– ايتاتىنى جوق, پارتيا سەزىنەن العان اسەرىمىز كەرەمەت. ەلىمىزدىڭ ءار وڭىرىنەن كەلگەن دەلەگاتتاردىڭ دا كوڭىلدەرى كوتەرىڭكى, جۇزدەرى جارقىن. ءبىزدىڭ ارقايسىمىزدىڭ اسىعا كۇتكەنىمىز ەلباسى ن.نازارباەۆتىڭ سەزدە جاساعان باعدارشامداي بايانداماسى دەسەم, قاتەلەسە قويماسپىن. قاشاندا ەلدىڭ ەرتەڭگى دامۋ باعىتتارىنا باسىمدىق بەرەتىن مەملەكەت باسشىسىنىڭ بايانداماسى «100 ناقتى قادام» ۇلت جوسپارىمەن جانە «قازاقستان ناقتى جاھاندىق احۋالدا: ءوسىم, رەفورمالار, دامۋ» اتتى قازاقستان حالقىنا جولداۋىمەن, كۇنى كەشەگى «ۇلت جوسپارى – قازاقستاندىق ارمانعا باستايتىن جول» جوباسىنداعى ويلارمەن ساباقتاس شىقتى. باياندامادا داعدارىستى ەڭسەرۋدىڭ العاشقى قادامدارىنىڭ ناتيجەلەرى دە نازاردان تىس قالمادى. وسى بەس ينستيتۋتتىق رەفورمانى جۇزەگە اسىرۋ بارىسىنداعى ساتتىلىكتەر ىلگەرىلەۋىمىزگە ءىز اشاتىنداي العىشارت جاساعانىن اڭعاردىق.
مەملەكەت باسشىسى سايلاۋالدى باعدارلامانىڭ شەشۋشى باعىتتارىنا توقتالدى. نۇرسۇلتان ءابىش ۇلى داعدارىسقا قارسى تۇراقتىلىق, ەكونوميكانى قۇرىلىمدىق جاڭعىرتۋ, قازاقستاندىقتاردىڭ ءومىر ساپاسىنىڭ جاڭا ستاندارتتارى, مەملەكەتتىك كونستيتۋتسيالىق پاتريوتيزم جانە ايماقتىق تۇراقتىلىق, ينتەگراتسيا جانە قاۋىپسىزدىك تۋرالى تارقاتا باياندادى. ەلباسى قاشانعى ادەتىندەي الەمدى الاڭداتىپ وتىرعان سىن-قاتەرلەردىڭ بەتىن بۇركەمەلەمەي اشىعىن ايتتى. ولاردىڭ دا ءبىزدىڭ ەلگە اسەرى بولاتىنىن جاسىرمادى. الايدا, بۇل سىن-قاتەرلەردىڭ الدىن الۋ ءبىزدىڭ بىرلىگىمىزگە, تاتۋلىعىمىز بەن تۇراقتىلىعىمىزعا سىنا قاعا المايتىنىن سەنىمدى تۇردە جەتكىزدى. پارتيانىڭ سايلاۋالدى تۇعىرناماسىنىڭ «قازاقستان 2021: بىرلىك. تۇراقتىلىق. جاسامپازدىق» دەپ اتالۋى دا سوندىقتان. بۇگىنگى گەوسياسي جاعداي, الەمدىك قارجى داعدارىسى, جەر-جەردە بولىپ جاتقان قارۋلى قاقتىعىستار ءبىزدى بۇرىنعىدان دا بىرىكتىرە, تاتۋلاستىرا جانە ۇيىمشىل ەتە ءتۇسۋى ءتيىس.
مەملەكەت باسشىسى ءوز سوزىندە ەلدىڭ ەرتەڭىن ايقىندايتىن كوپتەگەن ماسەلەلەرگە ماڭىز بەرە سويلەدى. 2017 جىلدان باستاپ مەكتەپ تۇلەكتەرىنىڭ كاسىپتىك-تەحنيكالىق ماماندىقتارعا تەگىن وقىتىلاتىنىن جادىمىزدا تاعى ءبىر جاڭعىرتتى. قازىر ەڭبەك نارىعىندا سۇرانىسقا يە ماماندىق الۋدىڭ ماڭىزدىلىعىن قاداپ ايتتى. مەن بۇل ارادا ءبىزدىڭ كوللەدجدىڭ وسى باعىتتاعى جۇمىستى جۇيەلى جۇرگىزىپ كەلە جاتقانىن ايتا كەتۋدى ءجون كوردىم. كوللەدج قازاقستان تەمىرجولى ۇلتتىق كومپانياسىنىڭ قولداۋىمەن بولاشاق تەمىرجول ماماندارىن وندىرىسپەن تىعىز بايلانىستا دايارلاۋدا. ەلباسى تاپسىرماسىنا وراي دۋالدى وقىتۋ جۇيەسى ەنگىزىلىپ, ستۋدەنتتەر بولاشاق جۇمىس ورىندارىندا ءدارىس الۋ مۇمكىندىگىنە يە بولدى.
