استانا. 17 مامىر. ماريا شاراپوۆا يتاليا استاناسى – ريمدە وتكەن ايەلدەر تەننيسى اسسوتسياتسياسى (WTA) تۋرنيرىندە جەڭىسكە جەتتى. بۇل تۋرالى lenta.ru حابارلادى.
فينالدىق كەزدەسۋدە رەسەي تەننيسشىسى يسپانيالىق كارلا سۋارەس-ناۆاررودان 4:6, 7:5, 6:1 ەسەبىمەن باسىم ءتۇستى. ويىن 2 ساعات 35 مينۋت جالعاستى.
ءتۋرنيردىڭ سىيلىق قورى 2,7 ملن. دوللاردى قۇراعان. شاراپوۆا 450 مىڭ دوللار اقشالاي سىيلىق پەن WTA رەيتىنگى ەسەبىنە 900 ۇپاي يەلەنىپ, تۋرنير كەستەسىندە 2 ورىنعا كوتەرىلدى.
ەندىگى كەزەكتە ماريا شاراپوۆا 25 مامىر – 7 ماۋسىم ارالىعىندا پاريجدە وتەتىن فرانتسيانىڭ اشىق بىرىنشىلىگىنە («رولان گارروس») قاتىسۋدى كوزدەپ وتىر.
ايدار ورىسباەۆ.
دەرەك: lenta.ru.
سۋرەت: reuters.com.