جەتىسۋلىقتاردىڭ ۆولەيبولعا كەلگەندە ءبىر بۇيرەگى بۇرىپ تۇرادى. وسىعان وراي تالدىقورعان تورىندە «جەتىسۋ» ۆولەيبول كلۋبىنا ارنالعان سپورتتىق بازا مەن كلۋب ويىنشىلارىنا ارناپ تۇرعىن ءۇي تۇرعىزىلماق. بۇل ءوزى سپورتشىلاردىڭ كوپتەن بەرگى تىلەگى ەدى.
جەتىسۋ وبلىسى اكىمىنىڭ ءباسپاسوز قىزمەتىنىڭ مالىمەتىنشە, اتالعان نىساننىڭ ەسكيزدىك جوباسىن وبلىس اكىمى بەيبىت يساباەۆ ۆولەيبول جاتتىقتىرۋشىلارىمەن جانە ساۋلەت-قۇرىلىس سالاسىنىڭ ماماندارىمەن بىرلەسىپ تالقىلاعان.
كوپكە ءمالىم, «جەتىسۋ» ۆولەيبول كلۋبى – ەل چەمپيوناتىندا ۇزدىكتەر قاتارىنان كورىنىپ جۇرگەن كوماندا. ونىڭ ۇستىنە قالىپتاسقان ءوز ويىن ۇلگىسى بار, جاناشىر جانكۇيەرى دە جەتەرلىك. جالپى, كلۋب جۇمىسى جاقسى جولعا قويىلعانىمەن, جاستار سپورت سارايىندا دايىندالىپ ءجۇر. وندا ءارتۇرلى سپورت سەكتورلارى بولعاندىقتان, سپورتشىلارعا كەدەرگى كەلتىرەدى. جاتتىقتىرۋشىلار الداعى ۋاقىتتا بۇدان دا جوعارى ناتيجەلەرگە قول جەتكىزۋدى جوسپارلاپ وتىر. ەندى وڭىردە سول ءۇشىن سپورتشىلارعا بارلىق جاعداي جاسالادى. بۇل ءوز كەزەگىندە جەرگىلىكتى جاسوسپىرىمدەردى سپورتقا باۋلۋعا, وبلىستاعى سپورتتىق كوماندالار مۇشەلەرىنىڭ قاتارىن جەتىسۋلىق تالانتتى بالالارمەن تولىقتىرۋعا ىقپال ەتپەك.
ب.يساباەۆ ءوز سوزىندە قۇرىلىس بارىسىندا سپورتتىق نىساندارعا قويىلاتىن بارلىق نورماتيۆ قاتاڭ ەسكەرىلۋگە ءتيىس ەكەنىن ايتتى. وسى ورايدا كلۋب جاتتىقتىرۋشىلارى قۇرىلىس نىساندارىن جوبالاۋشىلارمەن بىرلەسىپ جۇمىس ىستەۋى كەرەك. اتاپ وتسەك, ءۇش قاباتتان تۇراتىن سپورت بازاسىندا ەرلەر مەن ايەلدەر كوماندالارىنا ارنالعان جەكە ويىن زالدارى, ماسساج كابينەتتەرى, دۋش كابينالارى, ترەناجەرلىق زالدار, مەديتسينا مامانىنا ارنالعان كابينەت, اكىمشىلىككە ارنالعان بولمەلەر – جالپى سپورتشىلاردىڭ وقۋ-جاتتىعۋىنا قاجەتتى جاعدايلاردىڭ بارلىعى قاراستىرىلادى. نىساننىڭ قۇرىلىسىنا كەرەكتى قارجى وبلىس بيۋدجەتىنەن بولىنەدى.
