– دەيدى كاسىپكەر گۇلميرا قوڭقاشەۆا
قازاقستاندا جاسالعان جانە تۇتىنۋشىلاردىڭ ۇلكەن سۇرانىسىنا يە بولعان ماكارون ءونىمدەرىنىڭ ءبىرى – «ارزۋ» جايمالارى. تاراز قالاسىنداعى «تا-ماك» جشس شىعاراتىن جايمالار از ۋاقىتتا نارىقتاعى باسەكەلەستەرىن ىعىستىرىپ, تاڭداۋلى ونىمگە اينالىپ ۇلگەردى. اتالمىش كاسىپورىن وندىرەتىن ونىمدەردىڭ «قازاقستاننىڭ ۇزدىك تاۋارى» اتانۋى – وسىنىڭ دالەلى.
نارىق زاڭى قاتال. وندىرىلگەن ءونىم ساپالى ءارى باعاسى قولجەتىمدى بولۋى ءتيىس. ونسىز باسەكەلەستىككە توتەپ بەرۋ قيىن. «تا-ماك» جشس وسىنداي سىناقتاردىڭ بارىنەن وتە ءبىلدى. گۇلميرا قوڭقاشەۆا باسقاراتىن سەرىكتەستىك 2004 جىلى ماكارون ونىمدەرىن شىعاراتىن تسەح اشىپ, ساپاسى يمپورتتىق ونىمدەردەن كەم تۇسپەيتىن جايما ازىرلەۋ ءتاسىلىن ەكى جىلدىڭ ىشىندە مەڭگەرىپ, كاسىپورىندى ىسكە قوسادى. ءۇشىنشى جىلى تارازدا شىعارىلاتىن جايمالار ورتالىق, باتىس جانە شىعىس قازاقستان وبلىستارىنا كەڭ تارالا باستايدى. 2008 جىلى ماكارون ونىمدەرىنىڭ باسقا دا تۇرلەرىن شىعارۋدى قولعا الادى.
سول جىلدىڭ وزىندە وبلىس كولەمىندە «ۇزدىك ازىق-ت ۇلىك ءوندىرىسى», رەسپۋبليكالىق «التىن ساپا» كونكۋرسىنىڭ لاۋرەاتى اتانعان «تا-ماك» جشس 2009 جىلى «حالىق تاڭداۋى», 2010 جىلى «التىن كوشباسشى» اتالىمدارى بويىنشا جەڭىسكە جەتكەن. حالىقارالىق حاسسپ جۇيەسى – تاماق ونىمدەرىنىڭ قاۋىپسىزدىگىن قامتاماسىز ەتۋدىڭ جاڭا ستاندارتتارى جانە مالايزيالىق «حالال» ستاندارتى بويىنشا ەكولوگيالىق تازا ءونىم وندىرەتىن سەرىكتەستىك 2012 جىلى رەسەيدە وتكەن ازىق-ت ۇلىك ونىمدەرىنىڭ كورمەسىندە التىن مەدالدى يەلەنەدى. كاسىپورىننىڭ تاۋلىگىنە 10 مىڭ توننا ءونىم وندىرەتىن يتاليالىق اۆتوماتتى قۇرىلعىنى ىسكە قوسقانى دا وسى جىلى. 2014 جىلى ماسكەۋلىك كونسترۋكتورلىق بيۋرومەن بىرلەسىپ, جاڭا اۆتوماتتى قاپتاما جۇيەسىن ىسكە قوستى. ول الەمدەگى ەشبىر تاۋار قاپتاماسىنا ۇقسامايدى. سونىڭ ارقاسىندا «ارزۋ» تاۋار تاڭباسىمەن ساتىلاتىن جايمالار دۇكەن سورەلەرىندە بىردەن ەرەكشەلەنىپ تۇراتىن بولدى.
«تا-ماك» سەرىكتەستىگى «دامۋ» كاسىپكەرلىكتى دامىتۋ قورى قۇيعان ينۆەستيتسيانىڭ ارقاسىندا ءوز ونىمدەرىن ەكسپورتقا شىعارا باستادى. «ارزۋ» ماركالى ماكارون ونىمدەرى گوللانديا, فرانتسيا جانە اقش-تىڭ «Mueller Aussenhandel e.K.», «Monolith Süd GmbH» دەلدال كومپانيالارى ارقىلى گەرمانيا, رەسەي, قىرعىز مەملەكەتتەرى مەن وزبەكستان نارىعىنا شىعارىلۋدا. بۇگىندە كاسىپورىن تۇتىنۋشىلارىنا «ەرتوستىك» دەگەن تاۋار تاڭباسىمەن جاڭا برەند ۇسىنۋدا. مۇنداي قادام ماكارون ونىمدەرىن شىعاراتىن ءوندىرىس ورىندارى اراسىنداعى باسەكەلەستىككە تىڭ سەرپىن بەرەتىنىن ايتادى سەرىكتەستىك باسشىسى. ەكىنشى جاعىنان جاڭا جوسپارلاردىڭ تۋىنا جول اشادى دەيدى.
