ءبىز ەسەبىن بەرگەلى وتىرعان ماۋسىمنىڭ 19-ىنان 20-سىنا قاراعان ءتۇنى الەم چەمپيوناتىندا ءۇش ويىن وينالدى. ولاردىڭ ەكەۋىندە 2:1 دەگەن ەسەپ تىركەلىپ, بىرىنشىلىكتەگى ەڭ ءجيى قايتالانىپ تۇرعان بۇل كورسەتكىشتىڭ جالپى سانىن 8-گە جەتكىزدى. وسىلاردىڭ ءبىرىنىڭ ناتيجەسى فۋتبول وتانى سانالىپ جۇرگەن انگليا ەلىنىڭ قۇراماسىن جارىس جولىنان كۇنى بۇرىن شىعارىپ تاستادى. تاعى ءبىر ويىن 0:0 دەگەن كورسەتكىشتىڭ كولەمىن ەكىگە ەسەلەدى.
ەندى وسىلاردىڭ ءبارىن ءوز رەت-رەتىمەن باياندايىق. بۇل كۇنى قارسىلاستار اراسىندا الاڭعا كولۋمبيا جانە كوت-د`يۆۋار كوماندالارى ءبىرىنشى بولىپ شىقتى. ماتچ 2:1 ەسەبىمەن امەريكالىقتاردىڭ پايداسىنا شەشىلدى. ءار تايمنىڭ ءارتۇرلى كورىنىس بەرگەنىنە قاراماستان, ويىن جۇرتتىڭ كۇتكەن دەڭگەيىنەن تابىلدى. ۇزىلىسكە دەيىن شىن مانىندە ەكى كوماندادا دا گول سوعاتىنداي مۇمكىندىكتەر بولعان جوق. ەڭ ءبىر قولايلى ءساتتى حامەس رودريگەس جەتكىزگەن دوپتى قاقپاعا تۋرا باعىتتاي الماعان تەوفيلو گۋتەررەس جىبەرىپ الدى.
ەكىنشى تايمنىڭ باسى تۋرا ءبىرىنشى بولىكتەگىدەي جوعارى قارقىنمەن ءوربىدى. مۇنى, اسىرەسە, كولۋمبيا قۇراماسى كوبىرەك ۇستاندى. 58-مينۋتتا حۋان كۋادرادو دوپتى قيىس بۇرىشتان ۇرىپ, قاقپا باعانىنا تيگىزدى. كوپ ۇزاماي «كوفەشىلەر» بۇل باسىمدىلىقتارىن گولعا اينالدىرا ءبىلدى. بۇرىشتامادان ايىپ الاڭىنا تاستالعان دوپقا تالاستا رودريگەس جانىنداعى ديدە دروگبادان بۇرىن قيمىلداپ, ونى باسىمەن قاقپاعا باعىتتاپ ۇلگەردى. ارادا 6 مينۋت ۋاقىت وتكەندە, الگىندەگى رودريگەس قارسى بەتتە دوپقا قول جەتكىزىپ, كەزەكتى كەڭ قاناتتى شابۋىلدى باستاپ بەردى. ونىڭ اياعىنان جەتكەن دوپتى ويىنعا ەندى قوسىلعان حۋان كينتەرو قاقپاعا ءدال ۇرىپ ءتۇسىردى. ەسەپ وسىلايشا دەمدە 2:0-گە جەتتى.
بىراق بۇل يۆۋارلىقتاردىڭ ەڭسەسىن قاتتى تۇسىرە قويماعان سياقتى. مۇنى وسىدان كەيىن ولاردىڭ بىرنەشە رەت تەگەۋرىندى شابۋىل ۇيىمداستىرۋلارى بايقاتتى. سونداي جىگەرلى جورىقتاردىڭ ءبىرىن ءوزى باستاعان جەرۆينە سول قاپتالمەن اتىلىپ شىعىپ, جولاي بىرنەشە باسەكەلەسىن وراعىتىپ ءوتتى. سوسىن ايىپ الاڭىنىڭ ىشىنە كىردى دە, بىردەن قاقپاشىنىڭ وڭ جاعىن الا ۇردى. گول! وسى دوپتان كەيىن «پىلدەر» ويىننىڭ قالعان ۋاقىتىندا قارسى قاقپا جاقتان شىقپاي قويدى. الايدا, سول تولاسسىز شابۋىلداردان ءتيىستى ناتيجە شىعارا المادى.
بۇدان كەيىن الاڭ تورىنە ۋرۋگۆاي جانە انگليا فۋتبولشىلارى كوتەرىلدى.
