وڭىردە جەر كودەكسىنە ەنگىزىلگەن وزگەرىستەردى تەرەڭىرەك ءتۇسىندىرۋ جۇمىستارى بەلسەندى جۇرگىزىلۋدە. جاقىندا وبلىستا جەر ماسەلەلەرى بويىنشا ازاماتتاردى قابىلداۋ قوسىندارى اشىلىپ, جۇمىس ىستەي باستادى. تەك اقتوبە قالاسىندا عانا ءتورت قوسىن اشىلدى. ولاردىڭ بارلىعى جەر ماسەلەلەرىن ءتۇسىندىرۋ ماقساتىندا وبلىس اكىمى بەردىبەك ساپارباەۆتىڭ تاپسىرماسى بويىنشا اشىلىپ وتىر. ءوڭىر باسشىسىنىڭ بۇل باستاماسىن جەر رەفورماسى بويىنشا ۇشجاقتى كوميسسيانىڭ, قوعامدىق كەڭەس جانە وزگە دە قوعامدىق بىرلەستىكتەردىڭ مۇشەلەرى قولدادى. قوسىندار تاحاۋي احتانوۆ اتىنداعى وبلىستىق دراما تەاترىندا, عازيزا جۇبانوۆا اتىنداعى وبلىستىق فيلارمونيادا, قازاقستان حالقى اسسامبلەياسى مەن «نۇر وتان» پارتياسىنىڭ عيماراتتارىندا ورنالاسقان. اقتوبەلىكتەردى «الاش جولى» قوزعالىسى, قوعامدىق بىرلەستىكتەر مەن ساياسي پارتيالار, اتقارۋشى بيلىك وكىلدەرى قابىلداپ, جەرگە قاتىستى ۇسىنىس-پىكىرلەرىن تىڭداۋدا.
تۇرعىنداردى قابىلداپ جاتقان باقىت جانشاەۆانىڭ ايتۋىنشا, وبلىستىق فيلارمونياداعى قوسىنعا 50-دەن استام ادام جولىققان.
– ازاماتتاردى جەكە تۇرعىن ءۇي قۇرىلىسىنا قاجەتتى جەر تەلىمدەرىن بەرۋ, جۇمىسپەن قامتۋ, ءوز شارۋاسىن دامىتۋ ءۇشىن نەسيە الۋ, شارۋا قوجالىقتارىن اشۋ سەكىلدى ءتۇرلى ساۋالدار مازالايدى. ياعني, جەر كودەكسىنە ەنگىزىلگەن وزگەرىستەرگە قاتىستى ساۋالدار شىن مانىندە از, – دەيدى باقىت جانشاەۆا.
ۇشجاقتى كوميسسيانىڭ, اقتوبەلىك «الاش جولى» باستاماشىل قوزعالىسىنىڭ مۇشەسى كوشكىنباي احمەتوۆ اقتوبەلىكتەردى «نۇر وتان» عيماراتىندا ورنالاسقان قوسىندا قابىلدادى.
– ارينە, ءبىز وبلىس اكىمىنىڭ ۇسىنىسىن قولدادىق. مۇندا وبلىستىق كوميسسيا, اتقارۋشى ورگان, ساياسي پارتيالار, قوعامدىق ۇيىمداردىڭ وكىلدەرى قاتىسىپ وتىر. ولاردىڭ ءاربىرى ناقتى جاۋاپ بەرىپ, قۇزىرلى ورگانداردىڭ نازارىنا بارلىق ۇسىنىستاردى جەتكىزبەكشى, – دەپ اتاپ ءوتتى ول.
ايتا كەتۋ كەرەك, ازاماتتاردى قابىلداۋ قوسىندارىنا بارلىعى 100-دەن استام ادام كەلگەن. مۇنداي ورىندار وبلىستىڭ اۋداندارىندا دا ۇيىمداستىرىلعان.
ۇستىمىزدەگى جىلعى 3 مامىردا جەر ءماسەلەسىنە بايلانىستى وبلىستا ۇشجاقتى كوميسسيا قۇرىلعان بولاتىن. وعان «الاش جولى» قوزعالىسىنىڭ بەلسەندىلەرى, ساياسي پارتيالار مەن ۇەۇ وكىلدەرى ەندى. ولاردىڭ ماقساتى وبلىس تۇرعىندارىنان كەلىپ تۇسكەن بارلىق ۇسىنىستار مەن ءتىلەكتەردى ساراپتاپ, رەسپۋبليكالىق كوميسسيا قاراۋىنا جولداۋ بولىپ تابىلادى.
ساتىبالدى ءساۋىرباي,
«ەگەمەن قازاقستان»
اقتوبە وبلىسى