– ساپا – مەن ءۇشىن ەڭ باستى ماسەلە, – دەيدى گۇلميرا قادىرقىزى. – ءبىر وندىرۋشىلەرگە ءونىمنىڭ نەعۇرلىم مول شىعارىلىپ, جان-جاققا تىنىمسىز تارالىپ جاتقانى ۇتىمدى, ال مەندە ونداي كولەم قۋالاۋ دەگەن جوق. از شىعارسام دا تاپ-تۇيناقتاي, بارلىق تالاپقا ساي بولۋى ءتيىس. سىنعان, مايىسقان قامىردى ەشقاشان وراتپايمىن. مەنىڭ جۇمىسشىلارىم دا ونداي ءجۇردىم-باردىم ارەكەتكە بارا المايدى, ويتكەنى, مەنىڭ تالاپتارىمنان حاباردار. ەگەر سونى بىلە تۇرا ابايسىزدا جەرگە ءتۇسىپ قالعان قامىردى قوراپقا سالا سالسا, ونىسى بەينەكامەراعا ءتۇسىپ قالادى.
گۇلميرا قوڭقاشەۆا ءۇش پەرزەنت ءوسىرىپ وتىرعان اياۋلى انا, ارداقتى اجە. جولداسى تالعات تا وسى زاۋىتتا تىزە قوسىپ بىرگە جۇمىس ىستەيدى, ديرەكتوردىڭ ورىنباسارى. «وسىنداي اقىلشى ەر-ازاماتىم بولماسا, مۇنشاما ءىستى دوڭگەلەتە الىپ كەتەرىم نەعايبىل ەدى», دەيدى زايىبى تۋرالى گۇلميرا قادىرقىزى. استانادا قىزمەت ىستەيتىن ۇلكەن ۇلىنان ەكى نەمەرەسى بار. ەكىنشى ۇلى دا ەلوردادا تۇرادى. ال ءسۇت كەنجەسى ساياجاننىڭ جاسى 7-گە ەندى تولادى. 45 جاسقا تاقاعاندا دۇنيەگە اكەلگەن ەركە قىزى دەسە گۇلميرا اپايدىڭ جانى بولەك. «كەيدە سول ساياجانىما كوڭىل بولۋگە ۋاقىت تاپپايمىن, بىراق كۇتۋشىسى ونى كەز كەلگەن ۋاقىتتا ءوزى اكەلىپ كورسەتىپ تۇرادى», دەيدى ول.
گۇلميرا قادىرقىزىنىڭ تاعى ءبىر قاسيەتى – قايىرىمدىلىققا ءبىر يىعىن بەرىپ تۇرادى. ءيا, ءبىر قاراعاندا قاتالداۋ, ونشا-مۇنشاعا ىقىلاس تانىتا بەرمەيتىن ءداتى بەرىك جان بولىپ كورىنگەنىمەن, كوپ ارىپتەستەرىنە قاراعاندا قولى اشىق. مەرەكە كەزدەرىندە ءوز ونىمىنەن تولتىرىپ كولىككە تيەپ الادى دا, بالالار مەن قارتتار ۇيىنە جول تارتادى. بۇل ادەتتەن جاڭىلماي كەلە جاتقانىنا قانشا جىل. مىندەتتى تۇردە مول داستارقان ۇيىمداستىرىپ, قوي سويدىرىپ, قازان-قازان ەت استىرادى. انشىلەر مەن بيشىلەردى الدىرادى. ءبىر سوزبەن ايتقاندا, ناعىز شات-شادىمان دۋماندى مەرەكەنىڭ كورىگى قىزادى. قازانداعى سورپاعا «ارزۋ» جايمالارى سالىنىپ, جينالعاندارعا ەت تارتىلادى. كەش سوڭىندا اكەلگەن قايىرىمدىلىق كومەگىن مەكەمە باسشىلارىنا تاپسىرۋدى دا ۇمىتپايدى. ال جاڭا جىل مەرەكەسىندە ءوز ونىمدەرىن تارتۋ ەتكەنىمەن شەكتەلىپ قالماي, بالالار ءۇيىنىڭ بالعىندارىنا اياز اتانىڭ اتىنان سىيلىق تا جاسايدى. مۇنداي اتىمتاي جومارتتىقتىڭ سىرى سونشالىق تەرەڭدە دەپ ويلاماڭىز. بۇل – گۇلميرا قوڭقاشەۆا ءۇشىن كادۋىلگى نارسە.
– جاعدايى بار ءار ادام سولاي جاساۋى ءتيىس, – دەيدى ول. – مەن دە كوپبالالى وتباسىندا ون بالانىڭ جەتىنشىسى بولىپ دۇنيەگە كەلدىم. مەن كورگەن بالالىق شاق نە تاپساڭ دا وزگەلەرمەن ءبولىسۋدى, قيىندىققا تاپ بولعان جاندارعا بارىنشا جاردەمدەسۋدى ءومىردىڭ ەڭ اجىراماس بولىگى رەتىندە ساناما ءسىڭىردى. بىراق ونىڭ قايتارىمى بولار ما ەكەن دەپ ەشقاشان دامەتكەن ەمەسپىن. بۇل ومىردە قانداي تابىسقا جەتسەم دە ءوز كۇشىمە سەنگەندىكتەن, تاباندىلىعىمنان دەپ بىلەمىن.
ورالحان ءداۋىت, «ەگەمەن قازاقستان»
جامبىل وبلىسى