ەۋرازيا ۇلتتىق ۋنيۆەرسيتەتى جانىنداعى «وتىرار كىتاپحاناسى» عىلىمي ورتالىعىنىڭ ۇيىمداستىرۋىمەن 1916 جىلعى ۇلت-ازاتتىق كوتەرىلىسكە – 100 جىل تولۋىنا وراي «ەر قازاق ەجەلدەن – ەركىندىك اڭساعان» اتتى كورمە اشىلدى. اپتا بويى حالىققا قىزمەت كورسەتىپ, كورمەگە 1916 جىلعى ۇلت-ازاتتىق كوتەرىلىستىڭ مۇراعات قۇجاتتارى, كوتەرىلىسكە قاتىستى سۋرەتتەر مەن زەرتتەۋلەر, اقىن-جازۋشىلاردىڭ شىعارمالارى ورنالاستىرىلدى. سونىمەن قوسا, «وتىرار كىتاپحاناسى» عىلىمي ورتالىعىنىڭ ديرەكتورى, جازۋشى تۇرسىن جۇرتبايدىڭ باستاماسىمەن دايىندالعان 3 تومدىق باسىلىمنىڭ قولجازباسى قويىلادى.
باستى ماقسات – تاۋەلسىزدىك جولىندا ويانعان ۇلتتىق سانا, اتا-بابالارىمىزدىڭ قاندى جورىقتارى, داۋىلدى ازاتتىق كۇرەس جولدارى, ەل بوستاندىعى مەن بىرلىك جولىن كورەرمەنگە اشىق كورسەتۋ, ۇعىندىرۋ. كورمە اشىلۋىنىڭ العاشقى كۇنىندە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پرورەكتورى, فيلولوگيا عىلىمدارىنىڭ دوكتورى ديقان قامزابەك ۇلى ارنايى قۇتتىقتاۋ تىلەگىن ءبىلدىردى.
3 تومدىق قولجازبانى جيناۋعا كىتاپحانانىڭ بارلىق عىلىمي قىزمەتكەرلەرى ءبىر كىسىدەي اتسالىسقان. جانبولات كارىپباەۆ مۇراعاتتىق ەڭبەكتەرمەن اينالىسقان, بۇل ىسكە «الماتى قالاسىنىڭ ورتالىق مەملەكەتتىك مۇراعاتتىق قورىنىڭ» ۇلكەن كومەگى تيگەنىن تىلگە تيەك ەتتى. قولجازبانى كىتاپ ەتىپ شىعارۋعا ۇلتتىق اكادەميالىق كىتاپحانا جانە «وتىرار كىتاپحاناسى» عىلىمي ورتالىعىنىڭ قىزمەتكەرلەرى بىرىگىپ, ءبىر كىسىدەي اتسالىسىپ جاتىر.
ارداق ساماتقىزى,
ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ ستۋدەنتى