قازاقستان رەسپۋبليكاسىندا سايلاۋدى بايقاۋ جونىندەگى رەسپۋبليكالىق قوعامدىق كوميسسيا كەشە ورتالىق كوممۋنيكاتسيالار قىزمەتىندە ءباسپاسوز ءماسليحاتىن وتكىزدى. وندا قوعامدىق كوميسسيا توراعاسى نۇرلان ەرىمبەتوۆ سايلاۋ ناۋقانىنىڭ اياقتالۋىنا بايلانىستى, سونداي-اق, سايلاۋ كەزىندە بايقاۋشىلاردىڭ اتقارعان جۇمىسى جونىندە ايتتى.
سايلاۋدىڭ قاداعالاۋ جۇمىسى تياناقتى جۇرگىزىلگەنىنە توقتالعان كوميسسيا توراعاسى, ناۋقان بارىسىندا ورەسكەل زاڭ بۇزۋشىلىقتار ورىن الماعانىن كولدەنەڭ تارتتى. «بايقاۋشىلاردىڭ سايلاۋ ۇدەرىسىن ەركىن باقىلاۋىنا ىرىق بەرىلدى. ولار, ءتىپتى, كۇدىك-كۇمان كەلتىرەتىن كەلەڭسىزدىكتەردى سۋرەتكە نەمەسە ۆيدەوعا ءتۇسىرىپ الۋىنا دا جول اشىلدى. سوندىقتان, بيلىك تاراپىنان, بولماسا قانداي دا پارتيا تاراپىنان بىردە-ءبىر قىسىم نەمەسە باسقالاي ارەكەت جاسالعان جوق. ءبىزدىڭ بايقاۋشىلارىمىزبەن قاتار, پارتيالار مەن ءتۇرلى ۇيىمداردىڭ وكىلدەرى دە ۇدەرىستى تولىق كوزدەن كەشىرىپ تۇردى دەۋگە بولادى. سونىڭ ناتيجەسى بولار, سايلاۋ ىڭ-شىڭسىز, بىرقالىپتى ءوتتى», دەدى ساياساتكەر.
– ءبىزدىڭ شتاب سايلاۋ الدىنداعى ءبىر ايدا تىنىمسىز جۇمىس ىستەدى. سايلاۋ كۇنى تاۋلىك بويى دامىلسىز قىزمەت ەتتىك. بارلىق بايقاۋشىلارىمىزبەن ۇنەمى ءۇزىلىسسىز بايلانىستا بولدىق. بارىنەن الىنعان مالىمەتتەرگە قاراعاندا, سايلاۋ جاقسى ءوتتى. نەگىزى سايلاۋعا دەيىنگى ءبىر ايدا ءبىزدىڭ شتابقا 4 حات كەلىپ ءتۇستى. وندا دەكلاراتسيانى دۇرىس تولتىرمادى, ۋاقتىلى تىركەمەدى دەگەن سياقتى ماسەلەلەر تۋىنداعان. ءبىز ولاردىڭ دەر كەزىندە شەشىلۋىنە اتسالىستىق. وسى ورىندا ايتارىم, كوميسسيانىڭ باستى مىندەتى بايقاۋشىلاردى ساۋاتتى دايىنداۋ بولاتىن. بۇل جۇمىسىمىز تياناقتى جۇرگىزىلگەندىكتەن, ءوز جەمىسىن بەردى عوي دەپ ويلايمىن. سەبەبى, ءبىلىمدى جاستاردىڭ وسى ساياسي ۇدەرىسكە دەگەن ىنتاسى زور بولدى. ولار سايلاۋدى سىرتتاي باقىلاپ قانا قويماي, ىشىنە كىرىپ قىزمەت ەتۋگە ىنتا تانىتتى. بۇل ءىس ولارعا تاجىريبە جيناقتاۋعا جانە الداعى قىزمەت باسپالداعىنا دەمەۋ بولاتىن كورىنەدى. سوندىقتان, سايلاۋعا بايقاۋشى بولعىسى كەلگەندەردىڭ قاراسى كوپ ەدى. ناتيجەسىندە, بىزگە جاقسى تاڭداۋ جاساپ, ءبىلىمدى ءارى بىلىكتى جاستاردى ىرىكتەپ الۋىمىزعا مۇمكىندىك تۋدى, – دەدى كوميسسيا توراعاسى.
سايلاۋ قارساڭىندا اتالعان قوعامدىق كوميسسيا سايلاۋعا قاتىستى بۋكلەتتەر مەن ۆيدەوروليكتەر جاساپ, ەلەكتوراتقا سايلاۋ قۇقىعىن ءتۇسىندىرۋ جۇمىستارىن جۇرگىزىپتى. سونداي-اق, پارتيالاردىڭ باسشىلارىمەن كەزدەسىپ, تۋىنداعان كەز كەلگەن ماسەلەنى شەشۋگە قولۇشىن سوزا الاتىندارىن ايتىپتى. «مەن ءوزىم بارلىق پارتيالاردىڭ ليدەرلەرىمەن كەزدەسىپ, اشىق اڭگىمە قۇردىم. ەل ىشىندەگى ۇساق-تۇيەك تۇسىنىسپەۋشىلىكتەر مەن اتتەگەنايلاردى حالىقارالىق ۇيىمداردىڭ بايقاۋشىلارىنسىز-اق ءوزىمىز شەشە الاتىنىمىزدى ۇقتىردىم. ءسويتىپ, ولاردىڭ ارىز-شاعىمىن ءتيىستى ورىندارعا جەتكىزىپ, ودان جاقسى قورىتىندى شىعارۋعا ىقپال ەتە الاتىنىمىزدى اشىق ايتتىم», دەدى ن.ەرىمبەتوۆ.
شارا بارىسىندا كوميسسيا توراعاسى جۇمىسىن تياناقتى اتقارعان بايقاۋشىلارعا ءوز العىسىن ايتۋدى دا ۇمىتپادى. «بۇل مۇمكىندىكتى پايدالانا وتىرىپ, ارىپتەستەرىمە العىسىمدى ايتامىن. سايلاۋ ءوتتى, ەندى ساياسي باعانى ەلىمىز, قوعام بەرەتىن بولادى. دەگەنمەن دە, ءبىز ءوزىمىزدىڭ جۇمىسىمىزدى ابىرويمەن اتقاردىق. ءبىز ءۇشىن بۇل ماڭىزدى», دەگەن ن.ەرىمبەتوۆ, بۇگىندە ەلدىڭ پاتريوتتارى بولىپ سانالاتىن ادامداردىڭ قاتارى قالىپتاسىپ بولعانىن جانە ولار ءوز ءىستەرىنە وتە ادال ەكەنىن اتاپ ءوتتى. سونىڭ ناتيجەسىندە, سايلاۋ جاقسى ۇيىمداستىرىلىپ, جوعارى دەڭگەيدە وتكەنىن كولدەنەڭ تارتتى.
نۇرباي ەلمۇراتوۆ,
«ەگەمەن قازاقستان».