جامبى اتۋ – قازاق حالقىنىڭ ۇلتتىق جاۋىنگەرلىك ويىنى. ەرتەدە كەڭ تاراعان مەرگەندەر سىنىنىڭ بۇل ويىن ءتۇرى سوڭعى ۋاقىتتا مۇلدە ۇمىتىلا باستاعانداي ەدى. بۇگىندە ونى قايتا جانداندىرۋ ماقساتىندا وبلىستىق بالالار مەن جاسوسپىرىمدەردىڭ سپورت مەكتەبىندە جامبى اتۋ ۇلتتىق سپورت تۇرىنەن جارىس ۇيىمداستىرىلعاندىعىن ەستىگەندە, كوڭىلىمىز ءبىر جادىراپ قالدى.
ەرتەدە جامبى اتۋ ويىنىندا اتپەن شاۋىپ كەلە جاتىپ جىگىتتەر ەكپىنىن باسەڭدەتپەستەن, قۇرۋلى باقان ۇستىندەگى نىسانانى اتىپ قۇلاتۋى ءتيىس بولعان. ەرەجە بويىنشا جىگىتتەر سورەدە ءوز سايگ ۇلىكتەرىنىڭ جانىنان تابىلۋلارى كەرەك. تورەشى بەلگى بەرگەننەن كەيىن ولار اتتارىن تەز ەرتتەپ, شابا جونەلىپ, جولىنداعى نىسانالاردى اتىپ قۇلاتۋلارى قاجەت بولاتىن. تورەشىلەردىڭ ۇيعارىمىمەن نىسانالار دا بىرنەشەۋ بولۋى مۇمكىن.
وبلىس تاريحىندا تۇڭعىش رەت ۇيىمداستىرىلىپ وتىرعان بۇل ۇلتتىق سپورت ءتۇرىنىڭ سالتاناتتى اشىلۋىنا كراسنويار اۋىلدىق وكرۋگىنىڭ اكىمى بازارباي ءابۋوۆ پەن وبلىستىق دەنەشىنىقتىرۋ جانە سپورت باسقارماسى باسشىسىنىڭ ورىنباسارى ءالىمجان مولداعالي قاتىسىپ, قاتىسۋشىلارعا ساتتىلىك تىلەدى. سونىمەن قاتار, وبلىستىق بالالار مەن جاسوسپىرىمدەر سپورت مەكتەبىنىڭ ۇلتتىق سپورت تۇرلەرىنىڭ جاتتىقتىرۋشىسى, جامبى اتۋدىڭ دايارلىق كۋرسىنان وتكەن ايبولات ەستاي قاتىسۋشىلارعا ارناپ, جامبى اتۋدان شەبەرلىك سىنىبىن وتكىزدى.
جامبى اتۋعا بارلىعى 28 تالاپكەر قاتىستى. جاسوسپىرىمدەر تۇرەگەلىپ تۇرىپ, 10 مەتر قاشىقتىقتى 5 مارتەدەن كوزدەدى. مۇندا 32 ۇپاي جيناعان كراسنويارلىق راحمان داۋلەتحان توپ باستادى. زەرەندى اۋدانىنىڭ ورتاق اۋىلىنان كەلگەن نۇرسۇلتان ورال ودان ءبىر ۇپاي كەم جيناپ, ەكىنشى ورىننان كورىندى. ءۇشىنشى ورىن كراسنويارلىق سانجار بالتاباەۆقا بۇيىردى. ال ەرەسەكتەر اراسىنداعى سايىستا كوكشەتاۋ قالاسىنىڭ تۇرعىنى سەرىك نۇرپەيىسوۆ 31 ۇپايمەن ۇزدىك دەپ تانىلسا, ونىڭ جەرلەسى ەربول تۇقاەۆ 25 ۇپاي جيناپ, ەكىنشى ورىندى يەلەندى. كراسنويار تۇرعىنى ەسبەرگەن سىزدىقوۆ ءۇشىنشى ورىندى مىسە تۇتتى.
وسىنداي ۇلتتىق ويىننىڭ ۇيىمداستىرىلۋىنا قولۇشىن بەرىپ, دەمەۋشىلىك جاساعان قايرات قۇرسارين, داۋرەن قاناپين جانە ەربول تۇقاەۆ سەكىلدى ۇلت جاناشىرلارىنىڭ ىزگى نيەتىنە ءسۇيسىنىس ءبىلدىرمەسكە بولمايدى.
جالپى, ءاربىر وليمپيادالىق ويىنداردان كەيىن ونىڭ باعدارلامالارىنا ەنگەن سپورت تۇرلەرىنىڭ حالىقارالىق بىرلەستىكتەرى ونى قايتا قاراپ, تۇزەتۋلەر, وزگەرىستەر ەنگىزىپ جاتادى. قازاق حالقىنىڭ ۇلتتىق سپورت تۇرلەرىنىڭ ەرەجەلەرىن دە قايتا قاراپ, زامان تالابىنا ساي وزگەرتۋگە بولادى. مىسالى, جامبى اتۋ بياتلوننىڭ ەرەجەسىنە ساي وزگەرتۋگە كەلەدى. تەك شاڭعىنىڭ ورنىنا ات كەرەك. سوندا جاڭا سپورت ءتۇرى جازعى بياتلون, ياعني «قازاق بياتلونى» ومىرگە كەلەر ەدى.
ىرىسالدى شامشيەۆا
اقمولا وبلىسى