تاۋەلسىزدىك. كەلىسىم. بولاشاعى ءبىرتۇتاس ۇلت
«ماڭگىلىك ەلگە» اپاراتىن باستى قۇندىلىقتار, مىنە, وسىلار
قازاقستان حالقى اسسامبلەياسىنىڭ ءححىV سەسسياسىنىڭ جۇمىسىن تەلەديداردان كورىپ, جۇرەگىمىزگە تاعى دا جىلىلىق ۇيالادى. بيىلعى سەسسيانىڭ نەگىزگى تاقىرىبى –«تاۋەلسىزدىك. كەلىسىم. بولاشاعى ءبىرتۇتاس ۇلت» دەپ اتالۋىنىڭ ءوزى ەلىمىزدەگى بىرلىك پەن تاتۋلىقتىڭ تۇعىرىن بەكىتە تۇسەتىن تىڭ قاعيداتتاردىڭ العا تارتىلاتىنىن ايعاقتاعان-دى. سەسسيادا قابىلدانعان «ماڭگىلىك ەل» پاتريوتتىق اكتىسىنىڭ ءار قازاقستاندىقتىڭ بويىندا ەرتەڭگى كۇنگە دەگەن سەنىمدى نىعايتا تۇسكەنىن ايتۋ ءلازىم. وندا ەلباسىنىڭ ماڭىنا توپتاسۋ ارقىلى ءبىزدىڭ ۇلى جەتىستىكتەرگە جەتكەنىمىز ايتىلدى. «ماڭگىلىك ەلدىڭ وزەگىندە قاراپايىم, تۇسىنىكتى جانە ءبىزدىڭ ارقايسىمىز ءۇشىن ەڭ قىمباتتى اقيقاتتار – وتباسىمىزدىڭ اماندىعى, قوناقجايلىق جانە ەڭبەكسۇيگىشتىك, تۇراقتىلىق, قاۋىپسىزدىك جانە بىرلىك, ەرتەڭگى كۇنگە دەگەن سەنىم ۇعىمدارى ورنىققان» دەلىنۋىنىڭ ءوزى ەگەمەن ەلىمىزدىڭ بارشا قازاقستاندىقتاردىڭ باقىتتى ءومىرى ءۇشىن قولدان كەلگەننىڭ بارلىعىن جاساۋعا باعىت ۇستاعانىن كورسەتەدى. ماڭگىلىك ەلدىڭ مىزعىماس جەتى تۇعىرىن نىعايتۋعا, ساقتاۋعا جانە ۇرپاقتان ۇرپاققا امانات ەتۋگە شاقىرۋى دا ورىندى. پاتريوتتىق اكتى ءبىزدى تاۋەلسىزدىك پەن استانانى قۇرمەتتەۋگە, جالپىۇلتتىق بىرلىك, بەيبىتشىلىك پەن كەلىسىمگە جەتۋگە, يننوۆاتسيالار نەگىزىندەگى تۇراقتى ەكونوميكالىق وسىمگە, جالپىعا ورتاق ەڭبەك قوعامىن قۇرۋعا, تاريحتىڭ, مادەنيەت پەن ءتىلدىڭ ورتاقتىعىنا, زايىرلى مەملەكەت پەن جوعارى رۋحانيات قۇرۋعا شاقىرادى. ءبىز ءار ىسىمىزدە ماڭگىلىك ەلدىڭ قاستەرلى قۇندىلىقتارىن باسشىلىققا الۋىمىز كەرەكتىگى ەسكە سالىنادى. بۇل وسىناۋ الەم تىنىشسىزداۋ كەزدە وتە كەرەك قاعيداتتار ەكەنى ءسوزسىز.
