ەن جايىلىپ, 57 ساياجايدى سۋ باستى
سوڭعى كۇندەرى ەرتىس وزەنىنىڭ ەرنەۋى تولىپ اعۋدا. قالانى قاق جارىپ اعىپ جاتقان ارىنى قاتتى وزەن كەي تۇستا ارناسىنان اسىپ, وسكەمەندىكتەردىڭ سۇيىكتى دەمالىس ورىندارى سانالاتىن عاشىقتار اللەياسى مەن ستانيسلاۆسكي جاعالاۋىنداعى جۇرگىنشى جولدارىنا, كومسومول جانە پيونەر ارالدارىنا تاسىعان سۋ جايىلىپ كەتتى. سونداي-اق, جاعالاۋعا جاقىن 57 ساياجاي سۋ استىندا قالدى.
كەشە وبلىس اكىمىنىڭ ورىنباسارى د.گاريكوۆ ەرتىستەگى سۋ دەڭگەيىنىڭ كوتەرىلۋىنە بايلانىستى ءباسپاسوز بريفينگىن وتكىزىپ, اتالعان جاعدايعا قىتاي ەلىندەگى تاسقىن مەن وڭىرىمىزدەگى جاۋىن-شاشىننىڭ تولاستاماۋى جانە التايداعى قار ماسسيۆتەرىنىڭ ەرۋى اسەر ەتىپ وتىرعانىن ايتتى. جەرگىلىكتى بيلىك قىتايدا 10 ماۋسىمنان باستاپ ءۇستى-ۇستىنە بولعان تاسقىن تۋرالى داعدارىس ورتالىقتارى ارقىلى الدىن الا قۇلاعدار بولعان ەكەن. 16 ماۋسىمنان بەرى قارا ەرتىستەگى سۋ كولەمىنىڭ شامادان تىس ارتۋىنىڭ نەگىزگى سەبەبى – وسى. قىتاي تاراپىنىڭ تولاسسىز نوسەردە لىق تولعان توعانداعى ارتىق سۋدى اعىزۋىنا بايلانىستى قارا ەرتىسكە سەكۋندىنا 2100 تەكشە مەتر سۋ كەلدى. بۇعان جول-جونەكەي تاۋ وزەندەرىنىڭ قوسىلاتىنىن ەسەپتەڭىز. ياعني, بۇقتىرما سۋ قويماسىنا سەكۋندىنا 3308 تەكشە مەترگە دەيىن سۋ قۇيىلدى. وسىعان وراي بۇقتىرما گەس-دە سوڭعى جارتى عاسىردا بولماعان سۋ جينالىپ وتىر.
جالپى, وسكەمەن قالاسى بويىنشا ەرتىس سۋىنىڭ دەڭگەيى 300 ميلليمەترگە كوتەرىلسە قاۋىپتى سانالادى. ال قازىر سۋ دەڭگەيى 413 ميلليمەترگە جەتتى. وبلىس اكىمىنىڭ ورىنباسارى سۋ العان ساياجايلار وزەن جاعالاۋىنا جاقىن سۋ قورعاۋ ايماعىنا ورنالاسقاندىعىن جەتكىزدى. بۇل زىريان اۋدانىندا سۋ استىندا قالعان دەمالىس بازالارىنا دا قاتىستى.
– قازىرگى كەزدە وبلىس ورتالىعىنداعى سۋ باسقان ساياجايلاردان 105 ادام قاۋىپسىز جەرگە كوشىرىلىپ, قالاداعى 5 مەكتەپ پەن الەۋمەتتىك نىساندارعا ءبولىنىپ ورنالاستى. ءتيىستى قۇرىلىمدار سۋ باسقان اۋماقتاردا جۇمىس ىستەپ جاتىر. تۇرعىندارعا كۇردەلى جاعداي بولمايتىنىن, 4-5 كۇننەن كەيىن جاعداي رەتتەلەتىنىن ايتقىم كەلەدى. جاعداي تولىعىمەن قاداعالاۋدا, – دەدى د.گاريكوۆ.
دۋمان اناش,
«ەگەمەن قازاقستان»
شىعىس قازاقستان وبلىسى