11 اقپاندا «نۇر وتان» حالىقتىق-دەموكراتيالىق پارتياسىنىڭ XIII سەزى وتەدى. قازىردىڭ وزىندە قوناقتاردىڭ العاشقى لەگى كەلە باستادى. ولاردىڭ قاتارىندا ازيالىق ساياسي پارتيالار حالىقارالىق كونفەدەراتسياسىنىڭ توراعاسى حوسە دە ۆەنەسيا دا بار. پارتيا ءتوراعاسىنىڭ ءبىرىنشى ورىنباسارى نۇرلان نىعماتۋلين بۇرناعى كۇنى حوسە دە ۆەنەسيامەن كەزدەستى.
وتكەن جىلى «نۇر وتان» پارتياسى دامۋ ىرعاعى ونىڭ مۇشەلەر سانىنىڭ تۇراقتى وسۋىمەن سيپاتتالاتىن ازياداعى وسى ءىرى بەدەلدى ۇيىمعا توراعالىق ەتكەن بولاتىن. قازىرگى تاڭدا ۇيىمنىڭ قۇرامىنا الەمنىڭ 52 ەلىنەن 318 ساياسي پارتيا كىرەدى.
نۇرلان نىعماتۋلين ەل پرەزيدەنتى, پارتيا كوشباسشىسى نۇرسۇلتان نازارباەۆتىڭ سارا جانە ستراتەگيالىق ساياساتىنىڭ ارقاسىندا قازاقستان جىل سايىن حالىقارالىق ارەناداعى ءوز ۇستانىمىن بارىنشا كۇشەيتىپ وتىرعانىنا توقتالدى.
ءوز كەزەگىندە حوسە دە ۆەنەسيا ەل پرەزيدەنتىنىڭ باستاۋىمەن تولەرانتتىلىق, ەتنوسارالىق تاتۋلىق پەن كونفەسسياارالىق كەلىسىم يدەياسىن قازاقستاندا عانا ەمەس, بۇكىل ەقىۇ كەڭەستىگىندە تاراتۋدىڭ ماڭىزدى ءرولىن اتاپ ءوتتى.