انگليا قۇراماسى جاھاندىق جارىستاعى وسى كەزگە دەيىنگى ەكى ويىنىن دا 1:2 دەگەن ەسەپپەن اياقتادى. البيون جەرىنەن كەلگەن جىگىتتەردىڭ العى كۇنگە اسىققان ارماندارىنىڭ الاۋىن وزدەرىنە تانىس لۋيس سۋارەس ەسىمدى جالعىز شابۋىلشى ءبىر دەممەن ءوشىرىپ تاستادى. كەزدەسۋدىڭ ءبىرىنشى تايمىندا ويىننىڭ باياۋ قارقىنمەن وربىگەنىنە قاراماستان, كوماندالار ءوز جانكۇيەرلەرىن بىرقاتار تارتىستى وقيعالارىمەن ەلىكتىرىپ تۇردى. وسى تۇستاردا قاقپا قۇلپىن اشۋدىڭ تاماشا مۇمكىندىكتەرىن كريستيان رودريگەس, ەدينسون كاۆاني جانە ۋەين رۋني سىندى ويىنشىلار جىبەرىپ الدى. الايدا, گول ءبىر-اق رەت سوعىلدى. ونى لۋيس سۋارەس اعىلشىندار قاقپاسىنا تۋرا باعىتتادى. ۋرۋگۆاي جانكۇيەرلەرى وسىنىڭ الدىندا كوستا-ريكامەن وتكەن ويىندا الاڭعا شىقپاعان تاپ وسى فورۆاردتان ءۇمىت كۇتىپ وتىر ەدى. راس, لۋيس ويىننىڭ باسىندا ءوزىنىڭ ارەكەتىمەن ەرەكشەلەنە قويمادى, ويىن تىزگىنىن دە قولعا سيرەك الدى. دەگەنمەن, وزىنە تاپ كەلگەن ءبىرىنشى مۇمكىندىكتى كەرەمەت پايدالانىپ, دجو ءحارريدى قاپىدا قالدىردى.
ەكىنشى تايم وسكار تابارەس شاكىرتتەرىنىڭ شابۋىلىمەن باستالدى. بىراق اعىلشىندار ۋاقىت وزعان سايىن باسىمدىلىقتارىن ارتتىرا بەردى. ناتيجەسىندە ەكىنشى تايمنىڭ ورتاسىنان باستاپ ۋرۋگۆايلىقتار ءوز الاڭى ماڭىنا تىقسىرىلىپ تاستالدى. سونىڭ پاتىندە اعىلشىندار ەسەپتى دە تەڭەستىرە الدى. قاپتالدان گلەن دجونسون جەتكىزگەن دوپقا ۋەين رۋني ەگەلىك ەتتى. ول قاقپا الدىنداعى قاربالاس شاقتا فەرناندو مۋسلەرانى قاپىدا قالدىردى. وسىدان جىگەرلەنگەن بريتانيالىقتار بۇدان دا ءارى كەتتى. قاۋىرت شابۋىلدار يىرىمىندە دانيەل ستارريدج ايىپ الاڭى سىزىعىنان وتە قاتتى ۇردى. ۋرۋگۆاي قاقپاشىسى بۇل دوپتى اۋپىرىممەن سىرتقا جونەلتتى. بىراق امەريكالىقتاردا وسىنداي قىسىلتاياڭ كەزدەرى تۇيىقتان ساڭىلاۋ تاۋىپ, شىعىپ كەتەتىن ءبىر ادام بار ەكەن. ول – لۋيس سۋارەس ويىن بىتۋگە 5 مينۋت قالعاندا كەزەكتى قاۋىپتىڭ بۇلتىن وزىمەن بىرگە ىلگەرى اكەتىپ, العا تۇرا ۇمتىلدى. ءبىر كەزدە ول دجو حارتپەن بىرگە-ءبىر شىقتى دا, قاقپاشى جانىنان دوپتى زۋ ەتكىزدى. گول! سونىمەن, ەسەپ 2:1-گە جەتتى.
