«يۋنەسكو كلۋبتارى شىعارماشىلىق اكادەمياسىنىڭ» جوباسى بولاشاققا جول تارتتى
وسىناۋ بىرەگەي جوبانى جاقىن كۇندەردە ەكى اپتا بويى استانادا قازاقستان رەسپۋبليكاسىنىڭ تۇڭعىش پرەزيدەنتىنىڭ قورىمەن جانە قازاق ۇلتتىق ونەر ۋنيۆەرسيتەتىمەن بىرلەسە وتىرىپ يۋنەسكو كلۋبتارىنىڭ قازاقستان ۇلتتىق فەدەراتسياسى ومىرگە كەلتىرىپ, تۇساۋىن كەستى. جوبا جاستاردى تاعاتتىلىق رۋحىندا تاربيەلەۋ جانە مەملەكەتتىڭ بولاشاقتاعى شىعارماشىلىق الەۋەتىن قالىپتاستىرۋ ماقساتىندا دارىندى وسكەلەڭ ۇرپاقتى دامىتۋعا امبە قولداۋعا باعىتتالعان.
12-17 جاس ارالىعىنداعى 100 دارىندى بالا كوركەمسۋرەت, مۋزىكا, بي جانە ءان ونەرلەرى اتالىمدارى بويىنشا الدىن الا كونكۋرستىق ىرىكتەۋدەن ءوتتى, ولار ەكى اپتالىق جەدەل وقۋ باعدارلاماسىن يگەردى. ەكى نەگىزگى تۇعىر-تياناق – وقىتۋ مەن دامىتۋعا نەگىزدەلگەن باعدارلاماعا ونەر سالاسىنداعى جەتەكشى مامانداردىڭ كاسىبي ساباقتارىنان ءبولەك, كوشباسشىلىق الەۋەتتى دامىتۋ, جاھاندىق ازاماتتىق پەن «الەم مادەنيەتىن» قالىپتاستىرۋ جونىندەگى ترەنينگتەر مەن شەبەرلىك سىنىپتارى ەنگىزىلگەن. سونداي-اق, باعدارلاما اياسىندا بالالار ەلوردانىڭ كورىكتى جەرلەرى مەن قازاقستاننىڭ سۇلۋ تابيعاتىنىڭ سيمۆولىنداي «بۋراباي» ۇلتتىق پاركىنە ساياحات جاساپ, تاماشالادى.
«استانا وپەرانىڭ» كامەرالىق زالىندا بولعان جەڭىمپازداردىڭ كەڭ كولەمدى گالا-كونتسەرتىنە كورەرمەن قاۋىم مول جينالدى. جوبا قورىتىندىسىندا ورىندالعان جان تولقىتار عاجاپ شىعارمالار, كوڭىلدى شاتتاندىرار جارقىن ىرعاقتار, قۇيقىلجىعان اسەم بيلەر, كوز جاۋىن الار كوركەم كارتينالار مەن مۇسىندەر – مىنە, ەلىمىزدىڭ مارتەبەلى مەترلەرى مەن ونەر قايراتكەرلەرى سەكسەن ساعاتتىق قاجىرلى ەڭبەكپەن ءمۇسىندەپ شىققان ناتيجە وسىنداي.
اتالمىش باستامانىڭ وزىنە ءتان ەرەكشە الەۋمەتتىك سيپاتىن اتاپ وتكەن ءجون. ول مۇلدەم اقىسىز, تەگىن نەگىزدە ۇيىمداستىرىلدى. كونكۋرسقا قاتىسۋ ءۇشىن كەرەكتىسى – بار بولعانى قازاقستاننىڭ يۋنەسكو كلۋبتارىنىڭ بىرىنە مۇشەلىك, دارىن جانە ودان ارعى دامۋعا دەگەن ىنتا. يۋنەسكو كلۋبتارى قازاقستان ۇلتتىق فەدەراتسياسى پرەزيدەنتى بىلايشا وي قورىتادى: «ءبىرىنشى «يۋنەسكو كلۋبتارى شىعارماشىلىق اكادەمياسىنىڭ» ستۋدەنتى بولۋ قۇقىعىن الۋ كونكۋرسىنا بارلىعى 500-دەن استام ۇمىتكەر قاتىستى. ءالبەتتە, بالالاردىڭ اكادەميا قابىرعاسىندا العان باعا جەتكىسىز تاجىريبەسى مەن ءبىلىمى ولاردىڭ جان-جۇرەگىندە وشپەس اسەر قالدىرارى ءسوزسىز, ال ەندى بىرەۋلەرىنىڭ كۇللى تاعدىرىن دا وزگەرتىپ جىبەرمەك. ءبىز جوبانىڭ داستۇرگە اينالىپ, جىل سايىن بۇدان دا كوپ بالالاردى قامتيتىنىنا, ولاردىڭ بولاشاق ومىرىنە جولداما بەرەتىنىنە كامىل سەنىمدىمىز».
نازار قاسىم