وڭتۇستىك قازاقستان وبلىسىنىڭ ورتالىعى – شىمكەنت قالاسىنان سولتۇستىككە قاراي 45 شاقىرىم جەردە قارابۇلاق دەگەن اۋىل بار. حالقىنىڭ سانى 45 مىڭ ادامدى قۇرايتىن وسى ەلدى مەكەندە №81 ۇلىقبەك اتىنداعى مەكتەپ ديرەكتورى ح.حالتاەۆتىڭ جالعان ديپلومى تۋرالى اقپاراتتىڭ تاراعانىنا ءبىراز ۋاقىت ءوتتى. ۇمىتىلا باستاعان بۇل جايدى جاقىندا رەداكتسيامىزعا اتالعان اۋىل تۇرعىنى م.ەلتاەۆادان كەلىپ تۇسكەن حات قايتا جاڭعىرتتى.
بۇعان دەيىنگى اۋىل تۇرعىنى تاراپىنان جازىلعان حاتتا ناقتى دايەكتەر كەلتىرىلمەگەندىكتەن, ءبىز ونى قاراۋدان باس تارتقانبىز. الايدا, ەكىنشى حاتىندا ءوز سوزىنە ايعاق بولاتىنداي قۇجاتتارىمەن قوسا جىبەرىپتى. ونىڭ جازۋىنا قاراعاندا, №81 ۇلىقبەك اتىنداعى مەكتەپ ديرەكتورى ح.حالتاەۆ وزبەكستان مەملەكەتتىك الەم تىلدەرى ۋنيۆەرسيتەتىن بىتىرمەگەن. ولاي بولسا, قولىنداعى ديپلومى دا جارامسىز.
م.ەلتاەۆا بۇل ماسەلە بويىنشا سايرام اۋداندىق ءبىلىم ءبولىمىنىڭ مەڭگەرۋشىسى و.قولداسوۆاعا جۇگىنگەنمەن, شەنەۋنىك تاراپىنان ءالى كۇنگە جاۋاپ بەرىلمەگەن. ەسەسىنە سايرام اۋدانى اكىمىنىڭ ورىنباسارى ت.كەرىمبەكوۆ وزبەكستان جوعارى جانە ورتا كاسىپتىك ءبىلىم مينيسترلىگىنىڭ 29.02.2016 جىلعى №16ل/4673 حاتىنا سىلتەمە جاساي وتىرىپ, حالتاەۆ حامراقۇل ابدۋلحاميدوۆيچ وزبەكستان مەملەكەتتىك الەم تىلدەرى ۋنيۆەرسيتەتى رەكتورىنىڭ 04.07.1994 جىلعى №67-3 بۇيرىعىمەن №260703 ديپلومى بەرىلگەندىگىن قۋاتتاعان. اكىمنىڭ ورىنباسارى بۇل رەتتە و.قولداسوۆادان الىنعان تۇسىنىكتەمەدە شاعىمدانۋشى م.ەلتاەۆادان ەشقانداي دا ارىز تۇسپەگەندىگىن جەتكىزگەن. ال وزبەكستاندىق ءبىلىم ورداسىنىڭ وقۋ ءىسى بويىنشا پرورەكتورى ح.حاكيموۆتىڭ 26.06.2015 جىلعى №03/1077 جاۋابىنا قاراعاندا, 2015 جىلدىڭ 12 ماۋسىمىندا شىعارىلعان №257 «ۋنيۆەرسيتەتتىڭ ستۋدەنتتىك ءبولىمىندە قۇجاتتاردى تۇگەندەۋ تۋرالى» بۇيرىعىنا وراي جۇمىس جۇرگىزىلگەن. سوندا انىقتالعانى حامراقۇل حالتاەۆ رەسپۋبليكالىق پەداگوگيكالىق ينستيتۋتتىڭ سىرتتاي وقىتۋ بويىنشا ۇلتتىق مەكتەپتەردەگى ورىس ءتىلى مەن ادەبيەتى فاكۋلتەتىندە 645 ستۋدەنتتىڭ اراسىنان تابىلمادى.
