قازاقستان – وزبەكستان: الىس-بەرىس ارتادى

«2023 جىلدىڭ قورىتىندىسى بويىنشا 7-ورىنعا تۇراقتا­عان وزبەكستان قازاقستاننىڭ ءىرى ساۋ­دا سەرىكتەسىنىڭ ءبىرى ەكەنىن كورسەت­تى. قازاقستاننىڭ ورتالىق ازيا ەلدەرىمەن جالپى ساۋدا اينا­لىمىنىڭ 57%-دان استامى وز­بەكستانعا تيەسىلى. كەيىنگى 5 جىلدا ەكىجاقتى تاۋار اينالىمى 29%-عا ءوسىپ, 2022 جىلى 5 ملرد دوللار كولەمىنە جەتتى. بىزگە ساۋداداعى ماسەلەلەردى جۇيەلى شەشۋ جانە ساۋدا اينالىمىنىڭ جاڭا ءوسۋ نۇكتەلەرىن تابۋ قاجەت. وسىلايشا, مەملەكەتتەرىمىزدىڭ باسشىلارى قويعان ماقسات – ورتامەرزىمدى كەزەڭدە 10 ملرد دوللارعا قول جەت­كىزۋگە تالپىنۋىمىز كەرەك», دەدى س.جۇمانعارين.

وزبەكستان پرەمەر-ءمينيسترى­نىڭ ورىنباسارى جامشيد حودجاەۆ مۇنداي ءىس-شارالار ەكىجاقتى ىن­تىماقتاستىقتى نىعايتۋعا قۋاتتى سەرپىن بەرەتىنىن اتاپ ءوتتى. ول قازاقستان وزبەكستاننىڭ نەگىزگى ەكو­نوميكالىق سەرىكتەستەرىنىڭ ءبىرى ەكەنىن اتاپ ءوتتى.

«الەمدىك قاۋىمداستىق ءبىزدىڭ وڭىرلەرگە ءبىرتۇتاس نارىق پريزماسى ارقىلى قارايدى. سىزدەردى ءىرى جاھاندىق برەندتەردى ءتيىمدى تارتۋ ءۇشىن كۇش-جىگەرىمىزدى بىرىكتىرۋگە شاقىرامىن», دەدى ول.

ەكى ەل اراسىندا ونەركاسىپتىك كووپەراتسيا بەلسەندى تۇردە دامىپ كەلەدى. بۇل 3,1 ملرد دوللار سوماسىنا 69 جوبا, 14,7 مىڭنان اسا جۇمىس ورنىن قۇرۋدى كوزدەيدى. قازىردىڭ وزىندە 217 ملن دوللار سوماسىنا 12 بىرلەسكەن جوبا ءساتتى جۇزەگە اسىرىلدى. بۇعان تۇرمىستىق تەحنيكا, جۇك جانە جەڭىل اۆتوكولىكتەر, تراكتورلار ءوندىرىسى كىرەدى. بەلسەندى فازادا 178 ملن دوللاردان اسا سوماعا ءۇش ينۆەستيتسيالىق جوبا ىسكە اسىرىلىپ جاتىر. ولاردىڭ قاتارىندا تاراز قالاسىنداعى قۋاتى 500 مىڭ توننا بولات ءونىمىن شىعاراتىن ەلەكتر مەتاللۋرگيالىق زاۋىت پەن شىمكەنت قالاسىندا ينفۋزيالىق ەرىتىندىلەردى ءوندىرۋ بار.

وزبەكستان قازاقستانعا جەمىس-كوكونىس ونىمدەرىنىڭ نەگىزگى جەت­كىزۋشىسى سانالادى. الەۋمەتتىك ماڭىزى بار اگروونەركاسىپتىك ونىمدەردى وزبەكستاننان جەتكىزۋدى دامىتۋ ءۇشىن تەز بۇزىلاتىن تاۋارلاردى تاسىمالداۋ كەزىندە «UZKAZTRADE» بىرلەسكەن كاسىپ­ورنىنا قوزعالىس باسىمدىعىن بەرۋ مۇمكىندىگى قاراستىرىلادى.

«قازاقستان – وزبەكستان» بيزنەس فورۋمىنا ەكى ەلدىڭ ۇلتتىق كومپانيالارىنىڭ, ىسكەر توپتارى مەن مەملەكەتتىك ورگاندارى­نىڭ 450-دەن اسا وكىلى قاتىسىپ جاتىر.