەزدەسۋدە ول وليمپيادادا كەيبىر وتانداستارىمىزدىڭ جۇلدە اكەلەتىنىن كۇتپەگەنىن ايتىپ, دەگەنمەن سپورتشىلارىمىزدىڭ جاقسى ونەر كورسەتەتىنە بەك سەنىمدى بولعانىن ايتتى.
–وليمپيادا الدىندا ماعان دميتري ءبالانديننىڭ چەمپيون بولۋى مۇمكىن ەكەنىن ەسكەرتتى. سودان باستاپ بۇل جىگىتكە ءۇمىتىمىز ارتتى. ەندى, مىنە وزدەرىڭىز كورىپ وتىرعانداي دميتري بالاندين – وليمپيادا چەمپيونى. مۇنداي سپورتشىمەن تەك ماقتانۋ كەرەك. ال جالپى, قازاقستان قۇراماسى سپورتتىڭ بارلىق تۇرىنەن وليمپياداعا جاقسى دايىندالدى. وسى جەردە مادەنيەت جانە سپورت مينيسترلىگىنە العىس ايتقىم كەلەدى. ءبىزدىڭ سپورتشىلارىمىز برازيلياعا سۇتتەن اق, سۋدان تازا بولىپ باردى. ءبىز وليمپيادا الدىندا حالىقارالىق سپورت كوميتەتىنىڭ باسشىسى توماس باحقا قازاقستان قۇراماسىنىڭ وليمپياداعا جاقسى دايىندالىپ, ەشقانداي دوپينگ قولدانباي, تازا بارا جاتقانىن ايتتىق. سول ءۇشىن ءتيىستى اناليزدەر تاپسىرىپ, گەرمانياعا جىبەردىك. سوڭىندا تازا ەكەنىمىزدى دالەلدەدىك. سپورتتا تازالىق ەشقانداي ناتيجەنى الماستىرا المايدى, – دەدى ول.
وسىدان كەيىن مادەنيەت جانە سپورت ءميسترى ءسوز الىپ, سپورتشىلار مەن جاتتىقتىرۋشىلاردىڭ ەڭبەگىن ۇلتتىق قۇرامانىڭ جارىسقا جاقسى دايىندالعانىن, سول ءۇشىن ۇلتتىق وليمپيادا كوميتەتى مەن جاتتىقتىرۋشىلارعا, وسى ىسكە باسىنان سوڭىنا دەيىن ارالاسقان باسقا دا سپورت مامانداردىڭ ەڭبەگىن باس بارماقپەن باعالايتىنىن ايتتى.
كەلەسى كەزەكتە ءسوز وليمپيادا چەمپيوندارى مەن جۇلدەگەرلەرىنە بەرىلدى. الدىمەن بوكسشى دانيار ەلەۋسىنوۆ مىنبەرگە شىعىپ, ۇوك پرەزيدەنتىنە وليمپيادادا عانا ەمەس, وعان دايىندىق كەزىندە دە كورسەتكەن قولداۋىنا العىس ءبىلدىردى.
ء–بىزدىڭ جەڭىپ العان جۇلدەلەرىمىزدە ءسىزدىڭ دە ەڭبەگىڭىز بار. ءبىزدىڭ جەڭىسكە جەتۋىمىزگە بار كۇشتەرىن, شەبەرلىكتەرىن جۇمساعان جاتتىقتىرۋشىلارىمىزعا شىن جۇرەكتەن العىس ايتامىن. ءبىزدىڭ داڭقتى بوكسشىلارىمىز ۆاسيلي جيروۆ, ەرماحان ىبىرايىموۆ, بەكزات ساتتارحانوۆ, باقتيار ارتاەۆ, باقىت سارسەكباەۆ, سەرىك ساپيەۆ سىندى اعالارىمىزدىڭ جولىن قۋىپ, وليمپيالىق رينگتە ەلىمىزدىڭ كوك تۋىن جەلبىرەتكەنىمىز ءۇشىن ءوزىمدى باقىتتى سانايمىن. ءبىز وليمپيادادا قازاقستان بوكسىنىڭ الەمنىڭ ۇزدىك ەكەنىن تاعى دالەلدەي الدىق, – دەدى دانيار ەلەۋسىنوۆ.
وليمپيادادا العان اسەرى تۋرالى جۇزگىش دميتري بالاندين دە ايتىپ بەردى.
