العاشقى كۇنى قىستىڭ اۋىرلىعىنان كوتەرەم بولعان كيىكتەر ءولىپ جاتىر دەگەن بولجام ايتىلعان بولاتىن. 13 مامىردىڭ كۇنى دالا ارۋىنىڭ جاپپاي قىرىلۋى باستالدى. سول كۇنى ماماندار ولگەن كيىكتەردىڭ 1000-عا جەتىپ جىعىلعانىن حابارلادى. كەشە وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باسشىسى مارات بەگىمبەتوۆ اجال قۇشقان كيىكتىڭ سانى 1018-گە جەتكەنىن ايتتى.
– اقبوكەننىڭ 941 ەشكىسى, 22 تەكەسى جانە بيىل ورگەن 55 قۇرالايى ولگەن. ولاردىڭ بارلىعى دەر ۋاقىتىندا جويىلىپ, زالاسىزداندىرىلدى, – دەدى مارات ءابدىراحمان ۇلى. – ماماندار سول ماڭداعى توپىراقتىڭ, سۋدىڭ, اقبوكەن ولەكسەلەرىنىڭ سىناماسىن الىپ, رەسپۋبليكالىق لابوراتورياعا جەدەل جىبەردى. ول كەمىندە ونشاقتى كۇن زەرتتەلگەننەن كەيىن عانا قورىتىندى شىعارىلادى. وندا قاۋىپتى جۇقپالى اۋرۋلاردىڭ بار-جوعى انىقتالادى.
كيىكتەردىڭ جاپپاي قىرىلۋى 2012 جىلى جانگەلدين اۋدانىندا دا ورىن العان بولاتىن. وندا 926 اقبوكەننىڭ اجالىنا پاستەرەللەز جۇقپالى اۋرۋى سەبەپ بولعان ەدى. دالا ەركەسى وڭتۇستىك وبلىستار توڭىرەگىندە قىستايدى دا, تورعاي وڭىرىنە كەلىپ تولدەيدى. مامانداردىڭ ايتۋىنشا, قۋاڭشىلىق بولعان جازدان كەيىنگى ۇزاق, اۋىر قىستان كوتەرەم شىققان اقبوكەندەر, اسىرەسە, ەشكىلەرى جۇقپالى اۋرۋلارعا توتەپ بەرە المايدى. قازىر ناق تولدەپ جاتقان كەزدە قىرىلىپ جاتىر.
– كيىكتەردىڭ 11 مامىردان باستالعان جاپپاي قىرىلۋ وقيعاسى ءالى ءبىر اپتاداي سوزىلۋى مۇمكىن. ويتكەنى, 2012 جىلى جانگەلدين اۋدانىندا ولاردىڭ ولەكسەلەرى 8 كۇن بويى جينالىپ, جويىلىپ وتىرعان ەدى, – دەدى مارات ءابدىراحمان ۇلى.
بۇگىندە «التىن دالا» مەملەكەتتىك تابيعي رەزەرۆاتى مەن «وحوتزووپروم» وندىرىستىك بىرلەستىگى ماماندارى امانگەلدى اۋدانىندا كيىك ۇيىرلەرىن باقىلاۋعا العان. زالالسىزداندىرۋ جۇمىستارى ءۇشىن ەكسكاۆاتور, جۇك ماشينالارى, دەزينفەكتسيالىق ءدارى-دارمەكتەردىڭ بارلىعى قامتاماسىز ەتىلگەن. وتكەن جىلعى ساناق بويىنشا «التىن دالا» تابيعي مەملەكەتتىك رەزەرۆاتىنا جاتاتىن امانگەلدى اۋدانى توڭىرەگىندە 80 مىڭنان اسا كيىك بولعان. مىندەت ولاردى امان ساقتاپ قالۋ بولىپ وتىر.
ءنازيرا جارىمبەتوۆا, «ەگەمەن قازاقستان».
قوستاناي وبلىسى, امانگەلدى اۋدانى.