باس باسىلىمنىڭ ءبىر بيىگى

*قۇتتىقتايمىز!

«جاڭا ءومىرىمىزدىڭ – تاۋەل­سىزدىگىمىزدىڭ تاريحىن ءوز بەتىندە جازۋعا «ەگەمەن قازاقستان» ۇلى قىزمەت اتقاردى. تاۋەلسىزدىك جو­لىنداعى كۇرەس نۇرسۇلتانداي ۇلى قايراتكەردى قالاي ىسىلدىرىپ شىعارسا, «ەگەمەن» ونىڭ باتىل قادامدارى مەن وي-پىكىرلەرىن تارتىنباي, جالتاقتاماي حالقىنا جەتكىزىپ تۇردى. ءسويتىپ, تاۋەلسىزدىك پەن تاۋەلسىزدىك يدەياسى وسى گازەت­تىڭ بەتىندە تابىستى. ءالى دە سولاي! «ەگەمەن» ءوز مىندەتىن ەرلىكپەن اتقارۋدا» – وتكەن جىلى «ەل گازەتى» اتتى ماقالاسىندا اكادەميك سەرىك قيراباەۆ وسىلاي دەگەن ەدى. ادەبيەت ابىزىنىڭ بۇل باعا­سىندا باس باسىلىمدى سوڭعى ون التى جىل بويى باسقارىپ كەلگەن  «ەگەمەن قازاقستان» رەسپۋب­ليكالىق گازەتى» اكتسيونەرلىك قوعامىنىڭ پرەزيدەنتى ساۋىتبەك ابدراحمانوۆتىڭ شەشۋشى ۇلەسى بار دەپ ايتۋدىڭ ارتىقتىعى جوق. «ەگەمەن قازاقستاننىڭ» س.ابدراحمانوۆ باسىلىم تىزگىنىن ۇستاعان 2000 جىلعى 38 مىڭدىق تارالىمنان 2016 جىلعى 210 مىڭدىق تارالىمعا جەتۋى, ەڭ باستىسى – ويى ورنىقتى, ءسوزى سالماقتى, باعاسى بايىپتى باسىلىم رەتىندە تۇپكىلىكتى تانىلۋى,  شىن مانىندە ەل گازەتىنە اينالۋى, گازەت باسشىسىنىڭ ءوز سوزىمەن ايتقاندا, «كۇن سايىن ءارىپ تۇزەتكەن, ءتۇن سايىن قارىپ كۇزەتكەن» جانقيارلىق ەڭبەكتىڭ ارقاسى ەكەنىن ءبىز جاقسى بىلەمىز. سولاي ەتە جۇرە ءوزى دە سان الۋان تاقىرىپتارعا ۇزبەي قالام سىلتەپ وتىرعان س.ابدراحمانوۆ شىعارماشىلىق ۇجىمدى ءبىر ءۇيدىڭ بالاسىنداي, ءبىر قولدىڭ سالاسىنداي ۇيىمشىل ەتىپ ۇستاي ءبىلدى, ءار ادامعا قامقورلىق جاساي الدى. ەل باسشىلىعى الدىنداعى ابىرويىنىڭ ارقاسىندا رەداك­تسياعا جەتى قاباتتىق ساۋلەتتى جا­ڭا عيمارات تۇرعىزۋدىڭ كىلتىن تابۋ, ەكى بىردەي كوپ پاتەرلى ءۇي, ەكى بىردەي جاتاقحانا سالدىرىپ, سول ارقىلى اكتسيونەرلىك قوعام قىزمەتكەرلەرىن تولىقتاي, 100 پايىز باسپانالى ەتۋدىڭ رەتىن كەلتىرۋ سياقتى ءىرى ىستەرى ونىڭ مەنەدجەرلىك قاسيەتىن دە تانىتتى. «ەگەمەن قازاق­ستاننىڭ» توقسانجىلدىق تورقالى تويىندا گازەت ۇجىمى مەن باسىلىم ارداگەرلەرىن ەلباسىمىز نۇرسۇلتان نازارباەۆتىڭ ءوزى كەلىپ قۇتتىقتاۋى باس باسىلىمنىڭ ەل ومىرىندەگى وزگەشە ورنىنىڭ اي­شىقتى ايعاعىنا اينالدى. كەشە ورتالىق سايلاۋ كوميسسيا­سىندا  ساۋىتبەك ابدراحمانوۆقا پارلامەنت ءماجىلىسى دەپۋتاتىنىڭ كۋالىگى تاپسىرىلىپ, حالىق قالاۋ­لىسىنىڭ توسبەلگىسى تاعىلدى. ءبىز بۇل جايدى قايراتكەر قالام­گەردىڭ كەزەكتى تابىسى دەپ قانا ەمەس, باس باسىلىمنىڭ ءبىر بيىگى, «ەگەمەن قازاقستاننىڭ» ەل الدىن­داعى بەدەلىنىڭ ايعاعى دەپ تە قارايمىز. تاۋەلسىزدىك جىلدارىندا اۋەلدە گازەت باسقارىپ, ودان كەيىن پارلامەنت دەپۋتاتتىعىنا سايلانعان بۇرىنعى باس رەداكتورلارىمىز – شەرحان مۇرتازا مەن ءابىش كەكىلباەۆ سالعان جولدىڭ جاراسىمدى جالعاسى دەپ بىلەمىز. مۇنى ماقتانىش تۇتامىز. گازەت تاري­حىندا ىزگى ءىزىن قالدىرعان باسشىمىزدى جاڭا ابىرويلى اتا­عىمەن قۇتتىقتاي وتىرىپ, ۇلكەندى ۇلكەندەي, كىشىنى كىشىدەي سىيلاپ, بارشانىڭ قۇرمەتىنە بولەنگەن ازاماتتىڭ دەپۋتاتتىق قىزمەتىنىڭ دە جەمىستى بولۋىن تىلەيمىز. ەگەمەنقازاقستاندىقتار.