–فينالدا ءجۇزىپ بولعاننان كەيىن, تابلوعا قاراسام ەشنارسە تۇسىنبەدىم. قاتەلىك بولعان شىعار دەپ ويلادىم. سودان كەيىن عانا قۇرمەت تۇعىرىنا شىققاندا جەڭىسكە جەتكەنىمدى سەزىندىم. سول جەردە ەلىمىزدىڭ ءانۇرانى شىرقالىپ, كوك تۋىمىز كوتەرىلگەندە بويىمدى بارلىق قازاقستان حالقى ءۇشىن ماقتانىش سەزىمى كەرنەدى. بۇل سەزىمدى جەتكىزۋ قيىن. قازاقستانعا سونداي سەزىمدى سىيلاعانىما قۋاندىم. جەڭىس تۇعىرىندا ەلىمىزدىڭ كوك بايراعىنىڭ وزگەلەردەن بيىك تۇرعانىن ماقتان تۇتتىم, – دەدى وليمپيادا چەمپيونى.
ايەلدەر كۇرەسىنەن كۇمىس جۇلدەگەرى گۇزەلۇ مانيۋروۆا دا وليمپياداداعى سپورتشىلارىمىزدىڭ جەڭىسى بۇكىل ەلىمىزدىڭ ورتاق جەڭىسى ەكەنىن اتاپ ءوتتى.
–فينالدا ءبىرتۇرلى سەزىم بولدى. كۇمىس جۇلدە الدىم. التىن مەدالعا ءسال عانا جەتىسپەدى. سوعان وكىنەمىن. بۇل دا ءبىر سىناق بولعان شىعار. كۇمىس جۇلدە مەنى الداعى جارىستارعا قايراپ, قۇلشىنىس بەرەدى. ەكىنشى جاعىنان, ەكىنشى ورىن وكشەمىزدى باسىپ كەلە جاتقان جاستارعا دا ۇلگى بولسا دەيمىن. سولار ءبىزدىڭ وليمپياداداعى جەڭىستەرىمىزگە قاراپ بوز تۇزەسە دەگەن تىلەگىم بار, – دەدى گيۋزەل مانيۋروۆا.
وسىدان كەيىن بوكستان ۇلتتىق قۇراما كوماندانىڭ باس جاتتىقتىرۋشىسى مىرزاعالي ايتجانوۆ ءسوز الىپ, جارىستا بولعان باسەكەلەستىك تۋرالى ايتتى.
–قازىر الەمدە بوكس جىلدام دامىپ جاتىر. سونىڭ ىشىندە وليمپيالىق ويىنداردا بوكس قارقىندى دامىپ كەلە جاتقانىن كورسەتتى. ءبىزدىڭ ۇلتتىق قۇراما كوماندا وليمپياداعا جاقسى دايىندالدى. جىگىتتەر مەن قىزداردىڭ ونەرىنە ريزامىن. ءبىر التىن, ەكى كۇمىس, ەكى قولا مەدال جەڭىپ الدىق. وسى رەتتە ۇلتتىق قۇرامانىڭ وليمپياداعا دايىندالۋىنا بارلىق جاعداي جاساعان قازاقستان بوكس فەدەراتسياسىنا العىس ايتامىن. قازاقتا «باق قايدا باراسىن؟ ىنتىماعى جاراسقان ەلگە بارامىن», دەگەن ءسوز بار. ەلىمىزدىڭ ىنتىماعى, بىرلىگى بولسا سپورتتا دا جەڭىستەرىمىز كوپ بولادى. ىنتىماعىمىز ارقاشان جاراسا بەرسىن, دەي كەلىپ, مىرعاعالي ايتجانوۆ كەلەسى وليمپيادادا بۇدان دا جاقسى ناتيجە كورسەتەتىندەرىن مالىمدەدى.
جيىننىڭ سوڭىندا وليمپيادادا ءباسپاسوز ورتالىعىنىڭ جەتەكشىسى قىزمەتىن اتقارعان باقىتجان ورداباەۆ وليمپيادا جاڭالىقتارىن بەرىپ, رەپورتاج جاساعان جۋرناليستەردىڭ جۇمىسىن باس بارماقپەن باعالادى. ول جارىس كەزىندە ەلگە جاڭالىق تاراتقان اقپارات قۇرال وكىلدەرىنىڭ جۇمىسى وڭاي بولماعانىن, ءبىزىدڭ وليمپياداشىلاردىڭ جەڭىستەرىن سولار ەلدەن بۇرىن حابارلاپ, ەلگە لايىقتى قىزمەت ەتكەنىن اتاپ ءوتتى.
داستان كەنجالين