ال كەشە تاڭ الدىندا ناتالدىڭ «ارەنا داس دۋناس» ستاديونىندا اياقتالعان جاپونيا مەن گرەكيا قۇرامالارىنىڭ كەزدەسۋىندە ەسەپ اشىلعان جوق. كوماندالار ويىننىڭ باسىن بارىنشا مۇقيات وتكىزدى. ولار ابايلاپ باسقان قيمىل-ارەكەتتىڭ بارىسىندا ءبىر-بىرلەرىنىڭ ايىپ الاڭدارىنا بىرنەشە رەت باسا-كوكتەپ كىرىپ تە جاتتى. الايدا, ۇجىمدارعا بۇدان ءتيىمدى قورىتىندى شىعارۋدىڭ رەتى كەلە قويمادى. سونداي جورىقتاردىڭ بىرىندە گرەكتەرگە بۇرىشتاما بەرۋدىڭ ءساتى ءتۇستى. ايتكەنمەن, دوپقا جالپى جاپوندار كوبىرەك يەلىك ەتتى. البەرتو دزاككەرونيدىڭ شاكىرتتەرى ويىن تىزگىنىن ءوز قولدارىنا الىپ العاندارىمەن, ولارعا قارسى جاقتىڭ تىعىز تۇرعىزىلعان قورعانىس دۋالدارىنان ارى قاراي اتتاپ ءوتۋ وڭايعا سوقپادى. ال گرەكتەر «ساتتىلىك كىلتىن» كوبىنە قارسى شابۋىلداردان ىزدەپ تۇردى. سولاردىڭ بىرىندە ەجەلگى ەللادالىقتاردىڭ ۇرپاقتارى ەسەپ اشىپ تا كەتە جازدادى. ول پانايوتيس كونەنىڭ جولدان ءىلىپ اكەتكەن دوبىمەن الاڭ ورتاسىنان اعىپ ءوتىپ كەلىپ, شامامەن 25 مەتر جەردەن داربازاعا سوققى جاساۋىمەن كورىنىس بەردى. بىراق قاقپاشى ەيدزي كاۆاسيما مۇنداي سوققىنى قابىلداۋعا ءازىر بولىپ شىقتى. كوپ ۇزاماي گرەكتەر قاۋىپتى تۇستان قاقپاعا قاراي ايىپ دوبىن ۇرۋ مۇمكىندىگىنە دە قول جەتكىزدى.
تايمنىڭ ەكۆاتورىنا تايانعان تۇستا جاپوندار تىزگىندى قايتادان وزدەرىنە قاراي تارتىپ اكەتتى. ولاردىڭ بۇل ارەكەتتەرىنە وسىدان كەيىن گرەكتەردىڭ كوماندا كاپيتانى كوستاس كاتسۋرانيستىڭ ەكىنشى مارتە «سارى قاعاز» الۋ ارقىلى الاڭنان قۋىلىپ كەتۋى وتقا ماي قۇيعانداي اسەر ەتتى. وسىدان كەيىن كۇنشىعىس ەلىنىڭ ۇلاندارى وزدەرىنە اسا كەرەكتى جەڭىستى ج ۇلىپ اكەتۋ ءۇشىن ايانىپ قالعان جوق. بۇعان گرەكيا فۋتبولشىلارى ساۋاتتى قورعانا وتىرىپ, ۇدايى قاۋىپتىڭ بۇلتىن ءوز ايىپ الاڭدارى ماڭىنان قاشىقتاتىپ تۇرۋعا بارىنشا كۇش سالۋمەن جاۋاپ قايتاردى.
كەزدەسۋدىڭ ەكىنشى بولىگىندە دە وسى ويىن ءوزىنىڭ جالعاسىن تاپتى. ونىڭ العاشقى مينۋتتارىنان ويىنشىلارىنىڭ سانى ارتىق جاپونداردىڭ كوپ كۇشپەن شابۋىلعا شىعىپ تۇراتىنى, ال گرەكتەردىڭ تاسقامال قورعانىسقا تىرەك ارتا وتىرىپ, سيرەك بۇرق ەتە قالاتىن قارسى شابۋىلدارعا سۇيەنەتىنى بەلگىلى بولىپ قالدى. سونىڭ پاتىندە سامۋرايلار جاپپاي جورىققا باس قويدى. الايدا, ولاردىڭ شابۋىلدارىندا وتكىرلىك پەن تاپقىرلىق جەتىسپەي جاتتى. كىل بىروڭكەي جۇيەمەن ۇرعان تاسقىننىڭ بەتىن قايتارۋ سوندىقتان ەللادالىقتارعا تىم قيىنعا سوققان جوق. مۇنى از دەسەڭىز, گرەكتەر قارسى شابۋىلداردى دا ءجيى قولدانىپ تۇردى. سونداي ساتتەردىڭ بىرىندە ولار قاتارىنان ءۇش رەت بۇرىشتاما دوبىن بەردى. فەرناندۋ سانتۋشتىڭ شاكىرتتەرى سول ىرعىندا كاۆاسيما قورعاعان قاقپانى قاقىراتىپ وتۋگە دە ءسال قالدى.
جاپوندار تايمنىڭ ورتاسىندا عانا ويىندى تەڭەستىرىپ, قىسىم جاساۋىن قايتا جالعاستىرا باستادى. بىراق قارسى جاقتىڭ وتە ۇيلەسىمدى تۇرعىزىلعان قورعانىس شەبىن سەتىنەتىپ وتۋگە اقىرى شامالارى كەلمەدى.
سەرىك ءپىرنازار,
«ەگەمەن قازاقستان».