«كونە تۇركىستاننىڭ» ۇلكەن مادەنيەتى

بۇگىندە ەلىمىزگە تۋريستەردى كوبىرەك تارتۋدىڭ جولدارى ىزدەس­تىرىلىپ جاتىر. وڭتۇستىك قازاقستان وبلىسى اكىمدىگىنىڭ ۇيىتقى بولۋىمەن ءتۋريزمدى دامىتۋ باعدارلاماسى بويىنشا «كونە تۇركىستان» تۇجى­رىمداماسى ازىرلەنگەن. يۋنەسكو باعدارلاماسىنا ەنگەن قوجا احمەت ياساۋي كەسەنەسى جانىندا جەر استى مەشىتى, كونە مونشا سياقتى تاريحي ورىندار كوپ.

بۇگىندە وسىنىڭ ءبارى قالپىنا كەلتىرىلىپ جاتىر. قالا اكىمى الىپبەك وسەر­باەۆ­تىڭ ايتۋىنشا, كەسەنە توڭى­رە­گىندە ەنى 4 مەتر, بيىكتىگى 6 مەتر قورعان تۇرعىزىلادى. ورتا­عاسى­ر­لىق عيماراتتار, قورعان­نىڭ سىرت جاعىنان كونە رابات قالاسى مەن تيم بازارى قايتا قال­­پىنا كەلتىرىلەدى. كەرۋەن ساراي­داعى شايحانا مەن شىعىس مەديتسينالىق ورتالىعى, ەتنو­اۋىل مەن تۇران حالىقتارىنىڭ اسكە­ري مۇراجايى, شاعىن كولى بار ساياباق تا سالىنباق. تاري­حي-مادەني ەتنوگرافيالىق ورتا­لىقتا مادەنيەتىمىز بەن سالت-ءداستۇرىمىز سالتانات قۇرادى. مۇن­دا ەسكى مۇ­را­نى قايتا ءتىرىلتىپ جات­قان قول­ونەر­شىلەر مەكتەبى بار. ولار ءوز قا­تارىنا جاس جەت­كىن­شەكتەردى الىپ, قولونەرگە باۋلىپ جاتىر.

تۋريستەر تۇركىستانعا كەلگەن­دە ورتا عاسىرداعى قالاعا كەلگەندەي اسەردە بولۋ ءۇشىن كوپ جۇمىس­تار جاسالىپ جاتىر, – دەيدى قالا اكىمى. بىلتىر ساياحاتشىلار ەسەبى­نەن قازىناعا 4 ملرد. تەڭگەدەي قاراجات ءتۇسىپتى. ياعني, تابىس­تى مولايتۋعا نەگىز بار. « ۇلى جىبەك جولى» بو­يىندا ورنا­لا­سقان تۇركىستاننان 20 شاقى­رىم جەردە كونە ساۋران قالا­شىعى مەنمۇندالايدى. تۇركى حا­لىق­تارىنىڭ رۋحاني ور­تا­لىعىنا ارنايى كەلگەن شەتەل­دىك تۋريستەر ەلىمىزدىڭ باي تاريح, ساۋلەت ونەرىنەن ۇلكەن اسەر العاندىقتارىن ايتادى.

باقتيار تايجان,

«ەگەمەن قازاقستان» وڭتۇستىك قازاقستان وبلىسى