ەلباسى ءوز سوزىندە داعدارىستى ەڭسەرۋگە باعىتتالعان «نۇرلى جول» باعدارلاماسىنا وتكەن جىلى بولىنگەن 770 ميلليارد تەڭگەنىڭ 93 پايىزى يگەرىلگەنىن تىلگە تيەك ەتە كەلىپ, قازىرگى جاعدايدا ۇنەمشىلدىك پەن ۇقىپتىلىقتىڭ ۇتىمدى بولاتىنىن ايتۋى دا ۋاقىت تالابى ەكەنى ءسوزسىز. سونداي-اق, قانشاما داعدارىس دەگەنمەن, ۇكىمەتتىڭ الەۋمەتتىك مىندەتتەمەلەرىن ورىنداپ وتىرعانىنا كوز جەتكىزدىك. بۇعان زەينەتاقىنىڭ, ەڭبەكاقىنىڭ, شاكىرتاقىنىڭ جانە الەۋمەتتىك تولەمدەردىڭ وسكەنى دە دالەل بولادى.
سەزدە پارتيانىڭ «قازاقستان-2021: بىرلىك. تۇراقتىلىق. جاسامپازدىق» اتتى سايلاۋالدى باعدارلاماسى قابىلداندى, پارلامەنت ءماجىلىسى سايلاۋىنا ۇمىتكەرلەردىڭ پارتيالىق ءتىزىمى بەكىتىلدى. ءبىز پارتيالىق تىزىمنەن ەلىمىزگە بەلگىلى, بەدەلدى ازاماتتاردىڭ اتى-ءجونىن كورىپ, ەل بولاشاعى بۇدان گورى دە باقۋاتتى بولاتىنىنا كامىل سەندىك. پارتيا توراعاسىنىڭ پايىمداۋلارىنا قاراپ, داعدارىستىڭ دامۋعا كەدەرگى بولا المايتىنىنا كوزىمىز انىق جەتتى.
ەلباسى الداعى سايلاۋدى كوپتەگەن ەلدەردىڭ بايقاۋشىلارى قاداعالايتىنىن,سوندىقتان ۇمىتكەرلەردىڭ اشىق, ءادىل جانە باسەكەلەستىك جاعدايىندا وتەتىن سايلاۋعا تياناقتى دايىن بولۋى كەرەكتىگىنە نازار اۋداردى.
ەلىمىزدە «باق بەرەردە ىرىس قونادى, ۇستانىمى دۇرىس بولادى» دەگەن ءسوز بار. جۇمىلا ىستەر جۇمىسىمىز جەڭىل بولىپ, ەلباسىنىڭ ەلدى داعدارىستان جەڭىل الىپ شىعۋعا جاسالعان باعدارلامالارىنىڭ ىسكە اسۋىنا اتسالىسىپ, «ماڭگىلىك ەل» ۇعىمىن ۇلتىمىزدىڭ ۇلى باعدارىنداي ۇستانىپ, ازاماتتارى پاراساتتى, تۇرمىسى باقىتتى ەل بولۋعا ۇمتىلايىق دەر ەدىم. بۇعان ءبىزدىڭ ساياسي جانە ەكونوميكالىق الەۋەتىمىز جەتەدى. ەندىگى ماقسات – بىرلىگىمىزدى بەكەم ۇستانىپ, تۇراقتىلىعىمىزدىڭ تۇعىرىن بەكىتە ءتۇسۋ بولماق. بۇل باعىتتا ەلباسى اينالاسىنا توپتاسا قيمىلداپ, ەلىمىزدىڭ دامىعان وتىزدىققا ەنۋىنە ەلەۋلى ۇلەس قوسالىق دەر ەدىم. بۇگىنگى اسەر وسىلاي ايتقىزادى. بۇل ءبىزدى جاڭا جەڭىستەرگە جەتكىزەرى ءسوزسىز. قازىرگى مەجە الەمدىك داعدارىستى ەڭسەرۋ ەكەنىن ءاربىر قازاقستاندىق مەيلىنشە تۇسىنەتىنىنە سەنىمىم مول.
جازىپ العان
ساتىبالدى ءساۋىرباي,
«ەگەمەن قازاقستان».
اقتوبە وبلىسى.