پارلامەنت سەناتىنىڭ جالپى وتىرىسىندا پالاتا دەپۋتاتى قۋانىش ايتاحانوۆ ۇكىمەت باسشىسى كارىم ماسىموۆكە دەپۋتاتتىق ساۋال جولدادى. وندا ەل تۇرعىندارىنىڭ ءبىراز بولىگى ءۇشىن اسا كوكەيكەستى بولىپ تابىلاتىن تۇرعىن ءۇي ماسەلەسى كوتەرىلىپ, بىلاي دەلىنەدى:
«ەلىمىزدە تۇرعىن ءۇي ماسەلەسىن شەشۋدىڭ ەڭ ءتيىمدى جولى – جەكەمەنشىك تۇرعىن ءۇي قۇرىلىسى. الايدا, جەر كودەكسىندەگى رەسپۋبليكا ازاماتتارىنىڭ جەكە ءۇي قۇرىلىسىن ءجۇرگىزۋ ءۇشىن جەر تەلىمىن الۋعا قۇقى بار دەگەن زاڭ تالابى, ءۇي سالۋعا جەر تەلىمى ينفراقۇرىلىمى بار جەرلەردەن بەرىلەدى دەگەن نورماعا بايلانىستى, ورىندالماي كەلەدى.
ال جەكە ءۇي قۇرىلىسى ينفراقۇرىلىمىنا قارجى وتە از بولىنەدى, كەيبىر وڭىرلەردە مۇلدە بولىنبەيدى. سالدارىنان جەكە تۇرعىن ءۇي سالۋ ءۇشىن جەر تەلىمىن الۋ كەزەگى سوڭعى 10 جىلدا 14 ەسەگە ءوسىپ, 1,4 ملن. ادامدى قۇرادى. بۇل تۇرعىندار اراسىندا نارازىلىق تۋدىرۋدا. جەر رەفورماسىنا بايلانىستى كەلىپ جاتقان ۇسىنىس-سۇراقتاردىڭ 75%-ى وسى ماسەلەگە ارنالعان. جاستار ۇيلەنىپ جەكە ءۇي بولىپ شىققىسى كەلەدى, بىراق باسپانا جوق. جەكە ءۇي سالىپ الايىن دەسە, جەر تەلىمى جوق. مەملەكەتتىڭ بارلىق ازاماتتاردى باسپانامەن قامتاماسىز ەتۋى مۇمكىن ەمەس ەكەنى بەلگىلى. ۇكىمەت جەكە ازاماتتاردىڭ الەۋەتىن پايدالانىپ, جەكە تۇرعىن ءۇي سالۋدا بارىنشا قولداۋ كورسەتۋ كەرەك. ازاماتتارعا ءۇي سالۋعا جەر تەلىمى بەرىلسە, ولار ءوز قارجىلارىمەن ءۇي سالىپ الادى. مەملەكەتتىڭ ۇنەمدەلگەن قارجىسىن جاعدايى تومەن, كوپبالالى وتباسىلارىنا قولجەتىمدى تۇرعىن ۇيلەر سالۋعا جۇمساۋعا بولادى. باسپانا ماسەلەسى تەزدەپ شەشىلەدى, ەكى جاققا دا ءتيىمدى.
سوندىقتان ۇكىمەت جەكە تۇرعىن ءۇي سالۋدى جەدەلدەتۋ ءۇشىن جەر تەلىمدەرىن بەرۋ ماسەلەسىن شەشىپ, جەكە ءۇي سالۋشىلارعا مەملەكەتتىك قولداۋ كورسەتۋدى, ارزان, ۇزاق مەرزىمدى نەسيە, ينفراقۇرىلىم سالۋ, قۇرىلىس ماتەريالدارىمەن قامتاماسىز ەتۋ, ت.ب. ماسەلەلەردى قاراستىراتىن ارنايى «جەكەمەنشىك ءۇي قۇرىلىسىن جۇرگىزۋ تۋرالى» زاڭ جوباسىن ازىرلەپ, پارلامەنتكە ەنگىزۋى كەرەك دەپ ەسەپتەيمىن.
باسپانا ماسەلەسى دەموگرافياعا, ەل تاۋەلسىزدىگىنە تىكەلەي اسەر ەتەتىن وتە ۇلكەن ماڭىزدى الەۋمەتتىك ماسەلە ەكەنىن ەستەن شىعارماۋىمىز كەرەك».