2017 جىلى الماتىدا وتەتىن قىسقى ۋنيۆەرسياداعا دايىندىق جانە وتكىزۋ ديرەكتسياسى باسشىسى نايل نۋروۆ بۇقارالىق اقپارات قۇرالدارى وكىلدەرىمەن كەزدەسۋى بارىسىندا قالانىڭ 64 ەلدىڭ سپورتشىلارى مەن دەلەگاتتارىن ەركىن قابىلداي الاتىنىن ايتا كەلىپ, ءىس جۇزىندە ولاردىڭ قاتارى 50 ەلمەن شەكتەلىپ قالۋى ىقتيمال ەكەنىن اتاپ ءوتتى.
«ءبىز الماتىنىڭ ۋنيۆەرسيادا كەزىندە 64 ەلدى قابىلداي الاتىنىن ايتا الامىز. بۇل – ەڭ جوعارى كورسەتكىش. بىزدەگى اتلەتتەر قالاشىعىنىڭ, سپورتتىق نىسانداردىڭ, ترانسپورت جانە لوگيستيكامىزدىڭ 64 ەلدىڭ 5000-عا جۋىق سپورتشىسىن قابىلداۋعا مۇمكىندىگى جەتەدى», – دەدى نايل نۋروۆ.
كەزدەسۋدە ول بۇعان دەيىنگى رەكوردتىق كورسەتكىش ەرزۋرۋم قالاسىندا تىركەلگەنىن تىلگە تيەك ەتتى. ەرزۋرۋمدە 52 ەلدىڭ ستۋدەنتتەرى ۋنيۆەرسياداعا قاتىسقان ەكەن. «ويىندار ەۋروپادا وتكەن كەزدە لوگيستيكانى جەڭىلدەتەتىنى راس. ەۋروپادا ۋنيۆەرسياداعا قاتىسپايتىن ەل جوق. ءبىز ەرزۋرۋمنىڭ رەكوردىن جاڭارتۋعا ۇمتىلدىق. بىراق الەمدى جايلاپ وتىرعان ەكونوميكالىق قيىن جاعدايلار ونىڭ ورىندالۋىنا كەدەرگى بولدى. بىزگە 64 ەلدەن ەمەس, 50 ەلدىڭ سپورتشىلارى كەلۋى مۇمكىن دەپ جوبالاپ وتىرمىز. بىراق تىركەلۋ جۇمىستارى اياقتالعان جوق. جىل سوڭىنا دەيىن ۋاقىت بار», – دەدى ديرەكتسيا باسشىسى.
نايل نۋروۆ ۇلتتىق ستۋدەنتتەر سپورتى فەدەراتسيالارىنىڭ ۋنيۆەرسياداعا قاتىسۋىن قامتاماسىز ەتۋ حالىقارالىق ستۋدەنتتەر سپورتى وداعىنىڭ (FISU) قاراۋىندا ەكەنىنە دە توقتالدى. «ءبىز وسى ماسەلە بويىنشا FISU كومەگىنە جانە قازاقستان ۇلتتىق سپورتتىق ستۋدەنتتەر وداعىنىڭ كومەگىنە جۇگىنەمىز», – دەدى ول.
ءمالىم بولعانداي, FISU رەگلامەنتى بويىنشا قاتىسۋعا مۇمكىندىك بەرەتىن اككرەديتاتسياعا ءوتىنىش جىبەرۋ 2016 جىلدىڭ 29 قاڭتارىنان 2017 جىلدىڭ 29 قاڭتارىنا دەيىن جالعاسادى.
ايتا كەتەيىك, ۋنيۆەرسياداعا اككرەتيزاتسيالاۋدىڭ ءبىرىنشى كەزەڭىندە 64 ەل قاتىسۋعا ءوتىنىش بىلدىرگەن. ەكىنشى كەزەڭدە قاتىسۋشى ەل كوماندا ءتىزىمى مەن سپورت تۇرلەرى, سپورتشىلار مەن رەسمي ادامداردىڭ سانى ناقتىلانۋى ءتيىس.
دامير قوجامقۇل