كەشە استاناداعى ۇلتتىق اكادەميالىق كىتاپحانادا ەل تاۋەلسىزدىگىنىڭ 25 جىلدىعىنا ارنالعان «ەل ماقتانىشتارى» اتتى فوتوكورمەنىڭ اشىلۋ سالتاناتى ءوتتى. اتالمىش رۋحاني ورداعا جينالعان قاۋىم مەن كورمە قوناقتارى تاۋەلسىز ەلىمىزدىڭ دامۋىنا ەرەن ەڭبەك سىڭىرگەن تانىمال تۇلعالاردىڭ فوتوبەينەلەرىن تاماشالاۋ باقىتىنا يە بولدى.
بۇل فوتوكورمەنى مادەنيەت جانە سپورت مينيسترلىگىنىڭ, استانا, الماتى قالالارى, اتىراۋ جانە وڭتۇستىك قازاقستان وبلىستارى اكىمدىكتەرىنىڭ قولداۋىمەن, ۇلتتىق اكادەميالىق كىتاپحانا مەن «فوتوونەر» قوعامدىق بىرلەستىگى بىرىگىپ ۇيىمداستىرىپ وتىر.
كورمەدە حالىق قاھارمانى, قازاقستاننىڭ ەڭبەك ەرى اتاقتارىنا يە بولعان تۇلعالاردىڭ, وليمپيادا چەمپيوندارى, مادەنيەت پەن ەكونوميكا سالالارىنداعى مەملەكەتتىك سىيلىق لاۋرەاتتارى جانە ونەر مايتالماندارىمەن قوسا, زيالى قاۋىم وكىلدەرىنەن قۇرالعان ءبىرقاتار ازاماتتاردىڭ سۋرەتتەرى قويىلعان. ماسەلەن, حالىق قاھارماندارى توقتار اۋباكىروۆ, تالعات مۇساباەۆ, ايدىن ايىمبەتوۆ, باقىتجان ەرتاەۆ, مۇحتار التىنباەۆ سىندى اعالارىمىز دا بار.
ادام – كۇردەلى تۋىندى. ونعا جۋىق كانىگى فوتوگرافتار مەن فوتوتىلشىلەردىڭ قاس-قاعىم ءساتتى قىراعى شەبەرلىكپەن شىنايى ءارى ەش بوياماسىز تابيعي قالىپتا ءتۇسىرىپ العان سۋرەتتەرى كورمە قوناقتارىنىڭ كوڭىلىنەن شىقتى دەۋگە تولىق نەگىز بار. اتاپ ايتساق, اسىلحان ءابدىرايىموۆ, وڭعاربەك القاروۆ, مۇحتار حولدوربەكوۆ, تۇرار قازانعاپوۆ, ت.ب. ونىڭ ىشىندە جاس بولسا دا وزىندىك قولتاڭباسىمەن ەلگە تانىلىپ جۇرگەن ءبىزدىڭ ارىپتەسىمىز ەرلان وماروۆتىڭ دا شوقتىعى بيىك فوتوسۋرەتتەرى قويىلعان ەكەن.
مۇنداعى ءبىر ەرەكشەلىك, بۇل فوتوسۋرەتتەر بۇرىن-سوڭدى جاريالانباعان جانە كورمەگە تۇڭعىش رەت قويىلىپ وتىر. جوبانىڭ تۇپكى ماقساتى – بولاشاق ۇرپاققا ارناپ ەلىمىز تاۋەلسىزدىك العاننان بەرگى 25 جىل ىشىندە بولعان مەملەكەتتىك, قوعامدىق جانە رۋحاني ماڭىزى بار وقيعالاردىڭ فوتوشەجىرەسىن جاساۋ ەكەن. ىزگى نيەتكە اق جول تىلەيمىز.
راۋشان تاۋىرحانقىزى,
«ەگەمەن قازاقستان»
سۋرەتتەردى تۇسىرگەن ەرلان وماروۆ