ەلباسى ن.نازارباەۆ قازاقستان حالقى اسسامبلەياسىنىڭ ءححىV سەسسياسىندا سويلەگەن سوزىندە «ءبىز جاڭا بەلەستەرگە قاراي ىلگەرى باسقان قادامىمىزدىڭ دۇرىستىعىن كومپاسپەن تەكسەرگەندەي, پاتريوتتىق اكتى ارقىلى انىقتايتىن بولامىز, دەپ اتاپ ءوتتى. كەڭەستەر وداعى ىدىراپ, وداقتاس رەسپۋبليكالار ءوز الدىنا تاۋەلسىزدىك العان تۇستا قازاقستاندى مەكەندەگەن ۇلتتاردىڭ ءبىرسىپىراسى تاريحي وتانىنا اتباسىن بۇرعانى شىندىق. سولاردىڭ ءبىرى ءبىزدىڭ وتباسىمىز. ءبىز دە تاريحي وتانىمىز چەحياعا قونىس اۋداردىق, بىراق, شىنى كەرەك, جەرسىنبەدىك, كەيىن قايتۋعا تۋرا كەلدى. قازاق جەرى اسىعىس شەشىم قابىلداپ, اعاتتىق جاساعان ءبىزدى كەۋدەدەن يتەرگەن جوق, قايتا, كەلگەندەرىڭ قانداي جاقسى بولدى دەپ قۋانا قارسى الدى. قازاقستاننىڭ قادىرىن وزگە ەلگە شىققاندا ايقىن اڭعارادى ەكەنسىڭ. بىزدەگى ادامداردىڭ ءبىر-بىرىنە دەگەن قايىرىمدىلىعىنا, قامقورلىعىنا ءتانتى بولاسىڭ. شىنى كەرەك, ءارىسىن ايتپاعاندا, كۇنى كەشە ارالاس-قۇرالاس بولعان تمد مەملەكەتتەرىندە دە ءبىزدىڭ ەلدەگىدەي بىرلىك پەن دوستىق نيەت بايقالا بەرمەيدى. بىزدەگى ىنتىماق پەن بىرلىكتىڭ باسى قازاقستاندىق قايىرىمدىلىق قاسيەتتەردەن ارنا تارتادى. قازاقستان شىن مانىندە ماڭگىلىك ەل بولۋعا قۇقىلى مەملەكەت. ءبىزدىڭ بارلىق تۇرمىس-ءتىرشىلىگىمىز, سالت-ءداستۇرىمىز, مىنەز-قۇلقىمىز تۋعان جەرىمىزدەن, وسىندا تۇراتىن حالىقتاردىڭ ورتاق قازىناسىنان تامىر تارتاتىنىن سول جاقتا انىق اڭعاردىق. ءسويتىپ, ءوزىمىز وسكەن, سانالى عۇمىرىمىز وتكەن تۋعان جەرگە تابان تىرەدىك. تاريحي وتانىنا قونىس اۋدارعان 25 چەح وتباسىنىڭ بىزبەن بىرگە 15-ءى اقتوبەگە قايتا ورالدى. بارلىق تانىستار, ءار ۇلتتىڭ وكىلدەرىنەن تۇراتىن دوستار قولدان كەلگەن كومەگىن بەردى, قولداۋ كورسەتتى. جەرگىلىكتى بيلىك تە ءبىزدىڭ ورنىعىپ كەتۋىمىزگە بارلىق جاعدايدى جاسادى. ءوزىم مۇندا كەلگەن بويدا چەح ەتنومادەني بىرلەستىگىنىڭ جۇمىسىن قولعا الدىم. قازىر دوستىق ۇيىندەگى 19 ەتنومادەني بىرلەستىكتەرمەن بىرگە وڭىردەگى ىنتىماقتاستىق پەن تاتۋلىقتى, بىرلىك پەن تۇراقتىلىقتى نىعايتۋعا, ءوز ۇلتىمىزدىڭ مادەنيەتىن, ءتىلىن, سالت-ءداستۇرىن دامىتۋعا ۇلەس قوسىپ كەلەمىز. ءبىز ماڭگىلىك ەل بولۋدىڭ ءساتتى قادامدارىن سەزىنىپ كەلەمىز. بارشا قازاقستاندىقتار ءبىرلىك پەن كەلىسىم بار ەلدە تۇراتىنىمىزدى ماقتانىش تۇتامىز. ەلىمىزدە جىل وتكەن سايىن ءومىر دەڭگەيى ارتىپ كەلەدى. وسىنىڭ بارلىعى ەلباسى ن.نازارباەۆتىڭ سارابدال ساياساتىنىڭ ارقاسى ەكەنى ءسوزسىز. پرەزيدەنت قاشاندا ماڭگىلىك ەل بولۋدىڭ باستى قاعيداتى ءوزارا تۇسىنىستىك پەن كەلىسىم, تاتۋلىق پەن تۇراقتىلىق ەكەنىن جادىمىزدا جاڭعىرتىپ, سول باعىتتا جۇيەلىجۇمىس جۇرگىزىپ كەلەدى. ونى كۇندەلىكتى ومىردە ايقىن سەزىنۋدەمىز دەسەم, ارتىق ايتقاندىق بولماس, ءسىرا. ۆالەنتينا پەسترۋ, چەح ەتنومادەني بىرلەستىگىنىڭ ءتورايىمى اقتوبە وبلىسى