مىنا جايتقا نازار اۋدارتقاندى ءجون كورىپ وتىرمىز. اتالعان وقۋ ورداسىنىڭ مۇراعاتىندا ونداي ستۋدەنتتىڭ وقىماعاندىعى ايقىن بولعانىمەن, كادرلار بولىمىندە ساقتالعان 4 شىلدە 1994 جىلعى №67/ز بۇيرىعىنىڭ تاعى ءبىر ءتۇپنۇسقاسىندا 646 ستۋدەنتتىڭ اراسىنا حامراقۇل ابدۋلحاميدوۆيچ حالتاەۆتىڭ اتى-ءجونى بەلگىسىز بىرەۋلەر تاراپىنان ەنگىزىلىپتى. سوندىقتان دا جۇمىس توبى جالعان ءمالىمەتتەر نەگىزىندە حامراقۇل ابدۋلحاميدوۆيچ حالتاەۆتىڭ اتىنا بەرىلگەن №260703 ديپلومدى جارامسىز دەپ تاپقان. ونىڭ ۇستىنە, وقو ادۆوكاتتار القاسىنىڭ جەكە ادۆوكاتى ت.جولداسوۆانىڭ سۇرانىمىنا وراي جاۋاپتا وزبەكستان مەملەكەتتىك الەم تىلدەرى ۋنيۆەرسيتەتى مۇراعات ءبولىمىنىڭ مەڭگەرۋشىسى ۋ.يساەۆا 1994 جىلعى ۇلتتىق مەكتەپتەردە ورىس ءتىلى مەن ادەبيەتى فاكۋلتەتىن سىرتتاي بىتىرگەندەردىڭ تىزىمىندە حامراقۇل ابدۋلحاميدوۆيچ حالتاەۆتىڭ اتى-ءجونى جوقتىعىن حابارلاعان.
وقىرمانعا تۇسىنىكتى بولۋ ءۇشىن وزبەكستان پرەزيدەنتىنىڭ جارلىعىمەن رەسپۋبليكالىق پەداگوگيكالىق ينستيتۋتى مەن ف.ەنگەلس اتىنداعى تاشكەنت مەملەكەتتىك شەت تىلدەرى پەداگوگيكالىق ينستيتۋتى بىرىكتىرىلىپ, وزبەكستان مەملەكەتتىك الەم تىلدەرى ۋنيۆەرسيتەتى بولىپ قۇرىلعانىن ايتا كەتۋ كەرەك. تاعى ءبىر ماسەلەگە نازار اۋدارتا كەتكەن ءجون. وزبەكستان جوعارى جانە ورتا كاسىپتىك ءبىلىم مينيسترلىگى قۇقىق ءبولىمىنىڭ باسشىسى ي.ا.ابدۋللاەۆ وقو ادۆوكاتتار القاسىنىڭ جەكە ادۆوكاتى ت.نۇرجانوۆقا بەرگەن جاۋابىندا اتالعان ءبىلىم ورداسى رەكتورىنىڭ بۇيرىعىنا سىلتەمە جاساي وتىرىپ, حامراقۇل ابدۋلحاميدوۆيچ حالتاەۆقا ۇلتتىق مەكتەپتەردە ورىس ءتىلى مەن ادەبيەتىنىڭ بىلىكتى مۇعالىمى ماماندىعى بەرىلگەندىگىن جازىپتى. ال «باحتيور كالكون» ادۆوكاتتىق فيرماسىنىڭ سۇرانىمىنا وراي بەرگەن جاۋاپتا ونداي ءبولىمنىڭ جوق ەكەندىگى ايتىلادى. جوعارى جانە ورتا كاسىپتىك ءبىلىم ۆيتسە-ءمينيسترى م.ينوياتوۆ ءوزىنىڭ 2016 جىلعى 25 ءساۋىر كۇنگى №284 جاۋابىندا اتالعان ۆەدومستۆودا ونداي قۇقىقتىق ءبولىمنىڭ جوق ەكەنىن جانە ي.ا.ابدۋللاەۆ دەگەن قىزمەتكەردىڭ جۇمىس ىستەمەيتىندىگىن, سونداي-اق, 29.02.2016 جىلعى №26ك/4673 حاتىنىڭ جالعان ەكەندىگىن العا تارتادى.
وسىنداي دالەلدى ايعاقتاردى العا توسقان م.ەلتاەۆانىڭ حاتىنا وراي ءبىز ءمان-جايدى بىلمەككە وڭتۇستىك قازاقستان وبلىستىق ءبىلىم باسقارماسى ءباسپاسوز قىزمەتىنىڭ قىزمەتكەرى ا.امىرتاەۆقا حابارلاستىق. مۇنداي اقپاراتتى ءبىرىنشى رەت ەستىپ تۇرعاندىعىن ايتقان ازات ەرمەكباي ۇلى جەرگىلىكتى ءبىلىم ءبولىمىنىڭ باسشىسىن اۋدان اكىمى, ال ءبىلىم ءبولىمىنىڭ باسشىسى مەكتەپ ديرەكتورىن تاعايىندايتىندىعىن كولدەنەڭ تارتىپ, ساۋاتىمىزدى ءبىر اشىپ تاستادى. سوندىقتان بارلىق جاۋاپكەرشىلىك سولاردا, دەي كەلىپ: «ءبىز سىزگە نە كومەك بەرە الامىز؟», دەگەن ساۋالىن دا ۇمىتقان جوق. سىزدەرگە كومەك بەر دەپ جاتقان جوقپىز, مەن تەك وسىنداي ماسەلە بار دەپ ايتپاقشىمىن دەگەننەن كەيىن عانا: «مەن سۇراستىرىپ كورەيىن. اۋدانعا حابارلاسايىن. حابارسىزبىن», دەپ جاۋاپ قاتتى.