ال كلۋب ويىنشىلارى مەن جاتتىقتىرۋشىلارىنا ارنالعان 4 قاباتتى تۇرعىن ءۇي جەكە ينۆەستورلار ەسەبىنەن تۇرعىزىلماق. وندا ەرلەر مەن ايەل سپورتشىلارعا ارنالعان بلوكتار بولەك بولادى. تۇرعىن ۇيدە جاتىن بولمەلەرمەن قاتار شارۋاشىلىققا قاجەتتى بولمەلەر, اس ازىرلەيتىن ورىن, اسحانا, ماسساج كابينەتى, مەدپەرسونالعا ارنالعان بولمە, دەمالىس بولمەسى جانە باسقا دا قاجەتتىلىكتەر قاراستىرىلادى. «جەتىسۋ» ايەلدەر ۆولەيبول كومانداسىنىڭ جاتتىقتىرۋشىسى ەلەنا پاۆلوۆا, سپورتتىق ديرەكتورى ۆالەري بەلەنكوۆ جانە باسقا دا جاتتىقتىرۋشىلار ساۋلەت جانە قۇرىلىس سالاسى ماماندارىمەن بىرگە نىساندار قۇرىلىستارىن تالقىلاۋ بارىسىندا ورتاق تۇجىرىمعا كەلىپ, ەسكيزدىڭ ەگجەي-تەگجەيىن كەڭەسە جوبالاۋعا كەلىستى.
وسى جيىن بارىسىندا تالدىقورعاندا ينۆەستوردىڭ ەسەبىنەن سالىناتىن ۇستەل تەننيسى ورتالىعى قۇرىلىسى جوباسىنىڭ جاي-جاپسارى دا تالقىلاندى.
جيىن قورىتىندىسىندا وبلىس اكىمى ايماقتا سپورت سالاسىنا, سونىڭ ىشىندە كاسىبي كلۋبتاردىڭ ماتەريالدىق-تەحنيكالىق بازاسىن نىعايتۋعا زور كوڭىل بولىنەتىنىن اتاپ ءوتتى. وڭىرگە كەلگەن ساپارىندا مەملەكەت باسشىسى جەتىسۋدىڭ سپورتتاعى داڭقىن قالپىنا كەلتىرۋ جايلى تاپسىرما بەرگەن ەدى. سوعان سايكەس قولعا الىنىپ وتىرعان مۇنداي ءىس-شارالار وڭىردە سالاماتتى ءومىر سالتىن ناسيحاتتاۋعا, جاستاردى دەنە شىنىقتىرۋ مەن سپورتقا كوپتەپ باۋلۋعا ىقپال ەتپەك.
«بيىل بىرنەشە سپورتتىق نىساننىڭ قۇرىلىسى جۇرگىزىلەدى. سونىڭ ىشىندە «جەتىسۋ» ۆولەيبول كلۋبىنا ارنالعان سپورتتىق بازا مەن ارنايى تۇرعىن ءۇي, ۇستەل تەننيسى ورتالىعى سالىنادى. يندورحوككەيدەن ۇلدار مەن قىزدار كوماندالارى جاسوسپىرىمدەر اراسىندا وتەتىن الەم چەمپيوناتىنا جولعا شىقتى. رەگبيدەن ەلىمىزدىڭ قۇراما كومانداسىنىڭ نەگىزىن ءبىزدىڭ وبلىستىڭ سپورتشىلارى قۇراپ وتىر. سپورتتىڭ وسى تۇرىنەن ۇلدارىمىز بەن قىزدارىمىز رەسپۋبليكادا 1, 2-ورىنداردان كورىنىپ كەلەدى. سوندىقتان ءبىز يندورحوككەي مەن رەگبي كلۋبتارى ءۇشىن دە جاتتىعۋ بازالارىن سالىپ بەرەمىز. باسكەتبولدان جانە فۋتزالدان وبلىستا كوماندالار قۇرىلدى. بۇل كلۋبتارعا دا مۇمكىندىگىنشە جاعداي جاسايمىز», دەدى ب.يساباەۆ.
الداعى ۋاقىتتا «جەتىسۋ» فۋتبول كلۋبىنىڭ ورتالىق ستاديونى مەن قوسالقى ستاديونىنا جاڭعىرتۋ جۇمىستارى جۇرگىزىلمەك. فۋتبولشىلار پرەمەر-ليگاعا كوتەرىلىپ, جاقسى ناتيجە كورسەتتى. قازىر وبلىستاعى كاسىبي كلۋبتار كوماندالارىنىڭ قۇرامىندا 80-90 پايىزى – ءوز ەلىمىزدىڭ ازاماتتارى, سولاردىڭ تەڭ جارتىسى – جەتىسۋدىڭ ۇل-قىزدارى. وبلىس اكىمدىگى ماتەريالدىق بازالاردى نىعايتۋعا بار مۇمكىندىكتى جاساماق نيەتتە.
جەتىسۋ وبلىسى