رەسپۋبليكانىڭ قوعامدىق, ەكونوميكالىق, الەۋمەتتىك-تۇرمىستىق, مادەني ءومىرىنىڭ ايقىن ايناسى, بەت-بەينەسى بولىپ كەلە جاتقان باس باسىلىمنىڭ بەدەل بيىگىنىڭ جوعارىلاۋىنا ۇيىمشىل ۇجىمنىڭ قوسىپ وتىرعان ۇلەسى دە زور. كۇندىز-ءتۇنى, قىسى-جازى جارعاق قۇلاعى جاستىققا تيمەي, جانىن سالىپ جۇرەتىن ەگەمەندىكتەردىڭ ەسەلى ەڭبەگى ءتول مەرەكە قارساڭىندا ەلەندى. بايلانىس ءجانە اقپارات قىزمەتكەرلەرىنىڭ كۇنىنە وراي «ەگەمەن قازاقستان» گازەتىنىڭ ءبىر توپ قىزمەتكەرى ءتۇرلى ماراپاتتارعا يە بولدى.
قازاقستان رەسپۋبليكاسىنىڭ دامۋى مەن وركەندەۋىنە قوسقان ۇلەسى مەن ءمىنسىز قىزمەتى ءۇشىن اقپارات جانە كوممۋنيكاتسيالار مينيسترلىگىنىڭ قۇرمەت گراموتاسىمەن گازەتتىڭ فوتوتىلشىسى ەرلان وماروۆ, بەت قاتتاۋشى اسەل التىشەۆا, كوررەكتور اقبايان سنازاروۆا ماراپاتتالدى. ال, «نۇر وتان» پارتياسىنىڭ باق سالاسى بويىنشا جىل سايىن ۇيىمداستىراتىن سايىسىندا «ەگەمەن قازاقستاننىڭ» جامبىل وبلىسى بويىنشا مەنشىكتى ءتىلشىسى ورالحان ءداۋىت توپ جاردى. ول «نۇر سۇڭقار» جۇلدەسىنىڭ يەگەرى اتاندى.
«ەگەمەن قازاقستاننىڭ» مەنشىكتى تىلشىلەرى وڭىرلەردەگى وتكىر دە وزەكتى ماسەلەلەردى گازەت بەتىندە ۇدايى كوتەرىپ كەلەدى. وسىنداي ەڭبەگى ەلەنگەن ءتىلشىمىزدىڭ ءبىرى – سولتۇستىك قازاقستانداعى ءومىر ەسقالي. ول قازاقستان رەسپۋبليكاسى اقپارات جانە كوممۋنيكاتسيالار مينيسترلىگىنىڭ «اقپارات سالاسىنىڭ ۇزدىگى» توسبەلگىسىنە جانە جۋرناليستەر وداعىنىڭ «قازاقستاننىڭ قۇرمەتتى ءجۋرناليسى» اتاعىنا يە بولدى. سونداي-اق, «اقپارات سالاسىنىڭ ۇزدىگى» توسبەلگىسىمەن ماراپاتتالعانداردىڭ قاتارىندا, گازەتتىڭ شولۋشىسى انار تولەۋحان دا بار. مەنشىكتى تىلشىلەرىمىز ءنازيرا جارىمبەتوۆا مەن باقبەرگەن امالبەك قوستاناي جانە اقمولا وبلىسى اكىمدەرىنىڭ بۇقارالىق اقپارات قۇرالدارى ءۇشىن ارنايى تاعايىنداعان باس جۇلدەسىنە يە بولدى. سونداي-اق, ءفوتوتىلشىمىز ەرلان وماروۆ قازاقستان جۋرناليستەر وداعىنىڭ راحىمباي حاناليەۆ اتىنداعى سىيلىعىمەن ماراپاتتالدى.
«ەگەمەن قازاقستان» گازەتىنىڭ ارداگەرى, قاراعاندى وبلىسىندا مەنشىكتى ءتىلشى بولىپ قىزمەت ەتكەن قارىمدى قالامگەر ايقىن نەسىپباي «ماماندىققا ادالدىق» اتالىمى بويىنشا قاراعاندى وبلىسى اكىمىنىڭ «التىن سۇڭقار» سىيلىعىنىڭ يەگەرى اتاندى.
ارىپتەستەرىمىزدى وسىنداي زور تابىستارىمەن قۇتتىقتاي وتىرىپ, الداعى ۋاقىتتا دا شىعارماشىلىق بيىكتەردەن كورىنە بەرۋىنە تىلەكتەسپىز.
«ەگەمەن-اقپارات»