ءبىلىم سالاسىندا ءجۇرىپ, بۇقارالىق اقپارات قۇرالدارىندا ءوز سالاسى بويىنشا جازىلعان جايتتارعا نازار اۋدارماعان ماماندى قالاي تۇسىنۋگە بولادى؟ ونىڭ ۇستىنە بۇل ماسەلە كەشە نەمەسە بۇگىن قوزعالىپ وتىرعان جوق. سوندىقتان دا ءبىز وسى ماسەلە بويىنشا سايرام اۋدانىنىڭ اكىمى س.ساپارباەۆپەن حابارلاسقانىمىزدا, ول ءوزىنىڭ قىزمەتىنە كىرىسكەنىنە كوپ بولا قويماعانىن العا تارتتى. «بۇل ماسەلە ابدەن تەكسەرىلگەن, انىقتالعان, جاۋابى دايىن. ءبىلىم ءبولىمىنىڭ باسشىسىنان سۇرادىم, ونداي فاكتىلەر انىقتالىپ, ءتيىستى ورگانداردان جاۋابىن العانبىز دەپ وتىر. قاجەت بولسا, جاۋابىن جولدايىق, بىراق وبەكتيۆتى قاراۋ كەرەك. ءبىر ارىزقوي جازدى ەكەن دەپ, ءبارىن قارالاۋعا بولمايدى عوي. ءتيىستى قۇزىرلى مەكەمەلەر سۇراۋ جاساتىپ, انىقتاپ قويعان. ورگاندار دۇرىس انىقتاماسا, جاۋاپ بەرەدى», دەدى سامات ايدارحان ۇلى.
سونداي-اق, اۋداندىق پروكۋروردىڭ كومەكشىسى سۋحراب قاھاروۆقا تەلەفون شالعانىمىزدا, ول رەسمي تۇردە باسشىلارمەن سويلەسۋىم كەرەكتىگىن ەسكەرتتى. «ەكىنشىدەن, بۇل ماسەلە بويىنشا قىلمىستىق ءىس قوزعالىپ وتىر. سوعان سايكەس بەرىلگەن سۇراۋ حات سىرتقى ىستەر مينيسترلىگى ارقىلى وزبەكستانعا جولدانعان. بۇگىنگى تاڭدا جاۋابى ءالى كەلگەن جوق. سايرام اۋداندىق ىشكى ىستەر باسقارماسى تاراپىنان تەرگەۋ ىستەرى جۇرگىزىلدى. ىشكى ىستەر باسقارماسىنان بىلگەنىڭىز دۇرىس», دەدى پروكۋرور. ىشكى ىستەر باسقارماسىنىڭ ءىس-ارەكەتتەرى پروكۋراتۋرا نازارىندا بولاتىنىن قاپەرگە الىپ, ازىرگە وسى جەردەن توقتادىق.
قورىتا ايتقاندا, ءبىز وقو سايرام اۋدانى قارابۇلاق اۋىلىنداعى №81 ۇلىقبەك اتىنداعى مەكتەپ ديرەكتورى ح.حالتاەۆتىڭ ديپلومىنىڭ جالعان ەكەنىن اشكەرەلەۋدى باستى ماقسات ەتكەن جوقپىز. ماقالانى جازۋداعى نەگىزگى ماقساتىمىز – ءبىلىم بەرۋ مەكەمەسىن ءوز ءىسىنىڭ مامانى, بىلىكتى پەداگوگ باسقارسا دەگەن نيەت. سوندىقتان دا جوعارىدا قۇجاتتىق دالەلدەردى كەلتىردىك. ولاي بولسا, ءبىز قارسى جاقتىڭ دا ءۋاجىن تىڭداۋعا ءازىرمىز جانە بۇل ماسەلەگە تۇپكىلىكتى نۇكتە قويعاندى ءجون سانايمىز.
اسقار تۇراپباي ۇلى,
«ەگەمەن قازاقستان»