جوەل ادامسون
قازاقستان • 25 قازان, 2024
قازاقستان - مەنىڭ ەكىنشى وتانىم – جوەل ادامسون
1990 جىلدىڭ 25 قازانىندا ازاتتىقتىڭ العىشارتى «ەگەمەندىك دەكلاراتسياسى» قابىلداندى. قازاقستان قازىعىن جەكە-دارا قاققان بۇل كۇنى ەلىمىزدە رەسپۋبليكا كۇنى تويلانادى. ۇلىق مەرەكەنى تويلاۋ 2009 جىلدان 2022 جىل ارالىعىندا ءۇزىلىپ قالدى. رۋح مەيرامىن قايتا مەرەكەلەۋ باستاماسىن مەملەكەت باسشىسى قاسىم-جومارت توقاەۆ 2022 جىلدىڭ ماۋسىم ايىندا ۇلىتاۋدا وتكەن ۇلتتىق قۇرىلتايدا قايتا كوتەرىپ, قازاقستاننىڭ باس مەرەكەسى رەتىندە اتاپ ءوتۋدى ۇسىندى. سول جىلدىڭ قىركۇيەگىندە رەسپۋبليكا كۇنى زاڭدى تۇردە قايتا ورالىپ, ءمورلى جارلىق باسىلدى. پرەزيدەنتىمىز ۇلىق مەرەكە تاۋەلسىزدىك تۇعىرىن شەگەلەۋدى, ونىڭ قادىر-قاسيەتىن ناسيحاتتاۋدى مۇرات ەتەتىنىن ءاردايىم ەسكە سالىپ كەلەدى. بۇل كۇن - تاريحي تاعدىرلى شەشىمدەرگە بويلاپ, بولاشاقتى ويلايتىن ايرىقشا داتا.
